តើអ្នកបានឃើញទំនាក់ទំនងរបស់អ្នកជាមួយព្រះមានឥទ្ធិពលលើជីវិតរបស់អ្នកតាមរបៀបណា?

ការដើរជាមួយព្រះ

មានពាក្យពីរដែលព្រះគម្ពីរប្រើជាញឹកញាប់ដើម្បីនិយាយអំពីជីវិតរបស់អ្នក នៅពេលអ្នកមានទំនាក់ទំនងជាមួយព្រះ។ ពាក្យទីមួយគឺ ដើរ។

ការដើរជាមួយព្រះមានន័យថា ឆ្លងកាត់ជីវិតជាមួយទ្រង់។ នៅពេលអ្នកដើរជាមួយគ្នា វាបង្ហាញពីភាពស្និទ្ធស្នាលដែលកំពុងរីកចម្រើនតាមរយៈពេលវេលា គំនិត និងបទពិសោធដែលមានជាមួយគ្នា។ នៅក្នុងព្រះគម្ពីរ យើងរកឃើញថា ព្រះបានដើរជាមួយប្រជារាស្ដ្រទ្រង់តាំងពីដើមដំបូងមក។

តើព្រះសន្យាអ្វីដល់ប្រជារាស្ដ្រទ្រង់នៅ លេវីវិន័យ ២៦:១២?

លេវីវិន័យ ២៦:១២

អញនឹងដើរនៅកណ្តាលពួកឯង ព្រមទាំងធ្វើជាព្រះដល់ឯងរាល់គ្នា ហើយឯងរាល់គ្នានឹងធ្វើជារាស្ត្រដល់អញ

(អានបន្ថែម)

ប្រសិនបើអ្នកបានដើរជាមួយព្រះថ្ងៃនេះ តើអ្នកចង់និយាយជាមួយទ្រង់អំពីអ្វី?

តើភាពរីករាយរបស់អ្នកក្នុងការនៅជាមួយនឹងព្រះបានរីកចម្រើន ចាប់តាំងពីអ្នកចាប់ផ្ដើមទំនាក់ទំនងជាមួយទ្រង់ឬទេ? បើដូច្នេះ តើដោយរបៀបណា?

ពាក្យទីពីរគឺដើរតាម។ នៅក្នុង យ៉ូហាន ១០:១១, ២៧ ព្រះយេស៊ូវពណ៌នាអំពីទ្រង់ជាអ្នកគង្វាលដែលយកចិត្តទុកដាក់ដល់យើង ដែលដឹកនាំយើង។

យ៉ូហាន ១០:១១, ២៧

ខ្ញុំជាអ្នកគង្វាលល្អ . . . ចៀមខ្ញុំទាំងប៉ុន្មានវាស្តាប់ខ្ញុំ ហើយមកតាម ខ្ញុំក៏ស្គាល់វាដែរ

(អានបន្ថែម)

ក្នុងនាមជាចៀមនៅក្នុងហ្វូងចៀមរបស់ទ្រង់ យើងត្រូវធ្វើតាមការណែនាំរបស់ទ្រង់។ តើអ្នកគិតថា អ្វីដែលធ្វើឲ្យចៀមសុខចិត្តដើរតាមអ្នកគង្វាលរបស់វា?

នៅពេលដែលព្រះយេស៊ូវបានត្រាស់ហៅមនុស្សឲ្យដើរតាមទ្រង់ ទ្រង់កំពុងសុំពួកគេឲ្យធ្វើការជ្រើសរើសដើម្បីទទួលយកការដឹកនាំរបស់ទ្រង់ ហើយដើរតាមរបៀបរស់នៅរបស់ទ្រង់។

តើអ្នកគិតថា ការដែលអ្នករស់នៅដូចដែល ១ យ៉ូហាន ២:៦ ប្រាប់យើង ជាការរស់នៅមានលក្ខណៈដូចម្ដេច?

១ យ៉ូហាន ២:៦

អ្នកណាដែលថាខ្លួននៅក្នុងទ្រង់ នោះត្រូវតែប្រព្រឹត្តដូចជាទ្រង់ដែរ។
(អានបន្ថែម)

ទាំងការដើរជាមួយព្រះ និងដើរតាមទ្រង់ មានន័យថា យើងជ្រើសរើសស្តាប់បង្គាប់ទ្រង់ ហើយព្យាយាមធ្វើតាមព្រះហឫទ័យរបស់ទ្រង់ នោះយើងនឹងរស់នៅតាមរបៀបដែលថ្វាយព្រះកិត្តិយសដល់ទ្រង់។
តើមានអ្វីខ្លះដែល កូល៉ុស ១:១០ ចែងថានឹងធ្វើឲ្យព្រះសព្វព្រះហឫទ័យ?

កូល៉ុស ១:១០

ដើម្បីឲ្យបានដើរបែបគួរនឹងព្រះ‌អម្ចាស់ ទាំងគាប់ចិត្តដល់មនុស្សទាំងអស់ ឲ្យបានបង្កើតផលក្នុងគ្រប់ទាំងការល្អ ហើយឲ្យស្គាល់ព្រះកាន់តែច្បាស់ឡើង
(អានបន្ថែម)

យោងតាម ១ យ៉ូហាន ៥:៣ តើអ្វីជាការជំរុញចិត្ត ដែលជំរុញពីក្រោយបំណងចិត្តរបស់គ្រីស្ទបរិស័ទម្នាក់ក្នុងការរស់នៅជីវិតដែលគាប់ព្រះហឫទ័យនឹងព្រះ?

១ យ៉ូហាន ៥:៣

ដ្បិតនេះហើយជាសេចក្ដីស្រឡាញ់ដល់ព្រះ គឺឲ្យយើងកាន់តាមអស់ទាំងបញ្ញត្តរបស់ទ្រង់ ឯបញ្ញត្តទ្រង់ នោះមិនមែនជាបន្ទុកដ៏ធ្ងន់ទេ
(អានបន្ថែម)

តើនេះខុសគ្នាយ៉ាងណាពីរបៀបដែលមនុស្សមួយចំនួនមើលមកជីវិតរស់នៅជាគ្រិស្ដបរិស័ទ?
ដោយផ្អែកលើការពិភាក្សាមុនរបស់យើង និង កាឡាទី ៥:២៥ តើយើងទទួលបានព្រះចេស្ដាដើម្បីដើរតាមរបៀបដែលព្រះយេស៊ូវបានដើរនៅឯណា?

កាឡាទី ៥:២៥

បើសិនជាយើងរស់ដោយនូវព្រះ‌វិញ្ញាណ នោះត្រូវដើរដោយព្រះ‌វិញ្ញាណដែរ
(អានបន្ថែម)

បន្ថែមពីលើព្រះវិញ្ញាណបរិសុទ្ធ ព្រះជាម្ចាស់បានប្រទានជំនួយមួយទៀតដល់យើង ដើម្បីអាចរស់នៅក្នុងជីវិតគ្រីស្ទបរិស័ទ ដែលជាសហគមន៍នៃអ្នកផ្សេងទៀតដែលកំពុងដើរតាមទ្រង់។

យើងត្រូវបានស្វាគមន៍មកក្នុងសហគមន៍របស់ព្រះ

តើមានអ្វីខ្លះដែលអ្នកឲ្យតម្លៃ អំពីការក្លាយជាចំណែកមួយនៃសហគមន៍?
ការក្លាយជាចំណែកមួយនៃសហគមន៍ជាមួយអ្នកដទៃ គឺជាតម្រូវការមូលដ្ឋានមួយរបស់យើងក្នុងជីវិត។ ទំនាក់ទំនងរបស់អ្នកជាមួយព្រះមិនត្រឹមតែផ្តល់ឲ្យអ្នកនូវជីវិតថ្មីប៉ុណ្ណោះទេ ប៉ុន្តែថែមទាំងនាំអ្នកចូលទៅក្នុងសហគមន៍ថ្មីផងដែរ ពោលគឺគ្រួសាររបស់ព្រះ។
សូមអាន យ៉ូហាន ១:១២

យ៉ូហាន ១:១២

ប៉ុន្តែអស់អ្នកណាដែលទទួលទ្រង់ គឺអស់អ្នកដែលជឿដល់ព្រះ‌នាមទ្រង់ នោះទ្រង់បានប្រទានអំណាចឲ្យបានត្រឡប់ជាកូនព្រះ
(អានបន្ថែម)

ក្នុងនាមជាកូនរបស់ព្រះ តើអ្នកមានទំនាក់ទំនងយ៉ាងណាជាមួយនឹងកូនៗរបស់ទ្រង់ដទៃទៀត?
តើពាក្យអ្វីផ្សេងទៀតត្រូវបានប្រើសម្រាប់យើងនៅក្នុង អេភេសូរ ២:១៩? តើពាក្យទាំងនោះមានន័យយ៉ាងណា?

អេភេសូរ ២:១៩

ដូច្នេះ អ្នករាល់គ្នាមិនមែនជាអ្នកដទៃ ឬជាអ្នកគ្រាន់តែសំណាក់នៅទៀតទេ គឺជាជាតិតែ១នឹងពួកបរិសុទ្ធ ជាពួកដំណាក់ព្រះវិញ
(អានបន្ថែម)

យោងតាម អេភេសូរ ៤:៤-៦ តើកូនរបស់ព្រះមានអ្វីដូចៗគ្នា ឬរួមគ្នា?

អេភេសូរ ៤:៤-៦

មានរូប‌កាយតែ១ ហើយព្រះ‌វិញ្ញាណតែ១ ដូចជាទ្រង់បានហៅអ្នករាល់គ្នាមក ក្នុងសេចក្ដីសង្ឃឹមតែ១របស់ការ‌ងារអ្នករាល់គ្នាដែរ មានព្រះ‌អម្ចាស់តែ១ សេចក្ដីជំនឿតែ១ បុណ្យជ្រមុជតែ១ មានព្រះតែ១ គឺជាព្រះវរ‌បិតានៃទាំងអស់ ដែលទ្រង់ខ្ពស់លើទាំងអស់ គង់នៅកណ្តាលទាំងអស់ ហើយសណ្ឋិតនៅក្នុងទាំងអស់
(អានបន្ថែម)

អ្នកដើរតាមព្រះយេស៊ូវបានប្រមូលផ្ដុំគ្នាក្នុងសហគមន៍ដែលជាព្រះវិហារ (ឬក្រុមជំនុំ) អស់ជាច្រើនសតវត្សមកហើយ។
តើ កិច្ចការ ២:៤២, ៤៦ ចែងថាអ្នកដើរតាមព្រះគ្រីស្ទនៅសតវត្សទី ១ បានធ្វើអ្វីខ្លះជាមួយគ្នា?

កិច្ចការ ២:៤២, ៤៦

អ្នកទាំងនោះក៏នៅតែព្យាយាមក្នុងសេចក្ដីបង្រៀនរបស់ពួកសាវក ហើយក្នុងសេចក្ដីប្រកបគ្នា . . . នឹងសេចក្ដីអធិស្ឋានផង . . .
រាល់តែថ្ងៃ គេនៅតែព្យាយាមក្នុងព្រះ‌វិហារ ដោយមានចិត្តព្រមព្រៀងគ្នា ឯកាលនៅផ្ទះ ក៏កាច់នំបុ័ង
(អានបន្ថែម)

តើអ្នកចូលរួមនឹងអ្នកឯទៀតនៅក្នុងសហគមន៍របស់ព្រះយ៉ាងណា?
1 Corinthians 12:27 uses another image to describe the family of God – the body.

១ កូរិនថូស ១២:២៧

អ្នករាល់គ្នាជារូប‌កាយនៃព្រះ‌គ្រីស្ទ ហើយជាអវយវៈរបស់រូប‌កាយរៀងខ្លួន
(អានបន្ថែម)

ព្រះបានបង្កើតយើងជាសហគមន៍មួយដែលមានព្រះគ្រីស្ទជាព្រះសិរសា ហើយយើងម្នាក់ៗជាសរីរាង្គសំខាន់នៃរូបកាយ។ ទ្រង់បានរចនាយើងម្នាក់ៗឲ្យប្រើភាពខ្លាំងរបស់យើងដើម្បីជួយគ្នាទៅវិញទៅមកកាន់តែដូចជាព្រះគ្រីស្ទ ហើយដើរដូចទ្រង់បានដើរ។
តើអ្នកគិតថា ព្រះអាចនឹងប្រើប្រាស់អ្នកដើម្បីជួយអ្នកដទៃក្នុងព្រះកាយទ្រង់ដោយរបៀបណា?
នៅពេលដែលយើងប្រាស្រ័យទាក់ទងគ្នាក្នុងនាមជាសរីរាង្គនៃព្រះកាយតែមួយ លោកិយជុំវិញយើងអាចមើលឃើញពីរបៀបដែលព្រះបានរចនាយើងឲ្យរស់នៅដោយមានទំនាក់ទំនងជាមួយទ្រង់ និងជាមួយគ្នាទៅវិញទៅមក។ នោះជាផ្នែកនៃគោលបំណងថ្មីរបស់យើង។

យើងជាមនុស្សដែលទទួលបានគោលបំណងថ្មី

ព្រះយេស៊ូវបានយាងមកផែនដី ដើម្បីឲ្យមនុស្សស្គាល់ព្រះ។

តើព្រះយេស៊ូវពណ៌នាអំពីអង្គទ្រង់ និងគោលបំណងរបស់ទ្រង់នៅក្នុង យ៉ូហាន ១២:៤៦ យ៉ាងដូចម្ដេច ?

យ៉ូហាន ១២:៤៦

ខ្ញុំបានមកក្នុងលោកីយជាពន្លឺភ្លឺ ដើម្បីកុំឲ្យអ្នកណាដែលជឿដល់ខ្ញុំ ត្រូវនៅក្នុងសេចក្ដីងងឹតឡើយ
(អានបន្ថែម)

តើមនុស្សចាកចេញពីភាពងងឹតដោយរបៀបណា?
នៅក្នុង ម៉ាថាយ ៥:១៤ ព្រះយេស៊ូវហៅអ្នកដើរតាមទ្រង់ថា «ពន្លឺនៃលោកីយ៍»។

ម៉ាថាយ ៥:១៤

អ្នករាល់គ្នាជាពន្លឺនៃលោកីយ
(អានបន្ថែម)

តើ ភីលីព ២:១៥ ពិពណ៌នាអំពីគោលបំណងរបស់ព្រះសម្រាប់យើងយ៉ាងដូចម្ដេច ?

ភីលីព ២:១៥

ប្រយោជន៍ឲ្យអ្នករាល់គ្នាបានឥតសៅ‌ហ្មង ឥតកិច្ច‌កល ជាកូនព្រះ ដែលរកបន្ទោសមិនបាននៅក្នុងដំណមនុស្សវៀច ហើយខិល‌ខូច ដែលអ្នករាល់គ្នាភ្លឺនៅកណ្តាលគេ ដូចជាតួពន្លឺនៅក្នុងលោក
(អានបន្ថែម)

គោលបំណងមួយដែលយើងធ្វើជាព្រះកាយរបស់ព្រះយេស៊ូវនៅលើផែនដី គឺដើម្បីជួយអ្នកដែលមិនជឿលើព្រះឲ្យស្គាល់ទ្រង់។ យើងគឺជាការឆ្លុះបញ្ចាំងអំពីព្រះ ដោយនាំមកនូវពន្លឺនៅគ្រប់ទីកន្លែងដែលយើងទៅ ពេលយើងបង្ហាញ និងចែកចាយអត្ថន័យនៃការស្គាល់ព្រះ។

យោងតាម ២ កូរិនថូស ៤:៦ តើអ្វីទៅជាពន្លឺដែលយើងផ្តល់ដល់អ្នកដទៃ?

២ កូរិនថូស ៤:៦

ដ្បិតគឺជាព្រះ ដែលមានបន្ទូលបង្គាប់ ឲ្យមានពន្លឺភ្លឺចេញពីសេចក្ដីងងឹត ទ្រង់បានបំភ្លឺមកក្នុងចិត្តយើងខ្ញុំ ឲ្យយើងខ្ញុំមានរស្មីពន្លឺនៃដំណើរស្គាល់សិរី‌ល្អរបស់ព្រះ ដែលនៅព្រះ‌ភក្ត្រនៃព្រះ‌យេស៊ូវគ្រីស្ទ។
(អានបន្ថែម)

តើនរណាជាមនុស្សក្នុងជីវិតរបស់អ្នក ដែលត្រូវការមើលឃើញពន្លឺរបស់ព្រះ?
តើមានវិធីអ្វីខ្លះដែលអ្នកអាចផ្តល់ពន្លឺដល់ពួកគេក្នុងការស្គាល់ព្រះ?
ក្នុងនាមជាអ្នកដើរតាមព្រះគ្រីស្ទ វាជារឿងធម្មតាសម្រាប់យើងដែលចង់ចែករំលែកសេចក្ដីសង្ឃឹមដែលយើងបានរកឃើញក្នុងព្រះគ្រីស្ទទៅអ្នកឯទៀត។ យើងអាចចែកចាយជាមួយពួកគេអំពីរបៀបដែលពួកគេអាចស្គាល់ព្រះ ហើយយើងក៏អាចចែកចាយពីរបៀបដែលពួកគេអាចរីកចម្រើនក្នុងទំនាក់ទំនងរបស់ពួកគេជាមួយទ្រង់ផងដែរ។
សូមអានពាក្យរបស់លោកប៉ុលទៅកាន់ធីម៉ូថេនៅក្នុង ២ ធីម៉ូថេ ២:២។

២ ធីម៉ូថេ ២:២

ឯអស់ទាំងសេចក្ដីដែលអ្នកបានឮអំពីខ្ញុំ នៅមុខស្មរបន្ទាល់ជាច្រើន នោះក៏ត្រូវផ្ញើទុកនឹងមនុស្សស្មោះ‌ត្រង់ ដែលអាចនឹងបង្វឹកបង្រៀនតទៅអ្នកឯទៀតដែរ
(អានបន្ថែម)

តើលោកប៉ុលបានលើកទឹកចិត្តយុវជនធីម៉ូថេឲ្យធ្វើអ្វីជាមួយនឹងអ្វីដែលគាត់បានរៀន?
តើអ្នកណាអាចជា «ធីម៉ូថេ» របស់អ្នក?

គំនិតសង្ខេប និងជំហានឆ្ពោះទៅមុខ

តើការ «ដើរជាមួយព្រះ» របស់អ្នកឥឡូវនេះ មានលក្ខណៈយ៉ាងណា?
តើយើងអាចជួយគ្នាទៅវិញទៅមកឲ្យស្មោះត្រង់ ដើម្បីចែករំលែកអ្វីដែលយើងកំពុងរៀនអំពីព្រះ ដូចជាលោកប៉ុល និងធីម៉ូថេបានធ្វើដោយរបៀបណាខ្លះ?
តើអ្នកចង់បន្តជួបគ្នា ដើម្បីជួយយើងឲ្យកាន់តែរីកចម្រើនឡើងយ៉ាងស៊ីជម្រៅក្នុងទំនាក់ទំនងរបស់យើងជាមួយព្រះដែរឬទេ?

នៅសប្តាហ៍នេះ សូមអានអត្ថបទគម្ពីរខាងក្រោម។ សូមអនុវត្តដោយប្រើជំហានទាំង ៥ ដែលអ្នកបានរៀនអំពីរបៀបសិក្សាព្រះគម្ពីរ ៖ ការអធិស្ឋាន ការរកឲ្យឃើញ ការស្តាប់ ការឆ្លើយតប ការចែករំលែក។
សូមបន្តជ្រើសរើសខគម្ពីរថ្មីដើម្បីទន្ទេញចងចាំ ហើយព្យាយាមរម្លឹកឲ្យបានទៀងទាត់នូវអ្វីដែលអ្នកបានរៀនរួចហើយ។

ទំនុកដំកើង ២៣:១-៦

ព្រះ‌យេហូវ៉ាទ្រង់ជាអ្នកគង្វាលខ្ញុំ
ខ្ញុំនឹងមិនខ្វះអ្វីសោះ
ទ្រង់ឲ្យខ្ញុំដេកសំរាកនៅទីមានស្មៅខៀវខ្ចី
ទ្រង់នាំខ្ញុំទៅក្បែរមាត់ទឹកដែលហូរគ្រឿនៗ
ទ្រង់កែព្រលឹងខ្ញុំឡើងវិញ ទ្រង់នាំខ្ញុំទៅតាមផ្លូវសុចរិត
ដោយយល់ដល់ព្រះ‌នាមទ្រង់។
៙ អើ ទោះបើទូលបង្គំដើរកាត់ច្រកភ្នំនៃម្លប់សេចក្ដីស្លាប់ក៏ដោយ
គង់តែមិនខ្លាចសេចក្ដីអាក្រក់ណាឡើយ
ដ្បិតទ្រង់គង់នៅជាមួយនឹងទូលបង្គំ
ព្រនង់ ហើយនឹងដំបងរបស់ទ្រង់កំសាន្តចិត្តទូលបង្គំ
ទ្រង់រៀបតុនៅមុខទូលបង្គំ ចំពោះពួកខ្មាំងសត្រូវផង
ទ្រង់ចាក់ប្រេងលាបលើក្បាលទូលបង្គំ
ពែងនៃទូលបង្គំក៏ពេញហៀរ។
៙ ប្រាកដជាសេចក្ដីសប្បុរស នឹងសេចក្ដីមេត្តា‌ករុណា
នឹងជាប់តាមខ្ញុំ រាល់តែថ្ងៃ ដរាបដល់អស់១ជីវិតខ្ញុំ
ហើយខ្ញុំនឹងនៅក្នុងដំណាក់នៃព្រះ‌យេហូវ៉ា
ជារៀងដរាបទៅ។
(អានបន្ថែម)

យ៉ូហាន ១០:១-១៦

ប្រាកដមែន ខ្ញុំប្រាប់អ្នករាល់គ្នាជាប្រាកដថា អ្នកណាដែលចូលទៅក្នុងក្រោលចៀម មិនមែនតាមទ្វារ គឺឡើងចូលតាមកន្លែងណាឯទៀតវិញ អ្នកនោះឈ្មោះថាជាចោរលួច ចោរប្លន់ហើយ ឯអ្នកដែលចូលតាមទ្វារ នោះជាអ្នកគង្វាលចៀមពិត អ្នកឆ្មាំទ្វារក៏បើកឲ្យអ្នកនោះ ហើយហ្វូងចៀមស្តាប់តាមសំឡេងគាត់ដែរ ឯចៀមរបស់គាត់ នោះគាត់ហៅតាមឈ្មោះវានិមួយៗ នាំចេញទៅក្រៅ កាលបានបញ្ចេញចៀមខ្លួន ទៅក្រៅអស់ហើយ នោះគាត់ដើរមុនវា ហើយចៀមក៏ដើរតាមក្រោយទៅ ដ្បិតវាស្គាល់សំឡេងគាត់ វាមិនព្រមតាមមនុស្សដទៃទេ វានឹងរត់ចេញពីគេវិញ ពីព្រោះវាមិនស្គាល់សំឡេងរបស់មនុស្សដទៃណាសោះ ព្រះ‌យេស៊ូវទ្រង់មានបន្ទូលពាក្យប្រៀបប្រដូចនេះទៅគេ តែគេមិនដឹងជាទ្រង់មានបន្ទូលពីដំណើរអ្វីទេ។
ដូច្នេះ ព្រះ‌យេស៊ូវទ្រង់មានបន្ទូលទៅគេម្តងទៀតថា ប្រាកដមែន ខ្ញុំប្រាប់អ្នករាល់គ្នាជាប្រាកដថា ខ្ញុំជាទ្វារចៀម អស់អ្នកដែលមកមុនខ្ញុំ នោះសុទ្ធតែជាចោរលួចចោរប្លន់ទទេ តែចៀមមិនបានស្តាប់តាមអ្នកទាំងនោះឡើយ ខ្ញុំជាទ្វារ បើអ្នកណាចូលតាមខ្ញុំ នោះនឹងបានសង្គ្រោះ រួចនឹងចេញចូល ហើយនឹងរកបានវាលស្មៅដ៏ស្រួល ឯចោរ វាមកប្រយោជន៍តែនឹងលួច សំឡាប់ ហើយបំផ្លាញប៉ុណ្ណោះ តែឯខ្ញុំវិញ ខ្ញុំបានមក ដើម្បីឲ្យវារាល់គ្នាមានជីវិត ហើយឲ្យមានជីវិតនោះពេញបរិបូរផង ខ្ញុំជាអ្នកគង្វាលល្អ ឯអ្នកគង្វាលល្អ ក៏ស៊ូតែប្តូរជីវិតជំនួសចៀម

តែអ្នកស៊ីឈ្នួល ដែលមិនមែនជាអ្នកគង្វាលពិត ហើយចៀមក៏មិនមែនជារបស់ផងវា លុះវាឃើញឆ្កែព្រៃមក ក៏រត់ចេញចោលចៀម នោះឆ្កែព្រៃឆក់យកទៅ ទាំងដេញកំចាត់‌កំចាយហ្វូងចៀមផង អ្នកស៊ីឈ្នួលនោះរត់ទៅ ពីព្រោះវាគ្រាន់តែស៊ីឈ្នួលប៉ុណ្ណោះ វាមិនយកចិត្តទុកដាក់នឹងចៀមឡើយ ឯខ្ញុំ ជាអ្នកគង្វាលល្អ ខ្ញុំស្គាល់ចៀមរបស់ខ្ញុំ ហើយចៀមក៏ស្គាល់ខ្ញុំ ដូចជាព្រះវរ‌បិតា ទ្រង់ស្គាល់ខ្ញុំ ហើយខ្ញុំក៏ស្គាល់ទ្រង់ដែរ ខ្ញុំស៊ូប្តូរជីវិតខ្ញុំនឹងចៀម ខ្ញុំក៏មានចៀមឯទៀត ដែលមិនទាន់នៅក្នុងក្រោលនេះនៅឡើយ ត្រូវតែខ្ញុំនាំចៀមទាំងនោះមកដែរ វានឹងស្តាប់តាមសំឡេងខ្ញុំ នោះនឹងមានហ្វូងតែ១ នឹងអ្នកគង្វាលតែ១វិញ
(អានបន្ថែម)

អេភេសូរ ៥:៨-១០

ដ្បិតកាលពីដើមអ្នករាល់គ្នាក៏ងងឹតដែរ តែឥឡូវនេះវិញ បានភ្លឺក្នុងព្រះ‌អម្ចាស់ ដូច្នេះ ចូរដើរដូចជាមនុស្សភ្លឺចុះ ដ្បិតផលផ្លែនៃពន្លឺ នោះមាននៅក្នុងគ្រប់ទាំងកិរិយាល្អ សេចក្ដីសុចរិត នឹងសេចក្ដីពិត ចូរលមើលឲ្យដឹងសេចក្ដីអ្វី ដែលព្រះ‌អម្ចាស់ទ្រង់សព្វព្រះ‌ហឫទ័យចុះ
(អានបន្ថែម)

កូល៉ុស ៣:១២-១៧

ដូច្នេះ ចូរប្រដាប់កាយ ដោយចិត្តក្តួលអាណិត សប្បុរស សុភាព សំឡូត នឹងចិត្តអត់‌ធ្មត់ ទុកដូចជាពួកអ្នករើសតាំង ដែលបរិសុទ្ធ ហើយស្ងួន‌ភ្ងាដល់ព្រះចុះ ហើយទ្រាំ‌ទ្រគ្នា ទាំងអត់ទោសទៅវិញទៅមក បើអ្នកណាមានហេតុទាស់នឹងអ្នកណា នោះចូរអត់ទោសឲ្យគេចុះ ដូចជាព្រះ‌គ្រីស្ទបានអត់ទោសឲ្យអ្នករាល់គ្នាដែរ ចូរបន្ថែមទាំងសេចក្ដីស្រឡាញ់ថែមទៀត ជាចំណងនៃសេចក្ដីគ្រប់លក្ខណ៍ ចូរឲ្យសេចក្ដីមេត្រីរបស់ព្រះ‌គ្រីស្ទត្រួត‌ត្រានៅក្នុងចិត្ត ដែលទ្រង់បានហៅអ្នករាល់គ្នាមកក្នុងសេចក្ដីនោះឯង ឲ្យមានរូប‌កាយតែ១ ហើយត្រូវដឹងគុណផង។

ចូរឲ្យព្រះ‌បន្ទូលនៃព្រះ‌គ្រីស្ទ បានសណ្ឋិតនៅក្នុងអ្នករាល់គ្នាជាបរិបូរ ដោយប្រាជ្ញាគ្រប់យ៉ាង ទាំងបង្រៀន ហើយទូន្មានគ្នា ដោយនូវទំនុកដំកើង ទំនុកបរិសុទ្ធ នឹងចំរៀងខាងឯវិញ្ញាណ ទាំងច្រៀងក្នុងចិត្តថ្វាយព្រះ ដោយព្រះ‌គុណ ហើយក្នុងគ្រប់ទាំងអស់ ទោះបើការអ្វីដែលអ្នករាល់គ្នានឹងធ្វើ ដោយពាក្យសំដីឬកិរិយាក៏ដោយ ចូរធ្វើទាំងអស់ ដោយព្រះ‌នាមនៃព្រះ‌អម្ចាស់យេស៊ូវ ទាំងអរព្រះ‌គុណដល់ព្រះដ៏ជាព្រះវរ‌បិតា ដោយ‌សារទ្រង់ផង។
(អានបន្ថែម)

រ៉ូម ១២:៣-៨

ដ្បិតខ្ញុំនិយាយនឹងមនុស្សទាំងអស់ក្នុងពួកអ្នករាល់គ្នា ដោយព្រះ‌គុណដែលទ្រង់បានផ្តល់មកខ្ញុំថា ចូរគិតបែបឲ្យមានគំនិតនឹង‌ធឹង តាមខ្នាតនៃសេចក្ដីជំនឿ ដែលព្រះបានចែកមកអ្នករាល់គ្នានិមួយៗ កុំឲ្យមានគំនិតខ្ពស់ លើសជាងគំនិត ដែលគួរគប្បីឲ្យគិតនោះឡើយ ដ្បិត ដែលយើងរាល់គ្នាមានអវយវៈជាច្រើន រួមគ្នាជារូប‌កាយតែមួយ តែអវយវៈទាំងនោះមានការ‌ងារផ្សេងៗពីគ្នាជាយ៉ាងណា នោះយើងដែលមានគ្នាច្រើន ក៏ជារូប‌កាយតែមួយក្នុងព្រះ‌គ្រីស្ទ ហើយជាអវយវៈដល់គ្នានឹងគ្នាបែបយ៉ាងនោះដែរ ដូច្នេះ ដែលមានអំណោយទានផ្សេងពីគ្នា តាមព្រះ‌គុណដែលផ្តល់មកយើង ទោះបើជាសេចក្ដីទំនាយ នោះក៏ត្រូវទាយតាមខ្នាតនៃសេចក្ដីជំនឿ ឬបើជាការបំរើ នោះចូរបំរើចុះ ឬជាការបង្រៀន ចូរបង្រៀនទៅ ឬជាការទូន្មាន ចូរទូន្មានទៅ ឬជាការចែកទាន ចូរចែកដោយចិត្តស្មោះ ឬជាការនាំមុខ ចូរធ្វើដោយឧស្សាហ៍ ឬការមេត្តា‌ករុណា ក៏ចូរធ្វើដោយរីក‌រាយចុះ។
(អានបន្ថែម)

២ កូរិនថូស ៥:១៧-២០

បានជាបើអ្នកណានៅក្នុងព្រះ‌គ្រីស្ទ នោះឈ្មោះថាបានកើតជាថ្មីហើយ អស់ទាំងសេចក្ដីចាស់បានកន្លងបាត់ទៅ មើល គ្រប់ទាំងអស់បានត្រឡប់ជាថ្មីវិញ គ្រប់ទាំងអស់ក៏មកពីព្រះ ដែលទ្រង់បានផ្សះ‌ផ្សាយើងនឹងព្រះ‌អង្គទ្រង់ ដោយ‌សារព្រះ‌យេស៊ូវគ្រីស្ទ ហើយបានប្រទានការ‌ងារផ្សះ‌ផ្សានោះ មកយើងខ្ញុំដែរ គឺពីដំណើរដែលព្រះ‌ទ្រង់គង់ក្នុងព្រះ‌គ្រីស្ទ កំពុងផ្សះ‌ផ្សាលោកីយនឹងព្រះ‌អង្គទ្រង់ ឥតប្រកាន់ទោសគេទៀត ហើយទ្រង់បានប្រគល់ព្រះ‌បន្ទូល ពីការផ្សះ‌ផ្សានោះមកយើងខ្ញុំ។

ដូច្នេះ យើងខ្ញុំជាទូតដំណាងព្រះ‌គ្រីស្ទ ហាក់ដូចជាព្រះ‌ទ្រង់អង្វរដោយ‌សារយើងខ្ញុំ គឺយើងខ្ញុំអង្វរគេជំនួសព្រះ‌គ្រីស្ទថា ចូរឲ្យបានជាមេត្រីនឹងព្រះចុះ
(អានបន្ថែម)

Topic មុន

Back to Resource

ការសន្ទនាអំពីមូលដ្ឋាននៃជំនឿ អំពី ៖

៥ - ការរស់នៅស្របតាមទំនាក់ទំនងរបស់អ្នកជាមួយព្រះ

ការដើរជាមួយព្រះ

លេវីវិន័យ ២៦:១២

យ៉ូហាន ១០:១១, ២៧

១ យ៉ូហាន ២:៦

កូល៉ុស ១:១០

១ យ៉ូហាន ៥:៣

កាឡាទី ៥:២៥

យើងត្រូវបានស្វាគមន៍មកក្នុងសហគមន៍របស់ព្រះ

យ៉ូហាន ១:១២

អេភេសូរ ២:១៩

អេភេសូរ ៤:៤-៦

កិច្ចការ ២:៤២, ៤៦

១ កូរិនថូស ១២:២៧

យើងជាមនុស្សដែលទទួលបានគោលបំណងថ្មី

យ៉ូហាន ១២:៤៦

ម៉ាថាយ ៥:១៤

ភីលីព ២:១៥

២ កូរិនថូស ៤:៦

២ ធីម៉ូថេ ២:២

គំនិតសង្ខេប និងជំហានឆ្ពោះទៅមុខ

ទំនុកដំកើង ២៣:១-៦

យ៉ូហាន ១០:១-១៦

អេភេសូរ ៥:៨-១០

កូល៉ុស ៣:១២-១៧

រ៉ូម ១២:៣-៨

២ កូរិនថូស ៥:១៧-២០

Contact Us