អ្នកជាមនុស្សដែលបានកើតជាថ្មីនៅក្នុងអង្គព្រះគ្រីស្ទ ជាមួយនឹងអត្តសញ្ញាណថ្មី! អ្នកមានរឿងរ៉ាវមួយ ដែលអ្នកអាចប្រាប់ពីរបៀបដែលការផ្លាស់ប្រែនោះបានកើតឡើង ព្រមទាំងលទ្ធផលដែលការផ្លាស់ប្រែនោះបានបង្កើតឡើងនៅក្នុងជីវិតរបស់អ្នក។

ក្នុងគម្ពីរម៉ាកុស យើងអានអំពីបុរសម្នាក់ដែលជីវិតរបស់គាត់បានផ្លាស់ប្តូរយ៉ាងខ្លាំង ពេលគាត់បានស្គាល់ព្រះយេស៊ូវ។ ព្រះយេស៊ូវបានសង្គ្រោះគាត់ ហើយបានរំដោះគាត់ចេញពីអ្វីដែលចាប់គាត់ជាទាសករ។ សូមអាន ម៉ាកុស ៥:១-២០។

ម៉ាកុស ៥:១-២០

នោះក៏មកដល់ស្រុកគេរ៉ា‌ស៊ីន នៅត្រើយសមុទ្រម្ខាង កាលទ្រង់បានយាងឡើងពីទូក ស្រាប់តែមានមនុស្សម្នាក់ដែលមានអារក្ស‌អសោចិ៍ចូល វាចេញពីក្នុងផ្នូរខ្មោចមកចួបនឹងទ្រង់ វានៅតែក្នុងផ្នូរខ្មោច ឥតមានអ្នកណាអាចនឹងចងវាជាប់ទៀតបានទេ ទោះបើយកច្រវាក់ទៅដាក់ ក៏ពុំបានផង ដ្បិតគេបានដាក់ខ្នោះដាក់ច្រវាក់វាជាច្រើនដងហើយ ប៉ុន្តែវាចេះតែកាច់ច្រវាក់បំបាក់ខ្នោះចោលអស់ ហើយគ្មានអ្នកណាអាចនឹងកំរាបវាបានដែរ វានៅក្នុងផ្នូរនៅលើភ្នំ ទាំងស្រែក ហើយយកថ្មមកអារសាច់ខ្លួន ទាំងយប់ទាំងថ្ងៃជានិច្ច កាលវាឃើញព្រះ‌យេស៊ូវពីចំងាយ ក៏រត់ទៅក្រាបសំពះទ្រង់ ស្រែកដោយសំរែកជាខ្លាំងថា ឱព្រះ‌យេស៊ូវ ជាព្រះ‌រាជ‌បុត្រាព្រះដ៏ខ្ពស់បំផុតអើយ តើទ្រង់ហើយនឹងទូលបង្គំមានរឿងអ្វីនឹងគ្នា ទូលបង្គំសូមទ្រង់ឲ្យស្បថដោយព្រះថា មិនធ្វើទុក្ខទូលបង្គំទេ វាទូលដូច្នោះ ពីព្រោះទ្រង់កំពុងតែមានបន្ទូលថា ម្នាល អារក្ស‌អសោចិ៍ ចូរថយចេញពីមនុស្សនេះទៅ រួចទ្រង់សួរវាថា ឯងឈ្មោះអី វាទូលឆ្លើយថា ទូលបង្គំឈ្មោះ «កង‌ទ័ព» ពីព្រោះយើងខ្ញុំមានគ្នាច្រើន នោះវាទទូចអង្វរសូមកុំឲ្យទ្រង់បណ្តេញវារាល់គ្នាចេញពីស្រុកនោះឡើយ រីឯនៅទីនោះ មានហ្វូងជ្រូកយ៉ាងធំ កំពុងតែរកស៊ីនៅចង្កេះភ្នំ ហើយអារក្សទាំងនោះទូលអង្វរទ្រង់ថា សូមឲ្យយើងរាល់គ្នាទៅជ្រក នៅក្នុងជ្រូកទាំងនោះចុះ នោះទ្រង់ក៏អនុញ្ញាតឲ្យភ្លាម រួចកាលវិញ្ញាណអារក្ស‌អសោចិ៍ទាំងនោះបានចេញហើយ វាក៏ចូលទៅក្នុងជ្រូក ហើយហ្វូងជ្រូកប្រហែល២ពាន់រូប ក៏បោលម្នីម្នាតាមភ្នំចោត ធ្លាក់ទៅក្នុងសមុទ្រ លង់ទឹកស្លាប់ទាំងអស់ទៅ។

ឯពួកអ្នកគង្វាលជ្រូក គេរត់ទៅក្នុងទីក្រុង ហើយក្នុងស្រុកស្រែសា‌សព្ទប្រាប់រឿងនោះ រួចមនុស្សទាំងអស់ចេញមកមើលការដែលបានកើតឡើង គេមកឯព្រះ‌យេស៊ូវ ហើយឃើញមនុស្សដែលពីដើមមានអារក្សចូល កំពុងតែអង្គុយទាំងស្លៀក‌ពាក់ មានស្មារតីដឹងខ្លួនឡើង គឺជាអ្នកដែលមានអារក្សទាំងកងចូលនោះឯង រួចគេស្ញែងខ្លាច ពួកអ្នកដែលបានឃើញការនោះ ក៏ពណ៌នាប្រាប់ដល់ជនគ្រប់គ្នា តាមការដែលកើតឡើងដល់អ្នកនោះជាយ៉ាងណា ហើយពីដំណើរហ្វូងជ្រូកផង នោះគេចាប់តាំងទូលអង្វរ សូមឲ្យទ្រង់យាងចេញពីស្រុកគេទៅ កាលទ្រង់បានយាងចុះទូក នោះអ្នកដែលអារក្សចូលពីដើម គាត់ក៏សូមទៅជាមួយនឹងទ្រង់ តែទ្រង់មិនអនុញាតទេ ដោយបន្ទូលថា ចូរទៅផ្ទះទៅ ហើយប្រាប់បងប្អូនឯងពីការធំទាំងម៉្លេះដែលព្រះ‌អម្ចាស់បានមេត្តាប្រោសដល់ឯងវិញ គាត់ក៏ចេញទៅ ចាប់តាំងប្រកាសប្រាប់ នៅស្រុកដេកា‌ប៉ូល ពីការធំទាំងម៉្លេះ ដែលព្រះ‌យេស៊ូវបានប្រោសដល់ខ្លួន នោះមនុស្សទាំងអស់ក៏អស្ចារ្យក្នុងចិត្ត។

(អានបន្ថែម)

ការគិតពិចារណា : ទោះបីជារឿងរបស់អ្នកប្រហែលជាមិនសូវអស្ចារ្យបែបនេះក៏ដោយ តើព្រះអម្ចាស់បានសង្គ្រោះអ្នក និងផ្លាស់ប្តូរអ្នកដោយរបៀបណា?

ម៉ាកុស ៥:១៩-២០ ប្រាប់ពីចម្លើយរបស់ព្រះយេស៊ូវ នៅពេលដែលបុរសនោះសុំដើរតាមព្រះយេស៊ូវ។

ម៉ាកុស ៥:១៩-២០

តែទ្រង់មិនអនុញាតទេ ដោយបន្ទូលថា ចូរទៅផ្ទះទៅ ហើយប្រាប់បងប្អូនឯងពីការធំទាំងម៉្លេះដែលព្រះ‌អម្ចាស់បានមេត្តាប្រោសដល់ឯងវិញ គាត់ក៏ចេញទៅ ចាប់តាំងប្រកាសប្រាប់ នៅស្រុកដេកា‌ប៉ូល ពីការធំទាំងម៉្លេះ ដែលព្រះ‌យេស៊ូវបានប្រោសដល់ខ្លួន នោះមនុស្សទាំងអស់ក៏អស្ចារ្យក្នុងចិត្ត។

(អានបន្ថែម)

ការរកឃើញ : តើព្រះយេស៊ូវចង់ឲ្យបុរសនោះធ្វើអ្វី?

ដូចជាបុរសនេះដែរ អ្នកអាចប្រាប់អ្នកដទៃអំពីអ្វីដែលបានកើតឡើងនៅក្នុងជីវិតរបស់អ្នក។ អ្នកអាចចែករំលែករឿងរបស់អ្នកជាមួយអ្នកជឿ និងអ្នកមិនជឿ ដោយនិយាយទីបន្ទាល់ចំពោះកិច្ចការរបស់ព្រះនៅក្នុងជីវិតរបស់អ្នក។ ការចែករំលែកពីរបៀបដែលអ្នកបានទទួលជឿព្រះយេស៊ូវ គឺជាវិធីសាមញ្ញមួយ ដើម្បីជួយប្រាប់ដំណឹងល្អដល់នរណាម្នាក់។ នៅពេលនរណាម្នាក់បានឮរឿងរ៉ាវរបស់អ្នក វាអាចបណ្តាលឲ្យពួកគេគិតអំពីរបៀបដែលដំណឹងល្អក៏អាចមានឥទ្ធិពលលើពួកគេផងដែរ។ ទីបន្ទាល់របស់អ្នកអាចបើកទ្វារដល់ការសន្ទនាបន្ថែមទៀតអំពីព្រះ។

ការចែកចាយ : តើមានរឿងអ្វីខ្លះដែលអ្នកអាចចែករំលែកជាមួយអ្នកដទៃអំពីរបៀបដែលព្រះបានធ្វើឲ្យមានការផ្លាស់ប្តូរនៅក្នុងជីវិតរបស់អ្នក?

ទីបន្ទាល់របស់អ្នក

រាល់ពេលដែលអ្នកចែកចាយទីបន្ទាល់របស់អ្នក ព្រះវិញ្ញាណបរិសុទ្ធអាចដឹកនាំអ្នកឲ្យរំលេចនូវអ្វីមួយដែលនឹងប៉ះពាល់ចិត្តមនុស្សដែលអ្នកកំពុងនិយាយជាមួយ។ ប៉ុន្តែ ប្រសិនបើអ្នកបានគិតពីរបៀបប្រាប់សាច់រឿងរបស់អ្នកឲ្យបានច្បាស់លាស់ វានឹងជួយអ្នកឲ្យប្រាកដថា អ្នកមិនទុកចោលនូវធាតុសំខាន់ៗដែលអាចលើកទឹកចិត្តពួកគេឲ្យមករកព្រះគ្រីស្ទឡើយ។ ការនិយាយសាច់រឿងរបស់អ្នកឲ្យខ្លី (បីនាទី ឬខ្លីជាងនេះ) នឹងជួយអ្នកស្ដាប់ឲ្យបន្តផ្ចង់ចិត្តស្ដាប់ ហើយផ្តោតលើអ្វីដែលព្រះបានធ្វើ។

ការណែនាំខាងក្រោមនឹងជួយអ្នករៀបចំទីបន្ទាល់របស់អ្នក។

សូមចែករឿងរបស់អ្នកជា ៣ ផ្នែក ៖

១. ជីវិតរបស់អ្នកមុនពេលអ្នកស្គាល់ព្រះយេស៊ូវដោយផ្ទាល់។

២. របៀបដែលអ្នកទទួលព្រះយេស៊ូវជាព្រះអង្គសង្គ្រោះ។ វានឹងរួមបញ្ចូលការចែកចាយដំណឹងល្អយ៉ាងសាមញ្ញ និងច្បាស់លាស់។

៣. ជីវិតរបស់អ្នកបន្ទាប់ពីការសម្រេចចិត្តដើម្បីដើរតាមព្រះយេស៊ូវ។

[ចំណាំ៖ ប្រសិនបើអ្នកបានទទួលព្រះយេស៊ូវជាព្រះអង្គសង្គ្រោះរបស់អ្នកតាំងពីក្មេងៗមក ហើយមិនអាចនិយាយអំពីការផ្លាស់ប្តូរដែលបានកើតឡើងនៅពេលនោះ អ្នកអាចផ្តោតលើចំណុចមួយនៅពេលក្រោយក្នុងជីវិត នៅពេលអ្នកជ្រើសរើសដើរតាមព្រះយេស៊ូវបានពេញលេញ ឬបានឃើញព្រះផ្លាស់ប្តូរជីវិតរបស់អ្នក។]

ការអនុវត្ត: សូមអាន កិច្ចការ ១៦:១៦-៣៤។ សូមស្រមៃថា អ្នកគឺជាឆ្មាំគុកនៅក្រុងភីលីព ដែលចែកចាយទីបន្ទាល់របស់អ្នកជាបីផ្នែក ៖ មុនទទួលជឿ, របៀបដែលអ្នកបានទទួលជឿ, ក្រោយទទួលជឿ។ តើអ្នកនឹងនិយាយដូចម្ដេច?

របៀបរៀបចំទីបន្ទាល់របស់អ្នក

ឥឡូវនេះ សូមអានតាមរយៈការណែនាំ ហើយធ្វើការកត់ចំណាំ ដើម្បីរៀបចំទីបន្ទាល់ផ្ទាល់ខ្លួនរបស់អ្នក។

ផ្នែកទី ១ - មុនទទួលជឿ

១. សូមសម្រេចចិត្តលើប្រធានបទមួយ។ សូមជ្រើសរើសពាក្យមួយដែលពិពណ៌នាអំពីបទពិសោធរបស់អ្នក មុនពេលអ្នកបានសម្រេចចិត្តទុកចិត្ដលើព្រះយេស៊ូវជាព្រះអង្គសង្គ្រោះរបស់អ្នក។ ឬសូមប្រាប់អំពីការជាប់ស្ទះដែលអ្នកបានជួបប្រទះក្នុងជីវិតរបស់អ្នក ឬជ្រើសរើសផ្នែកមួយនៃជីវិតរបស់អ្នកដែលព្រះបានប៉ះពាល់ ឬផ្លាស់ប្តូរយ៉ាងខ្លាំង។ ឧទាហរណ៍ ៖ គំនិតអំពីខ្លួនឯង លុយ ឬសម្ភារៈនិយម ទិសដៅជីវិត គោលបំណង ការវិនិច្ឆ័យអ្នកដទៃ សារៈសំខាន់ កំហឹង ការអភ័យទោស អាពាហ៍ពិពាហ៍ ការភ័យខ្លាច ការប្រៀបធៀប ការធ្វើការងារ ភាពឯកកោ ការសង្ស័យលើខ្លួនឯង ការអាម៉ាស់ ឬកំហុស ការបដិសេធ ការច្រណែន។

ការគិតពិចារណា : តើប្រធានបទអ្វីដែលនឹងពណ៌នាអំពីជីវិតរបស់អ្នកបានត្រឹមត្រូវបំផុត មុនពេលអ្នកដើរតាមព្រះយេស៊ូវ?

២. សូមចែករំលែកពីរបៀបដែលរឿងនេះបានរារាំងអ្នកមិនឲ្យរស់នៅក្នុងជីវិតដ៏ពិត។ សូមនិយាយដោយបើកចំហ និងត្រង់ៗតាមដែលអ្នកអាចធ្វើបាន។ សូមចែករំលែកឧទាហរណ៍ខ្លីៗនៃមូលបទនេះ និងរបៀបដែលវាប៉ះពាល់ដល់ជីវិតរបស់អ្នក។

ការគិតពិចារណា : តើអ្នកអាចធ្វើការបង្ហាញពីសេចក្ដីនេះដោយរបៀបណា ដើម្បីឲ្យអ្នកស្ដាប់អាចយល់ពីបទពិសោធរបស់អ្នក?

ផ្នែកទី ២ - របៀបដែលអ្នកបានទទួលជឿ

១. សូមចែករំលែកពីអ្វីដែលបានកើតឡើង ដែលធ្វើឲ្យអ្នកចង់ចាប់ផ្តើមទំនាក់ទំនងផ្ទាល់ខ្លួនជាមួយព្រះយេស៊ូវ។ តើមានកាលៈទេសៈ ការសន្ទនា គំនិតក្នុងចិត្ត ការផ្លាស់ប្តូរទស្សនៈបន្តិចម្តងៗ ឬភ្លាមៗដែរឬទេ? សូមកុំប្រើពាក្យសាសនា ឬព្រះវិហារ ដែលនរណាម្នាក់ប្រហែលជាមិនយល់។ សូមកុំនិយាយអវិជ្ជមានអំពីព្រះវិហារ ឬសាសនាណាមួយ។ សូមផ្តោតលើជំនួបរបស់អ្នកជាមួយព្រះ។

២. សូមពន្យល់ពីរបៀបដែលមនុស្សម្នាក់ទទួលជឿលើព្រះយេស៊ូវជាព្រះអង្គសង្គ្រោះរបស់គាត់។

ក. សូមចាំថា អ្នកស្តាប់របស់អ្នកត្រូវដឹងពីរបៀបដែលព្រះបានធ្វើឲ្យយើងអាចមានផ្លូវទទួលការសង្រ្គោះ។ ចំណុចនោះត្រូវតែច្បាស់លាស់ បើមិនដូច្នោះទេ ពួកគេនឹងគិតថាអ្នកបានផ្លាស់ប្តូរដោយខ្លួនឯង ឬចាប់ផ្តើមទៅព្រះវិហារ ហើយមានជំនឿដោយខ្លួនឯង។

ខ. សូមបញ្ជាក់ឲ្យបានច្បាស់ថា ពួកគេនឹងអាចចាប់ផ្ដើមទំនាក់ទំនងផ្ទាល់ខ្លួនជាមួយនឹងព្រះយេស៊ូវដោយផ្អែកលើអ្វីដែលអ្នកបាននិយាយ។ ជាឧទាហរណ៍ «ខ្ញុំបានទទួលស្គាល់ថា ខ្ញុំគិតតែពីខ្លួនឯង និងមានអំពើបាប ប៉ុន្តែខ្ញុំគ្មានមធ្យោបាយផ្លាស់ប្តូរជីវិតរបស់ខ្ញុំទេ។ នៅពេលដែលខ្ញុំយល់ថា ព្រះយេស៊ូវបានសុគតដើម្បីបង់ថ្លៃនូវអំពើបាបរបស់ខ្ញុំ ហើយប្រទានជីវិតថ្មី នោះខ្ញុំដឹងថាខ្ញុំត្រូវការទទួលយកការលើកលែងទោស និងការសង្គ្រោះដែលទ្រង់បានប្រទានមក។

ការគិតពិចារណា : តើអ្នកគិតថាអ្នកគួររួមបញ្ចូលអ្វីខ្លះ?

ការពិភាក្សា : តើអ្នកអាចចែករំលែករឿងរបស់អ្នកតាមរបៀបណា ដើម្បីឲ្យមានប្រសិទ្ធភាពក្នុងការជួយនរណាម្នាក់ធ្វើការសម្រេចចិត្តស្រដៀងគ្នាក្នុងជីវិតរបស់គាត់?

ផ្នែកទី ៣ - បន្ទាប់ពីការទទួលជឿ

១. សូមផ្តោតលើការផ្លាស់ប្តូរដែលព្រះបាននាំមកក្នុងជីវិតរបស់អ្នក។

ក. ទាក់ទងនឹងប្រធានបទមុន តើអ្នកអាចនិយាយអំពីការផ្លាស់ប្រែដែលព្រះបានធ្វើការក្នុងជីវិតរបស់អ្នកយ៉ាងណាដែរ?

ខ. សូមចែករំលែកឧទាហរណ៍ខ្លីៗអំពីការផ្លាស់ប្រែក្នុងជីវិតរបស់អ្នក។ តើអ្នកកត់សម្គាល់ការផ្លាស់ប្តូរនេះដោយរបៀបណា? សូមនិយាយផ្សារភ្ជាប់ឧទាហរណ៍របស់អ្នក ឲ្យទាក់ទងទៅនឹងប្រធានបទដែលអ្នកបានជ្រើសរើស។

គ. សូមប្រយ័ត្ន ដែលអ្នកមិននិយាយឲ្យវាស្តាប់ទៅដូចជាអ្វីគ្រប់យ៉ាងល្អឥតខ្ចោះ ហើយអ្នកលែងមានបញ្ហាទៀតហើយ។ ការនិយាយអំពីព្រះដែលបន្តធ្វើការនៅក្នុងជីវិតរបស់អ្នក គឺជាទីបន្ទាល់ដ៏ល្អមួយអំពីការយកចិត្តទុកដាក់របស់ទ្រង់សម្រាប់អ្នក។

២. សូមនិយាយអំពីប្រយោគបញ្ចប់ខ្លី ដែលផ្សារភ្ជាប់រឿងរបស់អ្នកជាមួយគ្នា។

ការអនុវត្ត: សូមសាកល្បងចែករំលែកផ្នែកទាំងបីនៃសាច់រឿងរបស់អ្នកជាមួយគ្នា ហើយមើលថាតើអ្នកអាចធ្វើឲ្យវាមានភាពច្បាស់លាស់ ឬអត់។

ជំហានសកម្មភាព : នៅសប្តាហ៍នេះ សូមសុំព្រះឲ្យដឹកនាំអ្នក ហើយសរសេរទីបន្ទាល់របស់អ្នក។ ពេលជួបគ្នាលើកក្រោយ សូមចែករំលែកគ្នាអំពីអ្វីដែលអ្នកបានរៀបចំ។

ការប្រើប្រាស់ទីបន្ទាល់របស់អ្នកនៅក្នុងការសន្ទនាមួយ

មានមនុស្សតិចណាស់ដែលមានអារម្មណ៍ងាយស្រួលក្នុងការស្តាប់ការសន្ទនា បែបដែលមនុស្សម្នាក់និយាយតែម្នាក់ឯង។ នៅក្នុងការសន្ទនាជាមួយនរណាម្នាក់ អ្នកគួរស្តាប់ដោយប្រុងប្រយ័ត្ន និងបង្ហាញពីការយកចិត្តទុកដាក់ ការយល់ចិត្ត និងការយោគយល់។ ត្រូវដឹងថាតើមនុស្សនោះមានការបើកចិត្តចំពោះរឿងរ៉ាវខាងជំនឿ ហើយមានឆន្ទៈនិយាយអំពីរឿងខាងវិញ្ញាណឬអត់។

ការគិតពិចារណា : តើអ្នកអាចចែកចាយទីបន្ទាល់របស់អ្នកតាមរបៀបណា ដែលបង្ហាញពីការគោរពចំពោះអ្នកដទៃ?

ទីបន្ទាល់របស់អ្នកអាចសមស្របនឹងការសន្ទនាមួយ នៅពេលអ្នករកឃើញបទពិសោធរបស់អ្នក និងអ្នកស្ដាប់មានលក្ខណៈដូចគ្នា និងនិយាយពីរឿងផ្ទាល់ខ្លួនរបស់អ្នកដែលពាក់ព័ន្ធទៅនឹងអ្វីដែលពួកគេបាននិយាយ។

ឧទាហរណ៍ ៖ «បងបានរៀបរាប់ពីការជាប់ស្ទះដែលបងមាន កាលធំឡើង។ ខ្ញុំបានជួបបញ្ហាស្រដៀងគ្នាមួយចំនួនក្នុងជីវិតរបស់ខ្ញុំ។ ខ្ញុំធំដឹងក្តីក្នុងគ្រួសារដែលមិនមានឪពុក ហើយវាប៉ះពាល់ដល់របៀបដែលខ្ញុំឃើញខ្លួនឯង…»។

ក៏អាចមានពេលខ្លះដែលអ្នកកំពុងសន្ទនា ហើយអ្នកអាចសួរថា តើអ្នកអាចចែករំលែកពីរឿងរ៉ាវរបស់អ្នកជាមួយពួកគេបានដែរឬទេ។

ឧទាហរណ៍ ៖ «ជំនឿរបស់ខ្ញុំមានឥទ្ធិពលយ៉ាងសំខាន់លើទស្សនៈរបស់ខ្ញុំចំពោះជីវិត។ តើខ្ញុំអាចចែករំលែកពីរឿងរបស់ខ្ញុំបន្តិចបានទេ?»

ការអនុវត្ត ៖ សូមដើរតួសម្ដែងអំពីរបៀបដែលអ្នកនឹងដឹកនាំការសន្ទនាឲ្យចូលដល់សាច់រឿងរបស់អ្នក។ ម្នាក់ក្នុងចំណោមអ្នក សូមដើរតួជាអ្នកមិនជឿ និងម្នាក់ទៀតជាមិត្តដែលចង់ចែករំលែករឿងរបស់គាត់។ សូមស្រមៃថា អ្នកកំពុងពិភាក្សាអំពីប្រធានបទដែលទាក់ទងនឹងប្រធានបទនៅក្នុងទីបន្ទាល់របស់អ្នក ឬកំពុងមានការសន្ទនាអំពីជំនឿ។

បន្ទាប់ពីចែករំលែករឿងរបស់អ្នក

សូមសួរសំណួរមួយ ឬពីរ ដើម្បីវាយតម្លៃការឆ្លើយតបរបស់ពួកគេ។ អ្នកអាចសួរថា តើអ្វីដែលអ្នកចែករំលែក ពួកគេអាចយល់បានទេ។ សូមសួរអំពីបទពិសោធខាងសាសនា ឬខាងជំនឿ ឬការយល់ដឹងអំពីព្រះយេស៊ូវជានរណា។ ខណៈពេលដែលនេះអាចផ្តល់ឲ្យអ្នកនូវឱកាសដើម្បីពន្យល់បន្ថែមអំពីដំណឹងល្អ សូមដឹងថាពួកគេប្រហែលជាចង់ចំណាយពេលខ្លះដើម្បីគិតអំពីអ្វីដែលអ្នកបានចែករំលែក មុនពេលពួកគេត្រៀមខ្លួនដើម្បីស្តាប់បន្ថែមទៀត។ សូមព្យាយាមរក្សាការបញ្ចប់ការសន្ទនាជាមួយនឹងសំណួរដូចជា «តើបងចាប់អារម្មណ៍ក្នុងការនិយាយបន្ថែមទៀតអំពីរឿងនេះ នៅលើកក្រោយទេ?»

ការបញ្ជាក់តាមដានជាមួយអ្នកស្ដាប់ បន្ទាប់ពីអ្នកចែករំលែកទីបន្ទាល់របស់អ្នកគឺជារឿងសំខាន់។ ចូរសុំឲ្យព្រះប្រទានឱកាសឲ្យអ្នកនិយាយជាមួយពួកគេម្តងទៀត ហើយអធិស្ឋានថាពួកគេនឹងបន្តគិតអំពីអ្វីដែលអ្នកបានចែករំលែក។ សូមអនុញ្ញាតឲ្យពួកគេដឹងថាអ្នកចង់ស្តាប់បន្ថែមទៀតអំពីគំនិត និងបទពិសោធរបស់ពួកគេ។

ការបន្តឆ្ពោះទៅមុខ

ការបញ្ជាក់ : តើអ្នកមានគំនិត ឬសំណួរអ្វីខ្លះ?

ការសង្ខេប : តើអ្នកបានរៀនអ្វីខ្លះអំពីរបៀបប្រាប់រឿងរបស់អ្នកឲ្យមានភាពច្បាស់លាស់?

ការអនុវត្ត : សូមរៀបចំទីបន្ទាល់ខ្លី សង្ខេប ហើយអនុវត្តការប្រាប់ទីបន្ទាល់នោះ។

ការចែកចាយបន្ត : តើអ្នកចង់ចែកចាយទីបន្ទាល់របស់អ្នកជាមួយអ្នកណា?

សូមគិតត្រឡប់ទៅកាន់មេរៀនអំពី អត្តសញ្ញាណរបស់អ្នកនៅក្នុងព្រះគ្រីស្ទវិញ។ តើនៅក្នុងចំណោមអ្វីៗដែលអ្នកបានរកឃើញថាអ្នកជានរណានៅក្នុងព្រះគ្រីស្ទ មានន័យជាពិសេសសម្រាប់អ្នកយ៉ាងណា?

ការពង្រឹង:

នៅពេលអ្នកអានអត្ថបទគម្ពីរទាំងនេះ សូមគិតអំពីវិធីផ្សេងៗដែលព្រះឈោងចាប់ទៅមនុស្សជាមួយនឹង
សារនៃការសង្រ្គោះ។

ម៉ាកុស ២:១-១២

រំលងពីរបីថ្ងៃក្រោយមក ទ្រង់យាងចូលមកក្នុងក្រុងកាពើ‌ណិមវិញទៀត ហើយគេឮថា ទ្រង់គង់នៅផ្ទះ ស្រាប់តែមានគេប្រជុំគ្នាជាច្រើន ដល់‌ម៉្លេះបានជាគ្មានកន្លែងណាទៀតសោះ សូម្បីនៅមាត់ទ្វារក៏គ្មានដែរ ទ្រង់ក៏សំដែងព្រះ‌បន្ទូលឲ្យគេស្តាប់ គ្រានោះ មាន៤នាក់សែងមនុស្សស្លាប់ដៃស្លាប់ជើងម្នាក់មកឯទ្រង់ តែពុំអាចនឹងចូលទៅជិតទ្រង់បានឡើយ ដោយព្រោះហ្វូងមនុស្ស បានជាគេបើកដំបូលផ្ទះត្រង់កន្លែងដែលទ្រង់គង់នៅ កាលទំលុះរួចហើយ នោះក៏សំរូតគ្រែដែលមនុស្សស្លាប់ដៃស្លាប់ជើងដេកនោះចុះទៅ ព្រះ‌យេស៊ូវក៏ឃើញសេចក្ដីជំនឿរបស់អ្នកទាំងនោះ ហើយទ្រង់មានបន្ទូលទៅអ្នកស្លាប់ដៃស្លាប់ជើងថា កូនអើយ បាបរបស់ឯងបានអត់ទោសឲ្យឯងហើយ នៅទីនោះ មានអាចារ្យខ្លះអង្គុយរិះ‌គិតក្នុងចិត្តថា ហេតុអ្វីបានជាមនុស្សនេះពោលពាក្យប្រមាថដល់ព្រះដូច្នេះ ក្រៅពីព្រះតែ១ តើមានអ្នកណាអាចនឹងអត់ទោសបាបបាន តែព្រះ‌យេស៊ូវទ្រង់ជ្រាបក្នុងវិញ្ញាណទ្រង់ជា១រំពេចថា គេរិះ‌គិតក្នុងចិត្តយ៉ាងដូច្នោះ ទើបទ្រង់មានបន្ទូលទៅគេថា ហេតុអ្វីបានជាអ្នករាល់គ្នាមានគំនិតក្នុងចិត្តយ៉ាងដូច្នេះ ដ្បិតដែលនិយាយនឹងមនុស្សស្លាប់ដៃស្លាប់ជើងនេះថា បាបឯងបានអត់ទោសឲ្យឯងហើយ ឬថា ឲ្យក្រោកឡើង យកគ្រែឯងដើរទៅ នោះតើពាក្យណាងាយថាជាជាង ប៉ុន្តែ ដើម្បីឲ្យអ្នករាល់គ្នាដឹងថា នៅផែនដីនេះ កូនមនុស្សមានអំណាចនឹងអត់ទោសបាបបាន (នោះទ្រង់មានបន្ទូល ទៅមនុស្សស្លាប់ដៃស្លាប់ជើងថា) អញប្រាប់ឲ្យឯងក្រោកឡើង យកគ្រែឯងដើរទៅផ្ទះទៅ គាត់ក៏ក្រោកឡើងភ្លាម យកគ្រែចេញទៅ នៅមុខអ្នកទាំងអស់គ្នា បានជាគ្រប់គ្នាមានសេចក្ដីអស្ចារ្យ ហើយពណ៌នាសរសើរដំកើងដល់ព្រះ ដោយពាក្យថា យើងមិនដែលឃើញយ៉ាងដូច្នេះឡើយ។

(អានបន្ថែម)

យ៉ូហាន ៤:៧-៣០

មានស្ត្រីសាសន៍សាម៉ារីម្នាក់មកដងទឹក ហើយព្រះ‌យេស៊ូវមានបន្ទូលទៅនាងថា សូមឲ្យខ្ញុំផឹកផង ព្រោះពួកសិស្សទ្រង់បានទៅផ្សារអស់ ដើម្បីនឹងរកទិញស្បៀងអាហារ ស្ត្រីសាសន៍សាម៉ារីនោះក៏ទូលថា លោកជាសាសន៍យូដា ម្តេចឡើយក៏លោកសូមទឹកខ្ញុំពិសា ដែលខ្ញុំជាស្រីសាសន៍សាម៉ារីដូច្នេះ (នេះដ្បិតសាសន៍យូដាមិនដែលប្រកបនឹងសាសន៍សាម៉ារីទេ) ព្រះ‌យេស៊ូវមានបន្ទូលឆ្លើយថា បើសិនជានាងបានស្គាល់អំណោយទាននៃព្រះ នឹងអ្នកដែលនិយាយនឹងនាងថា សូមឲ្យខ្ញុំផឹកផង នោះនាងនឹងបានសូមពីអ្នកនោះវិញ រួចអ្នកនោះនឹងឲ្យទឹករស់ដល់នាង ស្ត្រីនោះក៏ទូលទ្រង់ថា លោកម្ចាស់ លោកគ្មានអ្វីនឹងដងទេ ហើយអណ្តូងក៏ជ្រៅផង ដូច្នេះ លោកបានទឹករស់នោះពីណាមក តើលោកធំជាងយ៉ាកុប ជាឰយុកោយើងខ្ញុំ ដែលឲ្យអណ្តូងនេះមកយើងខ្ញុំ ហើយទាំងខ្លួនលោក កូនចៅ នឹងហ្វូងសត្វរបស់លោក ក៏បានផឹកផងឬអី ព្រះ‌យេស៊ូវមានបន្ទូលឆ្លើយថា អស់អ្នកណាដែលផឹកទឹកនេះ នឹងត្រូវស្រេកទៀត តែអ្នកណាដែលផឹកទឹកខ្ញុំឲ្យ នោះនឹងមិនស្រេកទៀតឡើយ ទឹកដែលខ្ញុំឲ្យ នឹងត្រឡប់ជារន្ធទឹកនៅក្នុងអ្នកនោះ ដែលផុសឡើងដល់ទៅបានជីវិតអស់‌កល្បជានិច្ច ស្ត្រីនោះក៏ទូលទ្រង់ថា លោកម្ចាស់អើយ សូមឲ្យទឹកនោះមកខ្ញុំផង ដើម្បីកុំឲ្យខ្ញុំស្រេក ឬមកដងនៅទីនេះទៀត។

ព្រះ‌យេស៊ូវមានបន្ទូលថា ចូរទៅហៅប្ដីនាងមកឯណេះ ស្ត្រីនោះទូលឆ្លើយថា ខ្ញុំគ្មានប្ដីទេ រួចព្រះ‌យេស៊ូវមានបន្ទូលថា ដែលនាងថា គ្មានប្ដី នោះថាត្រូវហើយ ដ្បិតនាងបានមានប្ដី៥មកហើយ ឯអ្នកដែលនៅជាមួយសព្វថ្ងៃនេះ មិនមែនជាប្ដីនាងទេ ពាក្យនោះនាងនិយាយត្រូវប្រាកដ ស្ត្រីនោះទូលទ្រង់ថា លោកម្ចាស់អើយ ខ្ញុំយល់ឃើញថា លោកជាហោរា ឯពួកឰយុកោយើងខ្ញុំ បានថ្វាយ‌បង្គំនៅលើភ្នំនេះ តែពួកលោកថា ក្រុងយេរូ‌សាឡិមជាកន្លែងដែលត្រូវថ្វាយ‌បង្គំវិញ ព្រះ‌យេស៊ូវមានបន្ទូលថា នាងស្រីអើយ ចូរជឿខ្ញុំថា នឹងមានពេលវេលាមក ដែលអ្នករាល់គ្នានឹងមិនថ្វាយ‌បង្គំព្រះវរ‌បិតា នៅលើភ្នំនេះ ឬនៅក្រុងយេរូ‌សាឡិមទេ អ្នករាល់គ្នាមិនដឹងជាខ្លួនថ្វាយ‌បង្គំអ្វីទេ ឯយើងវិញ យើងស្គាល់ព្រះដែលយើងថ្វាយ‌បង្គំ ដ្បិតសេចក្ដីសង្គ្រោះកើតមកពីសាសន៍យូដា តែនឹងមានពេលវេលាមក ក៏នៅឥឡូវនេះហើយ នោះពួកអ្នកដែលថ្វាយ‌បង្គំដោយពិតត្រង់ គេនឹងថ្វាយ‌បង្គំព្រះវរ‌បិតា ដោយវិញ្ញាណ នឹងសេចក្ដីពិត ពីព្រោះព្រះវរ‌បិតា ទ្រង់រកពួកអ្នកយ៉ាងនោះ ឲ្យបានថ្វាយ‌បង្គំទ្រង់ ឯព្រះ ទ្រង់ជាវិញ្ញាណ ហើយអ្នកណាដែលថ្វាយ‌បង្គំទ្រង់ នោះត្រូវតែថ្វាយ‌បង្គំ ដោយវិញ្ញាណ នឹងសេចក្ដីពិតដែរ ស្ត្រីនោះទូលទ្រង់ថា ខ្ញុំដឹងហើយថា ព្រះ‌មែស្ស៊ី ដែលហៅជាព្រះ‌គ្រីស្ទ ទ្រង់នឹងយាងមក កាលណាមកហើយ នោះទ្រង់នឹងប្រាប់ឲ្យយើងខ្ញុំដឹងគ្រប់ទាំងអស់ ព្រះ‌យេស៊ូវមានបន្ទូលថា នោះគឺខ្ញុំនេះហើយ ដែលនិយាយនឹងនាង។

ខណនោះ ពួកសិស្សទ្រង់មកដល់ ក៏នឹកប្លែកពីទ្រង់មានបន្ទូលនឹងស្ត្រីនោះ ប៉ុន្តែគ្មានអ្នកណាទូលសួរថា ទ្រង់សួររកអ្វី ឬថា ទ្រង់មានបន្ទូលនឹងស្ត្រីនេះធ្វើអីនោះទេ ឯស្ត្រីនោះ នាងទុកក្អមចោល ក៏ចូលក្នុងក្រុងដំណាលប្រាប់គេថា ចូរមកមើល មានមនុស្សម្នាក់ ដែលប្រាប់ខ្ញុំពីគ្រប់អំពើទាំងអស់ ដែលខ្ញុំបានប្រព្រឹត្ត តើអ្នកនោះមិនមែនជាព្រះ‌គ្រីស្ទទេឬអី គេក៏ចេញពីទីក្រុងទៅឯទ្រង់។

(អានបន្ថែម)

កិច្ចការ ៨:២៦-៤០

នោះទេវតានៃព្រះ‌អម្ចាស់ មានបន្ទូលទៅភីលីពថា ចូរក្រោកឡើងទៅឯខាងត្បូង តាមផ្លូវដែលចុះពីក្រុងយេរូ‌សាឡិម ទៅឯក្រុងកាសា ដែលជាទីរហោ‌ស្ថានទៅ គាត់ក៏ក្រោកឡើងដើរទៅ នោះឃើញមានសាសន៍អេធីយ៉ូពីម្នាក់ ជាមនុស្សកំរៀវ ដែលមានអំណាចក្រោមព្រះ‌នាងកាន‌ដេស មហា‌ក្សត្រីដែលសោយ‌រាជ្យក្នុងស្រុកអេធីយ៉ូពី លោកជាអ្នកត្រួត‌ត្រាលើអស់ទាំងព្រះ‌រាជ‌ទ្រព្យរបស់ស្តេច ហើយបានមកឯក្រុងយេរូ‌សាឡិម ដើម្បីនឹងថ្វាយ‌បង្គំ លោកកំពុងតែជិះរថត្រឡប់ទៅវិញ ក៏មើលគម្ពីរហោរាអេសាយ ខណនោះ ព្រះ‌វិញ្ញាណទ្រង់មានបន្ទូលទៅភីលីពថា ឲ្យចូលទៅប្រកៀកនឹងរថនោះទៅ ភីលីពក៏រត់ទៅតាម ឮលោកកំពុងតែអានមើលគម្ពីរហោរាអេសាយ រួចសួរថា លោកមើលយល់ឬទេ ឯលោកក៏ឆ្លើយឡើងថា បើគ្មានអ្នកណាដឹក‌នាំខ្ញុំ នោះធ្វើដូចម្តេចឲ្យខ្ញុំយល់បាន រួចលោកក៏សូមឲ្យភីលីពឡើងជិះរថជាមួយគ្នា ឯបទគម្ពីរដែលលោកកំពុងតែមើលនោះ គឺត្រង់បទនេះថា

«ទ្រង់ត្រូវគេដឹក‌នាំទៅ ដូចជាដឹកចៀមទៅសំឡាប់ ទ្រង់មិនបានហើបព្រះ‌ឱស្ឋសោះ ដូចជាកូនចៀមដែលគ នៅមុខអ្នកកាត់រោមវា នៅគ្រាដែលទ្រង់ត្រូវបន្ទាប‌បន្ថោក នោះគេបានដកសេចក្ដីយុត្តិ‌ធម៌ចេញពីទ្រង់ទៅ តើអ្នកណានឹងថ្លែងពីព្រះ‌វង្សាទ្រង់បាន ដ្បិតគេបានដកព្រះ‌ជន្មទ្រង់ពីផែនដីចេញហើយ»

អ្នកកំរៀវនោះសួរភីលីពថា ខ្ញុំសូមសួរអ្នក តើហោរានិយាយដូច្នេះ គឺនិយាយពីអ្នកណា ពីខ្លួនលោក ឬពីអ្នកដទៃ នោះភីលីពបើកមាត់សំដែងប្រាប់ដំណឹងល្អពីព្រះ‌យេស៊ូវ ចាប់តាំងពីបទគម្ពីរនោះរៀងទៅ កាលកំពុងតែទៅតាមផ្លូវ នោះឃើញមានទីទឹក ហើយអ្នកកំរៀវនិយាយថា មើល នុ៎ះន៏ទឹក តើមានអ្វីឃាត់មិនឲ្យខ្ញុំទទួលបុណ្យជ្រមុជ‌ទឹកបាន ភីលីពឆ្លើយថា បើលោកជឿអស់ពីចិត្ត នោះទទួលបាន លោកឆ្លើយឡើងថា ខ្ញុំជឿហើយ ថាព្រះ‌យេស៊ូវគ្រីស្ទជាព្រះ‌រាជ‌បុត្រានៃព្រះ នោះលោកបង្គាប់ឲ្យបញ្ឈប់រថ រួចភីលីព នឹងអ្នកកំរៀវ ក៏ចុះទៅក្នុងទឹកទាំង២នាក់ ហើយភីលីព គាត់ធ្វើបុណ្យជ្រមុជ‌ទឹកឲ្យ លុះឡើងពីទឹកមក នោះព្រះ‌វិញ្ញាណនៃព្រះ‌អម្ចាស់ ទ្រង់ឆក់យកភីលីពបាត់ទៅ ហើយអ្នកកំរៀវមិនបានឃើញគាត់ទៀតទេ ក៏ទៅតាមផ្លូវទៅ ដោយអរសប្បាយ ឯភីលីព គេបានឃើញគាត់នៅក្រុងអាសូតវិញ គាត់ក៏ដើរទៅទាំងផ្សាយដំណឹងល្អនៅគ្រប់អស់ទាំងទីក្រុងរៀងទៅ រហូតទៅដល់ក្រុងសេសារា។

(អានបន្ថែម)

កិច្ចការ ៩:១-២២

ឯសុល គាត់នៅតែបញ្ចេញសេចក្ដីគំរាម នឹងពាក្យកំហែង ព្រមទាំងការសំឡាប់ ដល់ពួកសិស្សនៃព្រះ‌អម្ចាស់នៅឡើយ ក៏ទៅឯសំដេចសង្ឃ សូមសំបុត្រកាន់យកទៅឯសាលាប្រជុំទាំងប៉ុន្មាន នៅក្រុងដាម៉ាស ប្រយោជន៍ដើម្បី បើឃើញមានអ្នកណាខ្លះ ដែលប្រតិ‌បត្តិតាមផ្លូវនោះ ទោះប្រុសឬស្រីក្តី នោះនឹងចាប់ចងគេ នាំមកឯក្រុងយេរូ‌សាឡិម ប៉ុន្តែ កំពុងដែលគាត់ដើរតាមផ្លូវ ទៅជិតនឹងដល់ក្រុងដាម៉ាសហើយ នោះស្រាប់តែមានពន្លឺពីលើមេឃ ភ្លឺមកនៅជុំ‌វិញខ្លួន គាត់ក៏ដួលដល់ដី រួចឮសំឡេងមានបន្ទូលមកថា សុល នែសុល ហេតុអ្វីបានជាអ្នកបៀត‌បៀនដល់ខ្ញុំដូច្នេះ គាត់ទូលឆ្លើយថា ឱព្រះ‌អម្ចាស់អើយ ព្រះ‌អង្គណានុ៎ះ រួចព្រះ‌អម្ចាស់ទ្រង់តបថា ខ្ញុំនេះជាព្រះ‌យេស៊ូវ ដែលអ្នកបៀត‌បៀន អ្នកធាក់ជល់នឹងជន្លួញដូច្នេះ នោះពិបាកដល់អ្នកណាស់ នោះគាត់ក៏ញាប់‌ញ័រ ទាំងអស្ចារ្យក្នុងចិត្ត ហើយទូលថា ព្រះ‌អម្ចាស់អើយ តើទ្រង់សព្វព្រះ‌ហឫទ័យឲ្យទូលបង្គំធ្វើដូចម្តេច ព្រះ‌អម្ចាស់មានបន្ទូលថា ចូរក្រោកឡើងចូលទៅក្នុងទីក្រុងទៅ នោះគេនឹងប្រាប់អ្នក ឲ្យដឹងពីការដែលអ្នកត្រូវធ្វើ ឯពួកអ្នកដែលដើរជាមួយនឹងគាត់ គេក៏ឈរស្រឡាំង‌កាំងនៅ ដោយបានឮសំឡេងមែន តែមិនឃើញអ្នកណាសោះ រួចសុលក៏ក្រោកពីដីឡើង តែកាលគាត់បើកភ្នែកហើយ នោះមើលមិនឃើញអ្វីទេ គេក៏ដឹកដៃគាត់នាំទៅឯដាម៉ាស ក្នុងរវាង៣ថ្ងៃ គាត់មើលមិនឃើញឡើយ ក៏មិនបរិភោគអ្វីផង។

រីឯនៅក្រុងដាម៉ាស នោះមានសិស្សម្នាក់ឈ្មោះអាន៉្នានាស ហើយព្រះ‌អម្ចាស់ទ្រង់មានបន្ទូលហៅគាត់ ក្នុងការជាក់ស្តែងថា នែ អាន៉្នានាសអើយ គាត់ទូលឆ្លើយថា ព្រះ‌ករុណាវិសេសព្រះ‌អម្ចាស់ ព្រះ‌អម្ចាស់មានបន្ទូលថា ចូរក្រោកឡើង ទៅឯផ្លូវដែលហៅថា ផ្លូវត្រង់ ហើយរកមនុស្សម្នាក់ឈ្មោះសុល ជាអ្នកស្រុកតើ‌សុស នៅក្នុងផ្ទះយូដាស ដ្បិតមើល គាត់កំពុងតែអធិស្ឋាន ហើយក្នុងការជាក់ស្តែង គាត់បានឃើញថា មានមនុស្សម្នាក់ឈ្មោះអាន៉្នានាស ចូលមកដាក់ដៃលើគាត់ ឲ្យបានភ្លឺភ្នែកឡើង អាន៉្នានាសទូលឆ្លើយថា ព្រះ‌អម្ចាស់អើយ ទូលបង្គំបានឮមនុស្សជាច្រើន និយាយពីការអាក្រក់ទាំងប៉ុន្មាន ដែលអ្នកនោះបានប្រព្រឹត្ត ដល់ពួកបរិសុទ្ធរបស់ទ្រង់ នៅក្រុងយេរូ‌សាឡិម ហើយនៅទីនេះ គាត់ក៏មានអំណាចពីពួកសង្គ្រាជ អាចនឹងទៅចាប់ចងនូវអស់អ្នកណា ដែលអំពាវ‌នាវដល់ព្រះ‌នាមទ្រង់ដែរ ប៉ុន្តែព្រះ‌អម្ចាស់មានបន្ទូលថា ចូរទៅចុះ ពីព្រោះអ្នកនោះជាប្រដាប់រើសតាំងដល់ខ្ញុំ សំរាប់នឹងប្រកាសឈ្មោះខ្ញុំ ដល់ពួកសាសន៍ដទៃ នឹងពួកស្តេច ហើយនឹងពួកកូនចៅសាសន៍អ៊ីស្រាអែលផង ដ្បិតខ្ញុំនឹងបង្ហាញ ឲ្យគាត់ដឹងជាត្រូវរងទុក្ខលំបាកទាំងអម្បាល‌ម៉ាន ដោយព្រោះឈ្មោះខ្ញុំ ដូច្នេះ អាន៉្នានាសក៏ទៅ ហើយចូលក្នុងផ្ទះនោះ ដាក់ដៃលើគាត់ និយាយថា អ្នកសុលអើយ ព្រះ‌អម្ចាស់ គឺព្រះ‌យេស៊ូវ ដែលលេចមកឲ្យអ្នកឃើញតាមផ្លូវ ទ្រង់បានចាត់ខ្ញុំមក ដើម្បីឲ្យអ្នកបានភ្លឺភ្នែក ហើយឲ្យអ្នកបានពេញជាព្រះ‌វិញ្ញាណបរិសុទ្ធ ស្រាប់តែមានដូចជាស្រកាជ្រុះចុះពីភ្នែកគាត់មក ហើយគាត់ក៏បានភ្លឺជា១រំពេច រួចក្រោកឡើងទទួលបុណ្យជ្រមុជ‌ទឹក ហើយក្រោយដែលគាត់បានបរិភោគ នោះក៏មានកំឡាំងឡើងវិញ។

សុលក៏នៅក្រុងដាម៉ាស ជាមួយនឹងពួកសិស្សជាយូរថ្ងៃ នោះស្រាប់តែគាត់ប្រកាសប្រាប់ពីព្រះ‌យេស៊ូវ នៅក្នុងសាលាប្រជុំទាំងប៉ុន្មានថា ទ្រង់ជាព្រះ‌រាជ‌បុត្រានៃព្រះ ឯអស់អ្នកដែលឮ ក៏មានសេចក្ដីងឿង‌ឆ្ងល់ ហើយគេនិយាយថា តើមិនមែនអ្នកនេះទេឬអី ដែលបំផ្លាញពួកអ្នកអំពាវ‌នាវដល់ព្រះ‌នាមនោះ នៅក្រុងយេរូ‌សាឡិម ហើយគាត់បានមកទីនេះ ដើម្បីនឹងចាប់ចងគេ បញ្ជូនទៅឲ្យពួកសង្គ្រាជដែរ តែសុល គាត់មានកំឡាំងកាន់តែខ្លាំងឡើង ក៏ផ្ទុញ‌ផ្ទាល់ដល់ពួកសាសន៍យូដា ដែលនៅក្រុងដាម៉ាសវិញ ដោយសំដែងបញ្ជាក់ពីព្រះ‌អង្គនេះថា ទ្រង់ជាព្រះ‌គ្រីស្ទពិតមែន។

(អានបន្ថែម)

កិច្ចការ ១០:១-៤៨

រីឯនៅក្រុងសេសារា មានមនុស្សម្នាក់ឈ្មោះកូនេ‌លាស ជាមេលើកង‌ទ័ព ដែលហៅថា កង‌ទ័ពអ៊ីតាលី ជាអ្នកគោរព ហើយកោត‌ខ្លាចដល់ព្រះ ព្រមទាំងពួកគ្រួលោកទាំងអស់ផង លោកក៏ដាក់ទានជាច្រើនដល់ពួកជន ហើយអំពាវ‌នាវដល់ព្រះជានិច្ច លោកបានឃើញការជាក់ស្តែងយ៉ាងច្បាស់ ប្រហែលជាម៉ោង៣រសៀល គឺបានឃើញទេវតានៃព្រះមកឯលោក ពោលថា កូនេ‌លាសអើយ លោកក៏សំឡឹងមើលទៅទេវតាទាំងភ័យ ហើយឆ្លើយថា ព្រះ‌អម្ចាស់អើយ តើមានការអ្វី ទេវតាប្រាប់ថា សេចក្ដីអធិស្ឋាន នឹងការដាក់ទានរបស់អ្នក បានឡើងទៅទុកជាសេចក្ដីរំឭក នៅចំពោះព្រះហើយ ដូច្នេះ ចូរអ្នកប្រើគេឲ្យទៅឯយ៉ុបប៉េ ហៅស៊ីម៉ូន ដែលមានឈ្មោះថា ពេត្រុស ឲ្យមកឥឡូវ គាត់ស្នាក់នៅផ្ទះរបស់ជាងសំឡាប់ស្បែកម្នាក់ ឈ្មោះស៊ីម៉ូន ដែលនៅក្បែរមាត់សមុទ្រ អ្នកនោះនឹងប្រាប់ឲ្យអ្នកដឹង ពីការដែលអ្នកត្រូវធ្វើជាយ៉ាងណា កាលទេវតា ដែលនិយាយមកលោក បានចេញទៅបាត់ហើយ នោះលោកហៅអ្នកបំរើ២នាក់ នឹងទាហានម្នាក់ ដែលកោត‌ខ្លាចដល់ព្រះ ពីពួកមនុស្សដែលតែង‌តែបំរើលោកឲ្យមក រួចប្រាប់រឿង‌រ៉ាវសព្វគ្រប់ ហើយប្រើឲ្យទៅឯយ៉ុបប៉េ។

ដល់ស្អែកឡើងកំពុងដែលពួកអ្នកទាំងនោះដើរទៅជិតដល់ទីក្រុងហើយ នោះពេត្រុសក៏ឡើងទៅលើដំបូលផ្ទះ ដើម្បីនឹងអធិស្ឋាន ក្នុងពេលប្រហែលជាថ្ងៃត្រង់ហើយ គាត់ក៏នឹកឃ្លានជាខ្លាំង ចង់បរិភោគ តែកំពុងដែលគេចាត់‌ចែងឲ្យ នោះគាត់លង់ស្មារតីទៅ គាត់ឃើញមេឃចំហ ហើយមានប្រដាប់ ដូចជាសំពត់កំរាលយ៉ាងធំ បានចុះមក ចងទាំង៤ជ្រុង សំរូតមកដល់ដី នៅក្នុងសំពត់នោះ មានសត្វជើង៤ សត្វព្រៃ សត្វលូនវារគ្រប់មុខ ដែលនៅលើដី នឹងសត្វហើរលើអាកាសដែរ ក៏ឮសំឡេងមានបន្ទូលមកថា ពេត្រុសអើយ ចូរក្រោកឡើងសំឡាប់ ហើយបរិភោគទៅ តែពេត្រុសប្រកែកថា ទេ ព្រះ‌អម្ចាស់ ដ្បិតទូលបង្គំមិនដែលទទួលទានអ្វី ដែលមិនស្អាតមិនបរិសុទ្ធនោះសោះ រួចឮសំឡេងនោះមកម្តងទៀតថា របស់អ្វីដែលព្រះបានសំអាតហើយ នោះកុំឲ្យអ្នករាប់ថាជាមិនស្អាតឡើយ ការនោះមានមកគ្រប់៣ដង រួចបានលើកប្រដាប់នោះ ឡើងទៅលើមេឃវិញ។

កំពុងដែលពេត្រុសនៅងោងក្នុងខ្លួន ពីន័យការជាក់ស្តែង ដែលបានឃើញនោះនៅឡើយ នោះមនុស្ស៣នាក់ ដែលកូនេ‌លាសចាត់ឲ្យមក បានសួររកផ្ទះស៊ីម៉ូន ក៏ឈរនៅមាត់ទ្វារហើយ គេកំពុងតែហៅសួរ បើមានឈ្មោះស៊ីម៉ូន ដែលហៅថា ពេត្រុស នៅផ្ទះនោះឬទេ ដូច្នេះ កំពុងដែលពេត្រុសគិតរំពឹងពីការជាក់ស្តែង នោះព្រះ‌វិញ្ញាណមានបន្ទូលមកគាត់ថា មើល មានមនុស្ស៣នាក់មករកអ្នក ចូរក្រោកឡើងចុះទៅ ហើយទៅជាមួយនឹងគេចុះ កុំប្រកាន់ឡើយ ពីព្រោះគឺខ្ញុំហើយ ដែលចាត់ឲ្យគេមក ដូច្នេះ ពេត្រុសក៏ចុះទៅទទួលគេ ដោយពាក្យថា គឺខ្ញុំនេះហើយ ដែលអ្នករាល់គ្នារក តើមានការអ្វី គេឆ្លើយឡើងថា លោកមេទ័ពកូនេ‌លាស ដែលជាមនុស្សសុចរិត ហើយកោត‌ខ្លាចដល់ព្រះ មានសាសន៍យូដាទាំងអស់ធ្វើបន្ទាល់ល្អឲ្យ លោកបានទទួលបង្គាប់នៃព្រះ ដោយ‌សារទេវតាបរិសុទ្ធ ឲ្យចាត់មកអញ្ជើញលោកគ្រូទៅឯផ្ទះលោក ដើម្បីនឹងបានស្តាប់លោកគ្រូអធិប្បាយខ្លះ ដូច្នេះ ពេត្រុសក៏អញ្ជើញគេចូលមកស្នាក់នៅសិន. . .

លុះដល់ស្អែក គាត់ក្រោកឡើង ទៅជាមួយនឹងគេ ហើយមានពួកបងប្អូនខ្លះ ដែលនៅយ៉ុបប៉េ ក៏ទៅជាមួយដែរ ដល់ស្អែកឡើង គេចូលទៅក្នុងសេសារា ឯកូនេ‌លាសក៏ទន្ទឹងមើលផ្លូវគេ បានទាំងប្រមូលញាតិសន្តាន នឹងសំឡាញ់ស្និទ្ធ‌ស្នាលរបស់លោកមកផង។ កាលពេត្រុសកំពុងតែចូលទៅ កូនេ‌លាសក៏មករាក់‌ទាក់ទទួល ដោយក្រាបថ្វាយ‌បង្គំនៅទៀបជើងគាត់ តែពេត្រុសលើកលោកឡើងដោយពាក្យថា សូមក្រោកឡើង ខ្លួនខ្ញុំជាមនុស្សដូចគ្នាដែរ នោះក៏ចូលទៅទាំងចរចាគ្នា ហើយឃើញមានមនុស្សជាច្រើនប្រជុំចាំ រួចគាត់និយាយទៅគេថា អ្នករាល់គ្នាដឹងថា មនុស្សសាសន៍យូដាគ្មានច្បាប់នឹងសេពគប់នឹងសាសន៍ដទៃ ឬនឹងចូលទៅជិតគេឡើយ តែព្រះ‌ទ្រង់បានសំដែងឲ្យខ្ញុំដឹងថា មិនត្រូវរាប់អ្នកណាថាមិនស្អាត ឬមិនបរិសុទ្ធឡើយ ហេតុនោះបានជាកាលលោកចាត់គេឲ្យទៅហៅខ្ញុំ នោះខ្ញុំបានមកដោយឥតប្រកែកសោះ ដូច្នេះ ខ្ញុំសូមសួរលោក តើលោកឲ្យខ្ញុំមកមានការអ្វី

កូនេ‌លាសឆ្លើយថា កន្លងមក៤ថ្ងៃហើយ ពេលថ្មើរណេះ កាលខ្ញុំកំពុងតែតម ហើយអធិស្ឋាននៅផ្ទះខ្ញុំ ក្នុងពេលម៉ោង៣រសៀល នោះឃើញមានម្នាក់ពាក់អាវដ៏ភ្លឺ ឈរនៅមុខខ្ញុំ ប្រាប់ថា កូនេ‌លាសអើយ ព្រះបានទទួលសេចក្ដីអធិស្ឋានរបស់អ្នកហើយ ក៏នឹកចាំពីទានរបស់អ្នកដែរ ដូច្នេះ ចូរប្រើគេឲ្យទៅឯយ៉ុបប៉េ អញ្ជើញស៊ីម៉ូន ដែលហៅថា ពេត្រុសមក លោកនោះនៅក្នុងផ្ទះរបស់ជាងសំឡាប់ស្បែក ឈ្មោះស៊ីម៉ូន នៅក្បែរមាត់សមុទ្រ កាលណាលោកបានមកដល់ នោះនឹងអធិប្បាយឲ្យអ្នកស្តាប់ ដូច្នេះ ខ្ញុំបានចាត់គេឲ្យទៅឯលោកភ្លាម ដែលលោកអញ្ជើញមកនេះក៏ល្អហើយ ឥឡូវនេះ យើងទាំងអស់នៅចំពោះព្រះ ដើម្បីនឹងស្តាប់គ្រប់ទាំងសេចក្ដី ដែលព្រះបានបង្គាប់មកលោក។

ពេត្រុសក៏បើកមាត់និយាយថា ប្រាកដមែន ខ្ញុំយល់ឃើញថា ព្រះមិនរើសមុខអ្នកណាទេ គឺនៅក្នុងគ្រប់ទាំងសាសន៍ អស់អ្នកណាដែលកោត‌ខ្លាចដល់ទ្រង់ ព្រមទាំងប្រព្រឹត្តសេចក្ដីសុចរិត នោះគាប់ដល់ព្រះ‌ហឫទ័យទ្រង់ដែរ ឯព្រះ‌បន្ទូល ដែលទ្រង់បានផ្សាយមកដល់ពួកជន‌ជាតិអ៊ីស្រាអែល ដោយប្រកាសប្រាប់ដំណឹងល្អ ជាសេចក្ដីមេត្រី ដែលមកដោយ‌សារព្រះ‌យេស៊ូវគ្រីស្ទ ដ៏ជាព្រះ‌អម្ចាស់លើទាំងអស់ នោះអ្នករាល់គ្នាដឹងស្រាប់ហើយ គឺជារឿងដែលបានថ្លែងប្រាប់ ចាប់តាំងពីស្រុកកាលី‌ឡេ ក្នុងគ្រាក្រោយដែលលោកយ៉ូហានបានប្រកាសប្រាប់ពីបុណ្យជ្រមុជ‌ទឹក ក៏ផ្សាយមកគ្រប់ក្នុងស្រុកយូដាផង គឺពីព្រះ‌យេស៊ូវ ពីស្រុកណា‌សារ៉ែត ដែលព្រះបានចាក់ព្រះ‌វិញ្ញាណបរិសុទ្ធ នឹងព្រះ‌ចេស្តាឲ្យមកសណ្ឋិតលើទ្រង់ ហើយទ្រង់បានយាងចុះឡើងធ្វើការល្អ ព្រមទាំងប្រោសឲ្យអស់អ្នក ដែលត្រូវអារក្សសង្កត់‌សង្កិនបានជាផង ដ្បិតព្រះបានគង់ជាមួយនឹងទ្រង់ ឯយើងរាល់គ្នា ជាទីបន្ទាល់ពីអស់ទាំងការដែលទ្រង់ធ្វើ នៅក្នុងស្រុករបស់ពួកសាសន៍យូដា ហើយនៅក្រុងយេរូ‌សាឡិម គេបានធ្វើគុតទ្រង់ ដោយព្យួរនៅលើឈើ តែព្រះបានប្រោសឲ្យទ្រង់រស់ឡើងវិញនៅថ្ងៃទី៣ ព្រមទាំងអនុញ្ញាតឲ្យទ្រង់សំដែងមកឲ្យឃើញផង មិនមែនឲ្យប្រជា‌ជនទាំងអស់ឃើញទេ គឺឲ្យពួកស្មរបន្ទាល់ដែលព្រះបានរើសអំពីមុនមកវិញ គឺជាពួកយើងរាល់គ្នា ដែលបានទទួលទានជាមួយនឹងទ្រង់ ក្នុងពេលក្រោយដែលទ្រង់មានព្រះ‌ជន្មរស់ពីស្លាប់ឡើងវិញ ទ្រង់ក៏ផ្តាំមកយើងរាល់គ្នា ឲ្យប្រកាសប្រាប់ដល់បណ្តាជនទាំង‌ឡាយ ហើយឲ្យធ្វើបន្ទាល់សព្វគ្រប់ថា គឺព្រះ‌អង្គនេះហើយ ដែលព្រះបានតាំងឡើង ឲ្យជំនុំ‌ជំរះដល់ទាំងមនុស្សរស់ នឹងមនុស្សស្លាប់ផង ពួកហោរាសុទ្ធតែធ្វើបន្ទាល់ពីទ្រង់ថា អស់អ្នកណាដែលជឿដល់ទ្រង់ នោះបានរួចពីបាប ដោយ‌សារព្រះ‌នាមទ្រង់។

កាលពេត្រុសកំពុងតែអធិប្បាយនៅឡើយ នោះព្រះ‌វិញ្ញាណបរិសុទ្ធក៏យាងចុះមក សណ្ឋិតលើអស់អ្នកដែលកំពុងតែស្តាប់ព្រះ‌បន្ទូល ឯពួកអ្នកជឿ ក្នុងពួកកាត់ស្បែកទាំងប៉ុន្មាន ដែលមកជាមួយនឹងពេត្រុស គេក៏មានសេចក្ដីអស្ចារ្យជាខ្លាំង ពីដំណើរដែលអំណោយទាន ជាព្រះ‌វិញ្ញាណបរិសុទ្ធ បានចាក់មកលើពួកសាសន៍ដទៃដូច្នេះដែរ ដ្បិតគេឮអ្នកទាំងនោះនិយាយភាសាដទៃ ហើយសរសើរដំកើងដល់ព្រះ នោះពេត្រុសសួរថា តើមានអ្នកណាអាចនឹងឃាត់ មិនឲ្យធ្វើបុណ្យជ្រមុជ‌ទឹកដល់អ្នកទាំងនេះបានឬទេ ដែលពួកគេបានទទួលព្រះ‌វិញ្ញាណបរិសុទ្ធដូចជាយើងដែរ គាត់ក៏បង្គាប់ឲ្យធ្វើបុណ្យជ្រមុជឲ្យគេដោយនូវព្រះ‌នាមព្រះ‌អម្ចាស់ រួចគេសូមអង្វរគាត់ ឲ្យនៅជាមួយពីរបីថ្ងៃទៀត។

(អានបន្ថែម)

កិច្ចការ ១៧:១៦-៣៤

កំពុងដែលប៉ុលចាំគេនៅក្រុងអាថែន នោះគាត់មានសេចក្ដីរំជួលក្នុងចិត្តជាខ្លាំង ដោយឃើញមានរូបព្រះនៅពេញក្នុងទីក្រុងនោះ ដូច្នេះ គាត់ក៏ជជែកពន្យល់ដល់សាសន៍យូដា នឹងពួកអ្នកដែលថ្វាយ‌បង្គំក្នុងសាលាប្រជុំគេ ហើយនៅទីផ្សារ ជាមួយនឹងអស់អ្នកដែលមកចួបនឹងគាត់រាល់តែថ្ងៃដែរ តែមានពួកអេពីគួរ នឹងពួកស្ទអ៊ីកខ្លះ ជាអ្នកប្រាជ្ញបរមត្ថ គេមកជួបនឹងគាត់ ខ្លះសួរថា តើអ្នកដែលនិយាយប៉ប៉ាច់នេះចង់ថាដូចម្តេច ខ្លះទៀតថា មើលទៅដូចជាគាត់សំដែងពីព្រះដទៃទេ ដ្បិតឮគាត់ប្រាប់គេពីព្រះ‌យេស៊ូវ ហើយពីសេចក្ដីរស់ពីស្លាប់ឡើងវិញ គេក៏នាំយកគាត់ទៅឯភ្នំអើរី‌យ៉ូសសួរថា តើយើងអាចនឹងដឹងជាសេចក្ដីបង្រៀនថ្មី ដែលអ្នកអធិប្បាយនេះជាយ៉ាងណាបានឬទេ ដ្បិតយើងបានឮអ្នកអធិប្បាយយ៉ាងប្លែកណាស់ ដូច្នេះ យើងចង់ដឹងន័យសេចក្ដីទាំងនេះដែរ រីឯពួកអ្នកនៅក្រុងអាថែន នឹងពួកអ្នកប្រទេសក្រៅដែលមកស្នាក់នៅទាំងប៉ុន្មាន គេមិនដែលបង់ពេលទំនេរនឹងធ្វើអ្វីទៀតទេ គេគិតតែពីប្រាប់ ឬស្តាប់សេចក្ដីថ្មីប៉ុណ្ណោះ។

ឯប៉ុល គាត់ឈរនៅកណ្តាលទីអើរី‌យ៉ូស សំដែងថា ឱពួកអ្នកនៅក្រុងអាថែនអើយ ក្នុងការទាំងអស់ខ្ញុំយល់ឃើញថា អ្នករាល់គ្នាឧស្សាហ៍ខ្នះ‌ខ្នែងកាន់សាសនាណាស់ ដ្បិតកំពុងដែលខ្ញុំដើរចុះឡើង មើលប្រដាប់ប្រដា ដែលអ្នករាល់គ្នាគោរពបូជា នោះខ្ញុំឃើញមានអាសនា១ ដែលមានចារិកថា «ព្រះដ៏ពុំស្គាល់» ដូច្នេះ ខ្ញុំនឹងប្រាប់ដល់អ្នករាល់គ្នាពីព្រះ ដែលអ្នករាល់គ្នាគោរពបូជា ដោយឥតស្គាល់នោះឯង ដ្បិតព្រះដែលបង្កើតលោកីយ នឹងរបស់សព្វសារពើ ព្រះ‌អង្គនោះ ទ្រង់ជាព្រះ‌អម្ចាស់នៃស្ថាន‌សួគ៌ នឹងផែនដី ទ្រង់មិនគង់នៅក្នុងវិហារដែលដៃមនុស្សបានធ្វើទេ ក៏មិនបាច់មានដៃមនុស្សបំរើទ្រង់ ដូចជាទ្រង់ត្រូវការអ្វីនោះផងដែរ ដ្បិតគឺទ្រង់ដែលផ្គត់‌ផ្គង់ដោយព្រះ‌អង្គទ្រង់ ឲ្យគ្រប់ទាំងអស់មានជីវិត មានដង្ហើមគ្រប់ជំពូក ទ្រង់បានបង្កើតមនុស្សគ្រប់សាសន៍ពីឈាមតែ១ ឲ្យបាននៅពេញលើផែនដី ព្រមទាំងសំរេចកំណត់ពេលវេលា ដែលបានតាំងជាមុន នឹងព្រំទីលំនៅរបស់គេគ្រប់គ្នា ដើម្បីឲ្យគេស្វែងរកព្រះ ក្រែងគេនឹងរកទ្រង់ឃើញ ដោយខំរាវរកមែននោះទេដឹង ទោះបើទ្រង់មិនគង់ឆ្ងាយពីយើងនិមួយៗក៏ដោយ ដ្បិត

គឺដោយ‌សារទ្រង់ហើយ ដែលយើងរាល់គ្នាបានរស់ កំរើក ហើយមាននៅផង

ដូចជាពួកអ្នកលើកកំណាព្យខ្លះរបស់អ្នករាល់គ្នា បាននិយាយដែរថា

«មនុស្សយើងជាពូជព្រះដែរ»

ដូច្នេះ បើយើងរាល់គ្នាជាពូជព្រះហើយ នោះមិនត្រូវឲ្យយើងស្មានថា ព្រះ‌ទ្រង់ដូចជាមាស ឬប្រាក់ ឬថ្ម ឬជារបស់ឆ្លាក់ តាមការរចនា តាមគំនិតរបស់មនុស្សនោះទេ ពីដើម ព្រះ‌ទ្រង់បានទតរំលងគ្រាខ្លៅល្ងង់មែន តែឥឡូវនេះ ទ្រង់ត្រាស់បង្គាប់ដល់មនុស្សទាំងអស់ នៅគ្រប់អន្លើឲ្យប្រែចិត្តវិញ ពីព្រោះទ្រង់បានដាក់កំណត់ថ្ងៃ ដែលទ្រង់នឹងជំនុំ‌ជំរះលោកីយដោយយុត្តិ‌ធម៌ ដោយ‌សារមនុស្សម្នាក់ ដែលទ្រង់បានដំរូវរួចហើយ ព្រមទាំងដាក់ភស្តុ‌តាងសំញែងយ៉ាងជាក់លាក់ ដល់មនុស្សទាំង‌ឡាយ ដោយទ្រង់ប្រោសមនុស្សនោះ ឲ្យរស់ពីស្លាប់ឡើងវិញ

កាលគេបានឮនិយាយពីមនុស្សស្លាប់រស់ឡើងវិញ នោះមានខ្លះចំអកឲ្យ ហើយខ្លះនិយាយថា យើងនឹងស្តាប់អ្នកពីដំណើរនេះម្តងទៀត ដូច្នេះ ប៉ុលក៏ចេញពីចំណោមគេទៅ តែមានមនុស្សខ្លះត្រូវចិត្តជាប់នឹងគាត់ ព្រមទាំងជឿផង ក្នុងពួកនោះមានឈ្មោះឌេវនីស ជាចៅ‌ក្រមនៅភ្នំអើរី‌យ៉ូស នឹងស្ត្រីម្នាក់ឈ្មោះដាម៉ា‌រីស ហើយនឹងអ្នកខ្លះទៀតដែរ។

(អានបន្ថែម)

Section មុន

ត្រលប់ទៅ Topic

Next Topic