តើប្រជាជនយើងភាគច្រើន ឲ្យនិយមន័យថាគ្រីស្ទបរិស័ទគឺជានរណា?
តើទស្សនៈរបស់អ្នកផ្ទាល់ចំពោះអ្វីដែលគ្រីស្ទបរិស័ទ ខុសពីទស្សនៈទាំងនោះដោយរបៀបណាដែរ?
ទំនាក់ទំនងបែបផ្ទាល់ខ្លួនជាមួយនឹងព្រះ
ព្រះគម្ពីរពន្យល់ថា គ្រីស្ទបរិស័ទ ដែលជាអ្នកដើរតាមព្រះគ្រីស្ទ គឺជាអ្នកដែលមានទំនាក់ទំនងបែបផ្ទាល់ខ្លួនជាមួយនឹងព្រះ។
ព្រះប្រើប្រាស់រូបភាពនៃបដិសណ្ឋារកិច្ច ដើម្បីផ្តល់ឲ្យយើងឃើញនូវរូបភាពនៃទំនាក់ទំនងពិសេសនេះ ដែលយើងអាចមានជាមួយទ្រង់។
សូមអាន វិវរណៈ ៣:២០
វិវរណៈ ៣:២០
មើល អញឈរនៅមាត់ទ្វារទាំងគោះ បើអ្នកណាឮសំឡេងអញ ហើយបើកទ្វារឲ្យ នោះអញនឹងចូលទៅឯអ្នកនោះ អញនឹងបរិភោគជាមួយនឹងអ្នកនោះ ហើយអ្នកនោះជាមួយនឹងអញដែរ
តើព្រះគ្រីស្ទប្រទានអ្វីដល់អ្នកដែលអញ្ជើញទ្រង់ចូលក្នុងជីវិតរបស់ពួកគេ?
តើរឿងនេះបង្ហាញពីទំនាក់ទំនងបែបណាចំពោះអ្នក?
តើអ្នកចង់និយាយជាមួយទ្រង់អំពីអ្វីខ្លះ នៅពេលទ្រង់គង់ប្រថាប់ (អង្គុយ) និងសោយ (បរិភោគ) ជាមួយអ្នក?
ព្រះគម្ពីរក៏ពណ៌នាអំពីទំនាក់ទំនងរបស់អ្នកជាមួយព្រះក្នុងន័យបែបជាគ្រួសារមួយដែរ។ សូមអាន យ៉ូហាន ១:១២.
យ៉ូហាន ១:១២
ប៉ុន្តែអស់អ្នកណាដែលទទួលទ្រង់ គឺអស់អ្នកដែលជឿដល់ព្រះនាមទ្រង់ នោះទ្រង់បានប្រទានអំណាចឲ្យបានត្រឡប់ជាកូនព្រះ
តើនេះបង្កើតជាទំនាក់ទំនងបែបណារវាងអ្នក និងព្រះ?
តើអ្នកបានយល់ឃើញអំពីព្រះ ខុសពីនេះទេ? បើដូច្នេះ តើកន្លងមកអ្នកមានទស្សនៈយ៉ាងណាចំពោះទ្រង់?
តើទ្រង់សុំឲ្យយើងធ្វើអ្វី ដើម្បីមានទំនាក់ទំនងនេះ?
តើអ្នកបានអញ្ជើញព្រះគ្រីស្ទឲ្យយាងចូលមកក្នុងជីវិតរបស់អ្នក ហើយធ្វើឲ្យអ្នកក្លាយជាកូនព្រះឬទេ?
ប្រសិនបើអ្នកបានអញ្ជើញទ្រង់ ហេតុអ្វីបានជាអ្នកជ្រើសរើសអញ្ជើញទ្រង់? បើអ្នកមិនបានអញ្ជើញទ្រង់ទេ តើអ្នកចង់ដឹងពីរបៀបអញ្ជើញទ្រង់ដែរឬទេ?
មូលដ្ឋាននៃទំនាក់ទំនងរបស់អ្នកជាមួយព្រះ
មនុស្សជាច្រើនគិតថា មនុស្សម្នាក់ក្លាយជាគ្រីស្ទបរិស័ទដោយអាស្រ័យលើទីកន្លែងដែលគាត់កើត លក្ខណៈរបស់គាត់ ឬអ្វីដែលគាត់បានធ្វើសម្រាប់ព្រះ។ ប៉ុន្តែ ព្រះគម្ពីរចែងថា អ្នកក្លាយជាគ្រីស្ទបរិស័ទ ដែលជាអ្នកដើរតាមព្រះគ្រីស្ទ ដោយសារជំនឿ គឺដោយទទួលយកនូវអ្វីដែលព្រះបានធ្វើសម្រាប់អ្នក តាមរយៈព្រះយេស៊ូវគ្រីស្ទ។
យោងតាម កូល៉ុស ១:២១-២២ មុនពេលព្រះយេស៊ូវបានសង្គ្រោះអ្នក តើអ្នកមានស្ថានភាពបែបណាខ្លះចំពោះព្រះ?
កូល៉ុស ១:២១-២២
រីឯអ្នករាល់គ្នា ដែលពីដើមត្រូវពង្រាត់ចេញ ហើយជាខ្មាំងសត្រូវក្នុងគំនិត ដោយអំពើអាក្រក់នោះ ឥឡូវនេះវិញ ទ្រង់បានផ្សះផ្សាក្នុងរូបសាច់ទ្រង់ ដោយបានទទួលសុគត ដើម្បីនឹងថ្វាយអ្នករាល់គ្នាជាដង្វាយបរិសុទ្ធ ឥតសៅហ្មង ហើយឥតកន្លែងបន្ទោសបាន នៅចំពោះទ្រង់
តើព្រះបានធ្វើអ្វីខ្លះដើម្បីធ្វើឲ្យអ្នកអាចមានទំនាក់ទំនងជាមួយទ្រង់?
តើព្រះមានទស្សនៈយ៉ាងណាចំពោះអ្នកឥឡូវនេះ?
នៅពេលដែលយើងយល់ពីអ្វីដែលព្រះបានធ្វើសម្រាប់យើង វាប៉ះពាល់ដល់ទំនាក់ទំនងរបស់យើងជាមួយទ្រង់។ គម្ពីរ អេភេសូរ ២:៤-៥, ៨-៩ បង្ហាញពីការលើកលែងទោសរបស់ព្រះ និងព្រះអំណោយទានរបស់ទ្រង់ ដែលព្រះអង្គប្រទានឲ្យយើងមានទំនាក់ទំនងជាមួយទ្រង់។
អេភេសូរ ២:៤-៥, ៨-៩
ប៉ុន្តែ ព្រះដែលទ្រង់មានសេចក្ដីមេត្តាករុណាដ៏លើសលប់ ដោយព្រោះសេចក្ដីស្រឡាញ់ជាខ្លាំង ដែលទ្រង់មានដល់យើងរាល់គ្នា ក្នុងកាលដែលយើងនៅស្លាប់ក្នុងការរំលងនៅឡើយ នោះទ្រង់បានប្រោសឲ្យយើងរាល់គ្នាបានរស់ ជាមួយនឹងព្រះគ្រីស្ទ គឺដោយព្រះគុណ ដែលអ្នករាល់គ្នាបានសង្គ្រោះ . . .
ដ្បិតគឺដោយព្រះគុណ ដែលអ្នករាល់គ្នាបានសង្គ្រោះ ដោយសារសេចក្ដីជំនឿ ហើយសេចក្ដីនោះក៏មិនមែនកើតពីអ្នករាល់គ្នាដែរ គឺជាអំណោយទានរបស់ព្រះវិញ ក៏មិនមែនដោយការប្រព្រឹត្តដែរ ក្រែងអ្នកណាអួតខ្លួន
តើព្រះអំណោយទានរបស់ទ្រង់ជាអ្វី ហើយតើព្រះអំណោយទាននេះបង្ហាញអ្វីខ្លះមកកាន់អ្នក អំពីព្រះហឫទ័យរបស់ព្រះចំពោះអ្នក?
តើព្រះមានបន្ទូលថា អ្នកមានតួនាទីអ្វី ដើម្បីធ្វើឲ្យទំនាក់ទំនងនោះអាចកើតឡើងបាន?
តើអ្នកគិតថាការមានជំនឿលើព្រះយេស៊ូវដើម្បីសង្គ្រោះអ្នកមានន័យដូចម្តេច?
ឧបមាថា អ្នកឈរនៅចំពោះព្រះ ហើយទ្រង់សួរអ្នកថា «ហេតុអ្វីបានជាយើងគួរឲ្យអ្នកចូលរួមជាមួយយើងនៅស្ថានសួគ៌ ?» តើអ្នកនឹងឆ្លើយទៅទ្រង់វិញថាដូចម្ដេច?
តើការដឹងពីអ្វីដែលព្រះបានធ្វើចំពោះអ្នក មានឥទ្ធិពលលើចិត្តគំនិតរបស់អ្នកចំពោះទ្រង់យ៉ាងដូចម្ដេច?
ទិដ្ឋភាពចំនួនបីនៃទំនាក់ទំនងរបស់អ្នកជាមួយព្រះ
គោលបំណងរបស់ព្រះយេស៊ូវក្នុងការលះបង់ព្រះជន្មទ្រង់ គឺដើម្បីឲ្យអ្នកមានជីវិតបែបថ្មី តាមរយៈទំនាក់ទំនងរបស់អ្នកជាមួយទ្រង់។
ដោយផ្អែកលើព្រះគម្ពីរ យ៉ូហាន ១០:១០ និង ២ កូរិនថូស ៥:១៧ តើទិដ្ឋភាពពីរយ៉ាងនៃជីវិត ដែលព្រះបានធ្វើឲ្យអ្នកអាចជួបប្រទះ មានអ្វីខ្លះ?
យ៉ូហាន ១០:១០
តែឯខ្ញុំវិញ ខ្ញុំបានមក ដើម្បីឲ្យវារាល់គ្នាមានជីវិត ហើយឲ្យមានជីវិតនោះពេញបរិបូរផង
២ កូរិនថូស ៥:១៧
បានជាបើអ្នកណានៅក្នុងព្រះគ្រីស្ទ នោះឈ្មោះថាបានកើតជាថ្មីហើយ អស់ទាំងសេចក្ដីចាស់បានកន្លងបាត់ទៅ មើល គ្រប់ទាំងអស់បានត្រឡប់ជាថ្មីវិញ
តើការណ៍ទាំងនេះនឹងផ្លាស់ប្តូរអ្វីខ្លះក្នុងជីវិតប្រចាំថ្ងៃរបស់អ្នក?
ព្រះគម្ពីរសរសេរអំពីទិដ្ឋភាពទីបីនៃជីវិតថ្មីរបស់អ្នកដែលមកពីព្រះ។ សូមអាន ១ យ៉ូហាន ៥:១១-១៣។
១ យ៉ូហាន ៥:១១-១៣
នេះហើយជាសេចក្ដីបន្ទាល់នោះ គឺថា ព្រះទ្រង់បានប្រទានជីវិតដ៏នៅអស់កល្បជានិច្ចមកយើងរាល់គ្នា ហើយជីវិតនោះ គឺនៅក្នុងព្រះរាជបុត្រានៃទ្រង់ ឯអ្នកណាដែលមានព្រះរាជបុត្រា នោះក៏មានជីវិតដែរ តែអ្នកណាដែលគ្មានព្រះរាជបុត្រានៃព្រះទេ នោះគ្មានជីវិតឡើយ។ ខ្ញុំបានសរសេរសេចក្ដីទាំងនេះ ផ្ញើមកអ្នករាល់គ្នា ដែលជឿដល់ព្រះនាមព្រះរាជបុត្រានៃព្រះ ដើម្បីឲ្យអ្នករាល់គ្នាបានដឹងថា អ្នករាល់គ្នាមានជីវិតអស់កល្បជានិច្ចហើយ
ប្រសិនបើអ្នកបានសុំព្រះយេស៊ូវ ដែលជាព្រះរាជបុត្រារបស់ព្រះ ឲ្យយាងចូលមកក្នុងជីវិតរបស់អ្នក តើខគម្ពីរនេះចែងថាអ្នកមានអ្វីទៀត?
តើជីវិតដ៏អស់កល្បនេះចាប់ផ្តើមនៅពេលណា? តើវាចប់នៅពេលណា?
តើព្រះយេស៊ូវពណ៌នាអំពីជីវិតដ៏នៅអស់កល្បជានិច្ចនៅក្នុង យ៉ូហាន ១៧:៣ យ៉ាងដូចម្ដេច?
យ៉ូហាន ១៧:៣
នេះជាជីវិតដ៏នៅអស់កល្បជានិច្ច គឺឲ្យគេបានស្គាល់ដល់ទ្រង់ដ៏ជាព្រះពិតតែ១ នឹងព្រះយេស៊ូវគ្រីស្ទ ដែលទ្រង់បានចាត់ឲ្យមកផង
ទំនាក់ទំនងដែលអ្នកចាប់ផ្តើមជាមួយព្រះគឺនៅអស់កល្បជានិច្ច ហើយបន្តជារៀងរហូត ដោយឆ្លងកាត់គ្រាលំបាក និងសូម្បីតែការស្លាប់ខាងរូបកាយ។ វាគឺជាទំនាក់ទំនងដ៏អស្ចារ្យបំផុតដែលអ្នកអាចមាន ហើយអ្នកអាចពឹងផ្អែកលើទំនាក់ទំនងនោះ។
ភាពប្រាកដច្បាស់ក្នុងទំនាក់ទំនងរបស់អ្នកជាមួយព្រះ
ការជឿទុកចិត្តគឺជាធាតុដ៏សំខាន់នៅក្នុងទំនាក់ទំនង។ ជំនឿគ្រីស្ទបរិស័ទគឺផ្អែកលើជំនឿ ប៉ុន្តែព្រះគម្ពីរចែងយ៉ាងច្បាស់ថា អ្នកអាចដឹងថាទំនាក់ទំនងរបស់អ្នកជាមួយព្រះគឺមានសុវត្ថិភាព។ សូមក្រឡេកមើលប្រយោគដែលបានគូសបញ្ជាក់នៅក្នុងព្រះគម្ពីរ ១ យ៉ូហាន ៥:១៣។
១ យ៉ូហាន ៥:១៣
ខ្ញុំសរសេរសេចក្ដីនេះមកអ្នករាល់គ្នា ដើម្បីឲ្យអ្នករាល់គ្នាដឹងថា អ្នករាល់គ្នាដែលជឿលើព្រះនាមព្រះបុត្រារបស់ព្រះជាម្ចាស់ មានជីវិតអស់កល្បជានិច្ចហើយ។
ដោយសារអ្នកបានសុំព្រះយេស៊ូវឲ្យយាងមកគង់ក្នុងជីវិតរបស់អ្នកដោយជំនឿ តើព្រះសន្យាថាអ្នកអាចដឹងអ្វីយ៉ាងប្រាកដ?
បើអ្នកត្រូវស្លាប់នៅយប់នេះ តើអ្នកប្រាកដចិត្តយ៉ាងណាថា អ្នកនឹងចំណាយពេលអស់កល្បជានិច្ចជាមួយព្រះ?
គ្មានទំនុកចិត្តទាល់តែសោះ ០% ––––> ១០០% ដឹងប្រាកដណាស់
នៅពេលព្រះប្រទានឲ្យយើងនូវព្រះបន្ទូលសន្យាក្នុងព្រះគម្ពីរ យើងអាចប្រាកដថាព្រះបន្ទូលសន្យាទាំងនោះជាការពិតដោយសារព្រះមិនកុហកទេ។ ព្រះបន្ទូលសន្យារបស់ទ្រង់នឹងបង្កើតមូលដ្ឋានគ្រឹះដ៏រឹងមាំសម្រាប់ទំនាក់ទំនងរបស់អ្នក។
ហេព្រើរ ១៣:៥-៦ ជាព្រះបន្ទូលសន្យាដ៏អស្ចារ្យមួយទៀត ដែលបង្ហាញពីការប្ដេជ្ញានៃព្រះហឫទ័យរបស់ព្រះចំពោះអ្នក។
ហេព្រើរ ១៣:៥-៦
ដ្បិតទ្រង់មានបន្ទូលថា «អញនឹងមិនចាកចេញពីឯង ក៏មិនបោះបង់ចោលឯងឡើយ» បានជាយើងរាល់គ្នាអាចនឹងនិយាយ ដោយក្លាហានថា «ខ្ញុំមិនព្រមខ្លាចឡើយ ព្រោះព្រះអម្ចាស់ទ្រង់ជាជំនួយខ្ញុំ តើមនុស្សនឹងធ្វើដល់ខ្ញុំជាយ៉ាងណាបាន»។
តើព្រះប្រទានការធានាអ្វីដល់អ្នក នៅក្នុងខគម្ពីរនេះ?
តើការស្គាល់សេចក្ដីពិតនេះនឹងជះឥទ្ធិពលដល់ទំនាក់ទំនងរបស់អ្នកជាមួយព្រះជាបន្តបន្ទាប់យ៉ាងដូចម្ដេច?
ប្រហែលជាមានពេលខ្លះដែលពិបាកសម្រាប់អ្នកដើម្បីមានអារម្មណ៍ថា ព្រះគង់នៅជាមួយអ្នក ប៉ុន្តែទំនាក់ទំនងរបស់អ្នកជាមួយព្រះគឺផ្អែកលើព្រះបន្ទូលសន្យាដ៏គួរឲ្យទុកចិត្តរបស់ទ្រង់ មិនមែនអារម្មណ៍របស់អ្នកទេ។
តើព្រះគម្ពីរ រ៉ូម ៨:៣៨-៣៩ អាចលើកទឹកចិត្តអ្នកយ៉ាងដូចម្ដេច ប្រសិនបើអ្នកចាប់ផ្តើមសង្ស័យមិនប្រាកដថាព្រះគ្រីស្ទគង់នៅក្នុងជីវិតរបស់អ្នក?
រ៉ូម ៨:៣៨-៣៩
ដ្បិតខ្ញុំជឿជាក់ថា ទោះស្លាប់ ឬរស់ ពួកទេវតា ឬអំណាចអ្វី ការអ្វីនៅជាន់នេះ ឬទៅមុខ ឬឥទ្ធិឫទ្ធិអ្វី ទីមានកំពស់ ទីជំរៅ ឬរបស់អ្វីដែលកើតមកឯទៀតក្តី នោះពុំអាចនឹងពង្រាត់យើង ចេញពីសេចក្ដីស្រឡាញ់របស់ព្រះ ដែលនៅក្នុងព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នាទៅ បានឡើយ។
ព្រះក៏ពណ៌នាអំពីទំនាក់ទំនងរបស់យើងជាមួយនឹងព្រះយេស៊ូវថាជាការថែទាំ និងការការពារមួយដែរ។ នៅក្នុងព្រះគម្ពីរ យ៉ូហាន ១០:២៧-២៩ ព្រះយេស៊ូវត្រូវបានពិពណ៌នាថាជាអ្នកគង្វាលដែលធានាសុវត្ថិភាពនៃចៀមរបស់ទ្រង់។
យ៉ូហាន ១០:២៧-២៩
ចៀមខ្ញុំទាំងប៉ុន្មានវាស្តាប់ខ្ញុំ ហើយមកតាម ខ្ញុំក៏ស្គាល់វាដែរ ខ្ញុំឲ្យជីវិតអស់កល្បជានិច្ចដល់វា វាមិនត្រូវវិនាសនៅអស់កល្បរៀងទៅ ក៏គ្មានអ្នកណាឆក់យកវាពីដៃខ្ញុំបានទេ ព្រះវរបិតានៃខ្ញុំ ដែលប្រទានវាមកខ្ញុំ ទ្រង់ធំលើសជាងទាំងអស់ គ្មានអ្នកណាអាចនឹងឆក់យកវាចេញពីព្រះហស្តរបស់ព្រះវរបិតាខ្ញុំបានឡើយ
តើព្រះយេស៊ូវមានបន្ទូលអ្វីខ្លះអំពីការប្តេជ្ញាចិត្តរបស់ទ្រង់ចំពោះអ្នក ?
តើសន្តិសុខនៃទំនាក់ទំនងរបស់អ្នកជាមួយព្រះពឹងផ្អែកលើអ្នកណា?
គំនិតសង្ខេប និងជំហានឆ្ពោះទៅមុខ
តើសេចក្ដីពិតមួយណាដែលយើងបានស្វែងយល់ បានប៉ះពាល់ចិត្តរបស់អ្នកខ្លាំងជាងគេនៅថ្ងៃនេះ?
តើមាននរណាម្នាក់ដែលអ្នកអាចចែករំលែកសេចក្ដីពិតនោះជាមួយ នៅក្នុងសប្តាហ៍នេះទេ?
ផ្អែកលើអត្ថបទគម្ពីរទាំងនេះ តើមានអ្វីដែលអ្នកចង់បញ្ចូលនៅពេលនិយាយអំពីអត្ថន័យនៃការក្លាយជាគ្រីស្ទបរិស័ទដែរឬទេ?
នៅពេលយើងបញ្ចប់ សូមអរព្រះគុណទ្រង់ចំពោះសេចក្តីពិតទាំងនេះ អំពីអ្វីដែលទ្រង់បានធ្វើសម្រាប់យើង។
នៅសប្តាហ៍នេះ អ្នកអាចទទួលបានការលើកទឹកចិត្តដោយមើលអំពីអត្ថប្រយោជន៍បន្ថែមទៀតនៃទំនាក់ទំនងរបស់អ្នកជាមួយព្រះ។ ជារៀងរាល់ថ្ងៃ សូមអានអត្ថបទគម្ពីរមួយ ហើយគិតអំពីអ្វីដែលព្រះបានប្រទានដល់អ្នក និងរបៀបដែលវាប៉ះពាល់ដល់ជីវិតរបស់អ្នក។ សូមសរសេរអ្វីដែលអ្នករកឃើញ បន្ទាប់មកអរព្រះគុណព្រះសម្រាប់ព្រះអំណោយទានរបស់ទ្រង់។ ដើម្បីជួយអ្នកចងចាំសេចក្តីពិតសំខាន់ៗទាំងនេះជារៀងរាល់ថ្ងៃ សូមជ្រើសរើសខគម្ពីរមួយចំនួនដើម្បីទន្ទេញចងចាំ។
យ៉ូហាន ៣:១៦-១៨
ដ្បិតព្រះទ្រង់ស្រឡាញ់មនុស្សលោក ដល់ម៉្លេះបានជាទ្រង់ប្រទានព្រះរាជបុត្រាទ្រង់តែ១ ដើម្បីឲ្យអ្នកណាដែលជឿដល់ព្រះរាជបុត្រានោះ មិនត្រូវវិនាសឡើយ គឺឲ្យមានជីវិតអស់កល្បជានិច្ចវិញ ពីព្រោះព្រះទ្រង់មិនបានចាត់ព្រះរាជបុត្រាទ្រង់ ឲ្យមកក្នុងលោកីយ ដើម្បីនឹងជំនុំជំរះលោកីយនោះទេ គឺឲ្យលោកីយបានសង្គ្រោះ ដោយសារទ្រង់វិញ ឯអ្នកណាដែលជឿដល់ទ្រង់ នោះមិនជាប់មានទោសទេ តែអ្នកណាដែលមិនជឿវិញ នោះត្រូវមានទោសហើយ ពីព្រោះមិនបានជឿដល់ព្រះនាមនៃព្រះរាជបុត្រាតែ១របស់ព្រះ
អេភេសូរ ១:៧-៨
ហើយយើងបានសេចក្ដីប្រោសលោះនៅក្នុងព្រះរាជបុត្រានោះ ដោយសារព្រះលោហិតទ្រង់ គឺជាសេចក្ដីប្រោសឲ្យរួចពីទោស តាមព្រះគុណដ៏ធ្ងន់ក្រៃលែងនៃទ្រង់ ដែលបានផ្តល់មកយើងជាបរិបូរ ដោយនូវប្រាជ្ញា នឹងដំរិះសព្វគ្រប់
យ៉ូហាន ៥:២៤
ប្រាកដមែន ខ្ញុំប្រាប់អ្នករាល់គ្នាជាប្រាកដថា អ្នកណាដែលស្តាប់ពាក្យខ្ញុំ ហើយជឿដល់ព្រះអង្គ ដែលចាត់ឲ្យខ្ញុំមក អ្នកនោះមានជីវិតដ៏នៅអស់កល្បជានិច្ច ហើយមិនដែលត្រូវជំនុំជំរះឡើយ គឺបានកន្លងហួសពីសេចក្ដីស្លាប់ ទៅដល់ជីវិតវិញ
កូល៉ុស ១:១៣-១៤
ទ្រង់បានប្រោសឲ្យយើងរួចពីអំណាចនៃសេចក្ដីងងឹត ហើយផ្លាស់យើងមកក្នុងនគររបស់ព្រះរាជបុត្រាស្ងួនភ្ងានៃទ្រង់ យើងរាល់គ្នាមានសេចក្ដីប្រោសលោះក្នុងព្រះរាជបុត្រានោះ គឺជាសេចក្ដីផ្តាច់បាប ដោយសារព្រះលោហិតទ្រង់
១ ពេត្រុស ១:៣-៥
សូមសរសើរដល់ព្រះដ៏ជាព្រះវរបិតានៃព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នា ដែលទ្រង់បានបង្កើតយើងឡើងជាថ្មី តាមសេចក្ដីមេត្តាករុណាដ៏ធំរបស់ទ្រង់ ដើម្បីឲ្យយើងរាល់គ្នាបានសេចក្ដីសង្ឃឹមដ៏រស់ ដោយសារព្រះយេស៊ូវគ្រីស្ទ ទ្រង់រស់ពីស្លាប់ឡើងវិញ ហើយឲ្យយើងបានមរដក ដែលមិនចេះពុករលួយ ក៏ឥតសៅហ្មង ហើយមិនដែលស្រពោនឡើយ ជាមរដក ដែលបំរុងទុកឲ្យយើងរាល់គ្នានៅស្ថានសួគ៌ គឺឲ្យយើងរាល់គ្នា ដែលព្រះចេស្តានៃព្រះកំពុងតែថែរក្សា ដោយសារសេចក្ដីជំនឿ សំរាប់ឲ្យបានសេចក្ដីសង្គ្រោះ ដែលប្រុងប្រៀបនឹងសំដែងមកនៅជាន់ក្រោយបង្អស់នោះ
១ ពេត្រុស ៣:១៨
ព្រោះព្រះគ្រីស្ទទ្រង់បានរងទុក្ខម្តង ដោយព្រោះបាបដែរ គឺជាព្រះដ៏សុចរិត ទ្រង់រងទុក្ខជំនួសមនុស្សទុច្ចរិត ដើម្បីនឹងនាំយើងរាល់គ្នាទៅដល់ព្រះ ដោយទ្រង់ត្រូវគេធ្វើគុតខាងសាច់ឈាម តែបានព្រះវិញ្ញាណប្រោសឲ្យរស់វិញ