ការយល់ដឹងអំពីអត្តសញ្ញាណរបស់យើងនៅក្នុងព្រះគ្រីស្ទជួយឲ្យយើងអាចរស់នៅក្នុងនាមជាមនុស្សដែលបានកើតជាថ្មីតាមដែលព្រះបានបង្កើតយើងមក។ ប៉ុន្តែ នេះគ្រាន់តែជាជំហានដំបូងប៉ុណ្ណោះ។
តើយើងគួរធ្វើយ៉ាងណានៅពេលដែលយើងឃើញថា ខ្លួនយើងរស់នៅជាជីវិតចាស់ ដោយមិនរស់នៅតាមរបៀបថ្មី? សូមពិចារណាស្ថានភាពដូចខាងក្រោម :
ចន ដកដង្ហើមធំបណ្ដើរ និយាយបណ្ដើរ «ខ្ញុំពិបាកចិត្តណាស់។ ខ្ញុំចង់ធ្វើអ្វីដែលត្រឹមត្រូវ ហើយឈប់ធ្វើអ្វីដែលខ្ញុំដឹងថាមិនគាប់ព្រះហឫទ័យព្រះ ប៉ុន្តែខ្ញុំមិនមានឆន្ទៈខ្លាំងគ្រប់គ្រាន់ទេ។ វាដូចជាមានអ្វីផ្សេងមកគ្រប់គ្រងចិត្តខ្ញុំ ហើយខ្ញុំធ្វើអ្វីដែលខ្ញុំមិនចង់ធ្វើទៅវិញ!»
ស្ទីវិនក៏និយាយថា «ខ្ញុំដឹងថាលោកចង់និយាយអ្វីហើយ។ សម្រាប់ខ្ញុំ វាជាបញ្ហានៃចិត្តគំនិតខ្ញុំ។ ខ្ញុំហាក់ដូចជាមិនអាចបញ្ឈប់ភាពអវិជ្ជមាន និងការរិះគន់បានទេ ហើយពេលខ្លះ ខ្ញុំខឹងខ្លាំងរហូតដល់ផ្ទុះកំហឹងដាក់សិស្សខ្ញុំ ហើយបន្ទាប់មកខ្ញុំមានអារម្មណ៍កាន់តែពិបាកទៅៗ»។
ពួកគេបានសួរគ្នាទៅវិញទៅមកថា «តើយើងអាចធ្វើដូចម្ដេចអំពីរឿងហ្នឹង?» «តើយើងអាចផ្លាស់ប្តូរដោយរបៀបណា?»
តើអ្នកអាចយល់ពីអារម្មណ៍របស់ចន និងស្ទីវិនដែរឬទេ?
តើអ្នកនឹងប្រាប់ពួកគេយ៉ាងណា ពីរបៀបដែលគេអាចផ្លាស់ប្ដូរបាន?
យើងជាប់ស្ទះជាមួយនឹងចរិតចាស់
នេះគឺជាការជាប់ស្ទះមួយដែលយើងទាំងអស់គ្នាប្រឈមមុខ។ លោកសាវ័កប៉ុលបានពិពណ៌នាអំពីបញ្ហានេះនៅក្នុង រ៉ូម ៧:១៨-២០ និង ២២-២៤។
រ៉ូម ៧:១៨-២០, ២២-២៤
ដ្បិតខ្ញុំដឹងថា នៅក្នុងខ្លួនខ្ញុំ គឺក្នុងសាច់ឈាមខ្ញុំ គ្មានអ្វីល្អទេ ព្រោះខ្ញុំមានចិត្តចង់ធ្វើល្អជានិច្ច ប៉ុន្តែ រកធ្វើមិនកើតសោះ ខ្ញុំមិនប្រព្រឹត្តការល្អ ដែលខ្ញុំចង់ធ្វើនោះទេ តែការអាក្រក់ដែលខ្ញុំមិនចង់ធ្វើ នោះបែរជាខ្ញុំធ្វើវិញ ដូច្នេះ បើខ្ញុំប្រព្រឹត្តការដែលខ្ញុំមិនចង់ធ្វើ នោះមិនមែនខ្ញុំដែលធ្វើការនោះទៀតទេ គឺជាបាបទេតើ ដែលនៅក្នុងខ្លួនខ្ញុំវិញ . . .
ដ្បិតតាមប៉ែកខាងក្នុង ខ្ញុំត្រេកអរចំពោះក្រិត្យវិន័យរបស់ព្រះ តែខ្ញុំឃើញមានអំណាច១ទៀត ក្នុងអស់ទាំងអវយវៈរបស់រូបកាយខ្ញុំ ដែលច្បាំងនឹងអំណាចនៃគំនិតខ្ញុំ ទាំងចាប់នាំខ្ញុំទៅជាប់ក្រោមអំណាចអំពើបាប ដែលនៅក្នុងអវយវៈនៃខ្លួនខ្ញុំទាំងប៉ុន្មានផង វេទនាណាស់ខ្ញុំ តើអ្នកណានឹងជួយឲ្យខ្ញុំរួច ពីតួសេចក្ដីស្លាប់នេះទៅបាន
ការរកឃើញ : សូមគូសបន្ទាត់ក្រោមពាក្យទាំងអស់ដែលលោកប៉ុលប្រើអំពីការអាក្រក់នៅក្នុងគាត់។ សូមគូសសម្គាល់តាមរបៀបផ្សេងៗគ្នា អំពីអ្វីដែលគាត់និយាយពីការល្អនៅក្នុងគាត់។
ការពិភាក្សា : តើអ្នកនឹងសង្ខេបពីបញ្ហារបស់លោកប៉ុលថាយ៉ាងណាដែរ?
ការរកឃើញ : តើលោកប៉ុលនិយាយថាអ្នកណាធ្វើខុស? តើលោកប៉ុលទទួលស្គាល់អត្តសញ្ញាណថ្មីរបស់គាត់នៅក្នុងព្រះគ្រីស្ទនៅត្រង់ណា នៅក្នុងអត្ថបទគម្ពីរនេះ?
ការគិតពិចារណា : តើមានអំពើបាបណាមួយដែលហាក់ដូចជាដាក់អន្ទាក់អ្នកជាប់ ឬរារាំងអ្នកពីការរស់នៅក្នុងនាមជាមនុស្សថ្មីនៅក្នុងព្រះគ្រីស្ទទេ?
ទោះបីជាលោកប៉ុលជាមនុស្សដែលបានកើតជាថ្មីក៏ដោយ ក៏គាត់នៅតែជួបប្រទះនូវអំណាចនៃអំពើបាបនៅក្នុងជីវិតរបស់គាត់ដែរ។ គាត់ចង់ធ្វើអំពើល្អ ប៉ុន្តែគាត់មិនមានសមត្ថភាពអនុវត្តទេ ដូច្នេះគាត់មានអារម្មណ៍ថាជាប់អន្ទាក់។ រូបកាយ និង «សរីរាង្គ» ឬផ្នែកនៃរូបកាយដែលរមែងស្លាប់របស់គាត់ បន្តប្រព្រឹត្តតាមរបៀបដែលវាមាន មុនពេលគាត់ទទួលជឿព្រះគ្រីស្ទ។
ការចែកចាយ : តើអ្នកមានអារម្មណ៍អន្ទះអន្ទែងដូចជាគាត់នៅក្នុងរបៀបណាមួយទេ?
យើងត្រូវបានរំដោះឲ្យមានសេរីភាពតាមរយៈព្រះគ្រីស្ទ
ការពិភាក្សា : តើអំពើបាប ឬកំហុសអាចរារាំងយើងពីការទទួលយកអត្តសញ្ញាណថ្មីរបស់យើងដោយរបៀបណា?
ការបរាជ័យក្នុងការរស់នៅក្នុងនាមជាមនុស្សដែលបានកើតជាថ្មីតាមដែលព្រះមានបន្ទូល អាចធ្វើឲ្យយើងមានអារម្មណ៍បាក់ទឹកចិត្ត។ មនុស្សមួយចំនួនឆ្លើយតបដោយការព្យាយាមកាន់តែខ្លាំង ឬបង្កើតច្បាប់ដើម្បីធ្វើតាម ប៉ុន្តែជៀសមិនរួច គេនឹងបញ្ចប់ដោយមានអារម្មណ៍ខុស និងខ្មាសអៀននៅពេលពួកគេប្រព្រឹត្តបាប។ អ្នកផ្សេងទៀតប្រហែលជាចុះចាញ់ ដោយសង្ស័យថាតើពួកគេបានសង្គ្រោះឬទេ។ លោកប៉ុលចែកចាយអំពីដំណឹងល្អសម្រាប់យើងទាំងអស់គ្នានៅក្នុង រ៉ូម ៧:២៥ និង៨:១។
រ៉ូម ៧:២៥, ៨:១
អរព្រះគុណដល់ព្រះអង្គ គឺដោយសារព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នា ដូច្នេះ ខ្លួនខ្ញុំគោរពប្រតិបត្តិតាមក្រិត្យវិន័យរបស់ព្រះ ដោយគំនិតខ្ញុំ តែខាងសាច់ឈាមខ្ញុំ នោះតាមច្បាប់របស់អំពើបាបវិញ។
ហេតុនោះ នៅជាន់នេះ អ្នកណាដែលនៅក្នុងព្រះគ្រីស្ទយេស៊ូវ នោះគ្មានទោសសោះ
ការរកឃើញ : ប្រសិនបើយើងនៅក្នុងអង្គព្រះគ្រីស្ទយេស៊ូវ តើព្រះមានបន្ទូលអ្វីខ្លះអំពីយើង ទោះបីជាយើងប្រព្រឹត្តអំពើបាប?
ការគិតពិចារណា : តើការណ៍នេះរំដោះអ្នកឲ្យមានសេរីភាពតាមរបៀបណា?
វិធីមួយទៀតដែលយើងត្រូវបានរំដោះឲ្យមានសេរីភាព គឺយើងមិនជាប់នៅក្នុងអត្តសញ្ញាណចាស់របស់យើងទេ។ យើងអាចផ្លាស់ប្តូរបាន! ដោយសារយើងរួបរួមជាមួយព្រះគ្រីស្ទ យើងចូលរួមក្នុងជ័យជម្នះរបស់ទ្រង់លើអំពើបាប ហើយអំណាចនៃអំពើបាបក្នុងជីវិតរបស់យើងត្រូវបានបំបែក។ សូមអាន រ៉ូម ៦:៦-៨។
រ៉ូម ៦:៦-៨
ដោយដឹងសេចក្ដីនេះថា មនុស្សចាស់របស់យើង បានត្រូវឆ្កាងជាមួយនឹងទ្រង់ហើយ ដើម្បីឲ្យតួអំពើបាបបានត្រូវសូន្យទៅ ប្រយោជន៍កុំឲ្យយើងនៅបំរើអំពើបាបទៀតឡើយ ដ្បិតអ្នកណាដែលស្លាប់ នោះក៏បានរាប់ជាសុចរិតរួចពីបាបហើយ បើសិនជាយើងស្លាប់ជាមួយនឹងព្រះគ្រីស្ទ នោះយើងជឿថា យើងនឹងរស់នៅជាមួយនឹងទ្រង់ដែរ
ការរកឃើញ : តើមានអ្វីដែលត្រូវបានធ្វើចំពោះចរិតចាស់របស់យើង ដើម្បីឲ្យយើងរស់នៅដោយមានជោគជ័យក្នុងព្រះគ្រីស្ទ?
ការគិតពិចារណា : តើនេះមានន័យយ៉ាងណាចំពោះអំពើបាបដែលធ្វើឲ្យអ្នកមានអារម្មណ៍ថាជាប់អន្ទាក់?
ការពិភាក្សា : តើការដែលដឹងថាអំពើបាប ទាំងពីអតីតកាល បច្ចុប្បន្នកាល ឬអនាគត លែងមានអំណាចលើអ្នក រំដោះអ្នកឲ្យមានសេរីភាពក្នុងការរស់នៅ
ខុសប្លែកពីមុនដោយរបៀបណា?
នេះជាការពន្យល់បង្ហាញពីអ្វីដែលបានកើតឡើង ៖
១. ចរិតចាស់ដែលជាប់បាប ជាទាសករនៃអំពើបាប ត្រូវបានចូលរួមជាមួយព្រះគ្រីស្ទនៅក្នុងការឆ្កាងរបស់ទ្រង់។ ការសោយទិវង្គតរបស់ព្រះគ្រីស្ទ បង់ថ្លៃបាបរបស់យើងយ៉ាងពេញលេញ ដូច្នេះអំពើបាបលែងមានការទាមទារមកលើយើងទៀតហើយ។
២. ចរិតបាបចាស់ត្រូវបានកប់ជាមួយព្រះគ្រីស្ទ។
៣. ចរិតថ្មីត្រូវបានលើកឡើងជាមួយនឹងព្រះគ្រីស្ទ។ ជ័យជម្នះរបស់ព្រះគ្រីស្ទលើសេចក្តីស្លាប់ និងអំពើបាប អនុញ្ញាតឲ្យយើងរស់នៅដោយមានសេរីភាពពីអំណាចនៃបាប។ យើងអាចបដិសេធការទាមទាររបស់អំពើបាប។
ការគិតពិចារណា : តើមានអ្វីអាចធ្វើឲ្យយើងពិបាកជឿថា យើងស្លាប់រួចផុតពីអំណាចបាប?
ការពិភាក្សា : បើចរិតចាស់របស់យើងស្លាប់ទៅ ហេតុអ្វីយើងនៅតែប្រព្រឹត្តបាប?
នៅក្នុង រ៉ូម ៦:២ លោកប៉ុលបានសុំយើងឲ្យពិចារណាថា ៖ «តើឲ្យយើង ដែលបានស្លាប់រួចផុតពីអំណាចបាប នៅតែប្រព្រឹត្តអំពើបាបតទៅទៀតដូចម្ដេចកើត?» បញ្ហាគឺថា យើងមានទម្លាប់ចាស់ ហើយយើងធ្លាប់ធ្វើជាទាសករនៃអំពើបាប។ នៅពេលដែលអំពើបាបដាស់តឿនយើងថា «បើអ្នកចង់ អ្នកត្រូវតែធ្វើ!» នោះយើងធ្វើតាមវា តាមដែលយើងបានធ្វើ ហើយព្រមតាមការល្បួងនៃអំពើបាប។
ការចែកចាយ : តើអ្នកមានអារម្មណ៍យ៉ាងណានៅពេលអ្នកឆ្លើយតបនឹងស្ថានភាព ឬមនុស្សផ្សេងៗ ជាមួយនឹងចរិតចាស់របស់អ្នក ជាជាងចរិតថ្មី?
យើងមានជម្រើសមួយចំពោះអំពើបាប
ចរិតចាស់មិនមានជម្រើសទេ ព្រោះអំពើបាបជាម្ចាស់របស់វា។ សូមសរសើរតម្កើងព្រះ ចរិតថ្មីត្រូវបានរំដោះឲ្យមានសេរីភាព។ ដោយសារយើងចូលរួមនៅក្នុងព្រះចេស្ដាប្រកបដោយជ័យជម្នះរបស់ព្រះគ្រីស្ទលើអំពើបាប នោះយើងអាចជ្រើសរើសមិនចុះចាញ់នឹងការល្បួង និងបញ្ជារបស់អំពើបាប។ សូមមើល រ៉ូម ៦:១២-១៣។ [ចំណាំ៖ «អវយវៈ» គឺជាផ្នែកនៃរាងកាយរបស់យើងដែលយើងប្រើជា «ឧបករណ៍» ឬគ្រឿងប្រើប្រាស់ដើម្បីធ្វើអ្វីដែលល្អ ឬអាក្រក់។]
រ៉ូម ៦:១២-១៣
ហេតុនេះ កុំឲ្យបាបសោយរាជ្យក្នុងរូបកាយរបស់អ្នករាល់គ្នា ដែលតែងតែស្លាប់ ដើម្បីនឹងស្តាប់តាមសេចក្ដីប៉ងប្រាថ្នារបស់បាបនោះឡើយ ក៏កុំឲ្យប្រគល់អវយវៈទាំងប៉ុន្មាន របស់អ្នករាល់គ្នាទៅក្នុងអំពើបាប ទុកដូចជាប្រដាប់ប្រដាទុច្ចរិតនោះឡើយ គឺត្រូវប្រគល់ខ្លួនទៅព្រះ ដូចជាបានរស់ពីស្លាប់នោះឡើងវិញ ហើយថ្វាយអវយវៈរបស់អ្នករាល់គ្នាទៅព្រះ ទុកដូចជាប្រដាប់ប្រដាសុចរិតផង
ការគិតពិចារណា : នៅពេលដែលអ្នកចុះចាញ់នឹងការល្បួងឲ្យប្រព្រឹត្តបាប តើអ្នកអនុញ្ញាតឲ្យអ្វីមានអំណាចនៅក្នុងជីវិតរបស់អ្នក?
ការរកឃើញ : តើយើងត្រូវធ្វើការជ្រើសរើសអ្វីខ្លះ ដើម្បីរារាំងអំពើបាបមិនឲ្យ «សោយរាជ្យ» ឬគ្រប់គ្រងលើយើង?
ការគិតពិចារណា : នៅពេលដែលអ្នកប្រព្រឹត្តបាប តើអ្នកកំពុងផ្ដល់សរីរាង្គណានៃរូបកាយរបស់អ្នកដែលពាក់ព័ន្ធនោះ ឲ្យអំពើបាបគ្រប់គ្រង? (ឧទាហរណ៍នៅពេល
អ្នកនិយាយអ្វីដែលមិនល្អ តើអ្នកបានអនុញ្ញាតឲ្យអណ្តាតរបស់អ្នកគោរពតាមអ្វី?) តើអ្នកអាចជ្រើសរើសធ្វើអ្វី ជំនួសវិញ?
ពេលយើងជួបការល្បួង នេះជាអ្វីដែលយើងអាចជ្រើសរើស ៖
១. «កុំឲ្យអំពើបាបគ្រប់គ្រង»។ ចូរបដិសេធអំពើបាប។ វាមិនមែនជាម្ចាស់របស់អ្នកទេ។
២. «សូមថ្វាយខ្លួនទៅព្រះ»។ សូមជ្រើសរើសអនុញ្ញាតឲ្យព្រះគ្រប់គ្រងអ្វីដែលអ្នកធ្វើ។
ដោយសារយើងនៅក្នុងព្រះគ្រីស្ទ ហើយបានស្លាប់រួចផុតពីអំណាចបាប នោះយើងអាចបដិសេធមិនអនុញ្ញាតឲ្យអំពើបាបគ្រប់គ្រងយើងម្តងទៀត។ ផ្ទុយទៅវិញ យើងអាចជ្រើសរើសផ្លូវរបស់ព្រះ ហើយប្រគល់ខ្លួនយើងទៅទ្រង់ ដោយពឹងផ្អែកលើអំណាចរបស់ទ្រង់ដើម្បីកម្ចាត់អំពើបាបក្នុងខ្លួនយើង ហើយបង្កើតនូវការឆ្លើយតបដ៏ត្រឹមត្រូវ។ ការជ្រើសរើសរស់នៅក្នុងនាមជាមនុស្សថ្មីក៏ប្រៀបបាននឹងការជ្រើសរើសនូវអ្វីដែលអ្នកនឹងស្លៀកពាក់ដែរ ៖ តើអ្នកនឹងស្លៀកសម្លៀកបំពាក់ចាស់ កខ្វក់ ឬរបស់ថ្មីស្អាត ដែលព្រះគ្រីស្ទបានប្រទានដល់អ្នក? សូមអាន អេភេសូរ ៤:២២-២៤។
អេភេសូរ ៤:២២-២៤
[អ្នករាល់គ្នាបានទទួលការបង្រៀននៅក្នុងអង្គព្រះយេស៊ូវ] ថាខាងឯកិរិយាប្រព្រឹត្តកាលពីដើម នោះត្រូវឲ្យអ្នករាល់គ្នាបានដោះមនុស្សចាស់ ដែលតែងតែខូចទៅ តាមសេចក្ដីប៉ងប្រាថ្នារបស់សេចក្ដីឆបោកចោលចេញ ហើយឲ្យគំនិតក្នុងចិត្តបានកែប្រែជាថ្មីឡើង ព្រមទាំងប្រដាប់ខ្លួន ដោយមនុស្សថ្មីវិញ ដែលកើតមកក្នុងសេចក្ដីសុចរិត ហើយក្នុងសេចក្ដីបរិសុទ្ធរបស់ផងសេចក្ដីពិត តាមភាពព្រះ។
ការរកឃើញ : តើអត្ថបទគម្ពីរនេះពណ៌នាអំពីជីវិតថ្មីយ៉ាងដូចម្តេច?
ការគិតពិចារណា : នៅពេលដែលអ្នកត្រូវបានល្បួងឲ្យធ្វើបាប តើអ្នកត្រូវជ្រើសរើស «បំពាក់ខ្លួនឯង» ជាមួយនឹងអ្វី?
ការរកឃើញ : តើត្រូវមានអ្វីកើតឡើងនៅក្នុងចិត្តរបស់យើង ដើម្បីជួយយើងឲ្យបំពាក់នូវជីវិតថ្មី?
ការពិភាក្សា : តើការយល់ដឹងអំពីអត្តសញ្ញាណថ្មីរបស់អ្នក ជួយអ្នកបដិសេធអំពើបាបយ៉ាងដូចម្តេច?
យើងមានទម្លាប់យូរមកហើយក្នុងការឆ្លើយតបទៅនឹងមនុស្ស និងកាលៈទេសៈផ្សេងៗជាមួយនឹង «ចរិតចាស់» របស់យើង ដូច្នេះឥឡូវនេះយើងត្រូវរៀនទម្លាប់ថ្មីៗ។ យើងធ្វើដូច្នេះដោយ «ផ្លាស់ប្រែជាថ្មីក្នុងវិញ្ញាណនៃចិត្តគំនិតយើង» ពេលយើងផ្ដោតលើជីវិតរបស់យើងឡើងវិញលើសេចក្ដីពិតនៃព្រះបន្ទូលរបស់ព្រះ។
ចូររម្លឹកខ្លួនអ្នកអំពីអត្តសញ្ញាណថាអ្នកជានរណាក្នុងព្រះគ្រីស្ទ ហើយថាអ្នកបានកើតជាថ្មីដើម្បីរស់នៅតាមរយៈព្រះចេស្ដារបស់ព្រះ «ក្នុងលក្ខណៈដូចព្រះ នៅក្នុងសេចក្ដីសុចរិត និងភាពបរិសុទ្ធដ៏ពិត»។ ការផ្តោតលើសេចក្តីពិតជួយយើងឲ្យឃើញថា ការសន្យានៃបាបគឺឥតខ្លឹមសារយ៉ាងណា ហើយយូរៗទៅ វាកាន់តែមិនគួរជាទីចង់បាន។
ព្រះប្រទានព្រះចេស្ដាដើម្បីឲ្យយើងរស់នៅជាមនុស្សថ្មី
យើងក៏ត្រូវរៀនពឹងផ្អែកលើព្រះចេស្ដារបស់ព្រះ ដើម្បីទប់ទល់នឹងអំពើបាប ហើយបំពាក់នូវចរិតថ្មី។ រ៉ូម ៨:១០-១១ ប្រាប់ពីរបៀបដែលព្រះបានប្រទានព្រះចេស្ដាដែលយើងត្រូវការ។
រ៉ូម ៨:១០-១១
ហើយបើសិនជាព្រះគ្រីស្ទសណ្ឋិតក្នុងអ្នករាល់គ្នា នោះរូបសាច់បានស្លាប់ ដោយព្រោះអំពើបាបមែន តែវិញ្ញាណមានជីវិតវិញ ដោយព្រោះសេចក្ដីសុចរិត មួយទៀត បើព្រះវិញ្ញាណនៃព្រះអង្គ ដែលបានប្រោសឲ្យព្រះយេស៊ូវរស់ពីស្លាប់ឡើងវិញ ទ្រង់សណ្ឋិតក្នុងខ្លួនអ្នករាល់គ្នា នោះព្រះអង្គនោះឯង ដែលបានប្រោសឲ្យព្រះគ្រីស្ទរស់ពីស្លាប់ឡើង ទ្រង់នឹងប្រោសរូបកាយនៃអ្នករាល់គ្នាដែលទៀងតែស្លាប់ ឲ្យមានជីវិតឡើងដែរ ដោយសារព្រះវិញ្ញាណទ្រង់ ដែលសណ្ឋិតនៅក្នុងខ្លួនអ្នករាល់គ្នា។
ការរកឃើញ : តើអ្វីជាប្រភពនៃជីវិតថ្មីនៅក្នុងអ្នក?
ការគិតពិចារណា : ព្រះមានព្រះចេស្ដាគ្រប់គ្រាន់ដើម្បីប្រោសព្រះយេស៊ូវឲ្យមានព្រះជន្មរស់ឡើងវិញ។ ឥឡូវនេះ ព្រះវិញ្ញាណទ្រង់គង់នៅក្នុងអ្នក (អេភេសូរ ១:១៣)។ តើមានអ្វីដែលរារាំងអ្នកមិនឲ្យជឿថា ទ្រង់មានឥទ្ធិពលគ្រប់គ្រាន់ដើម្បីអាចឲ្យអ្នកតទល់នឹងអំពើបាប ហើយដើរក្នុងជីវិតថ្មីឬទេ?
នៅពេលអ្នកប្រឈមមុខនឹងការល្បួង ចូរអរព្រះគុណព្រះដែលអ្នកមានជីវិតនៅក្នុងព្រះគ្រីស្ទ ហើយអំពើបាបនោះមិនមានអំណាចលើអ្នកទេ។ បន្ទាប់មក សូមថ្វាយខ្លួនអ្នកចំពោះព្រះ ហើយពឹងលើទ្រង់ដើម្បីអាចឲ្យអ្នកតទល់នឹងអំពើបាប ហើយរស់នៅក្នុងអត្តសញ្ញាណថ្មីរបស់អ្នក។
ព្រះបានប្រទានព្រះវិញ្ញាណទ្រង់គង់នៅក្នុងយើង ដើម្បីឲ្យយើងអាចរស់នៅដូចទ្រង់បានរៀបចំ។ នៅពេលយើងពិភាក្សាអំពីព្រះវិញ្ញាណបរិសុទ្ធ និងតួនាទីរបស់ទ្រង់នៅក្នុងជីវិតរបស់យើង យើងនឹងស្វែងយល់បន្ថែមអំពីរបៀបដែលទ្រង់មានជាប់ពាក់ព័ន្ធក្នុងការអនុញ្ញាតឲ្យយើងរស់នៅក្នុងនាមជាមនុស្សថ្មី។
នៅពេលដែលយើងរស់នៅក្នុងអត្តសញ្ញាណថ្មីរបស់យើង យើងនឹងចង់ប្រាប់អ្នកដទៃ អំពីអ្វីដែលព្រះបានធ្វើនៅក្នុងជីវិតរបស់យើង។ នោះគឺជាការពិភាក្សារបស់យើងសម្រាប់លើកក្រោយ។ ប៉ុន្តែថ្ងៃនេះ តើអ្នកចង់ប្រាប់អ្វីដល់ព្រះ ដើម្បីឆ្លើយតបនឹងអ្វីដែលទ្រង់បានធ្វើសម្រាប់អ្នក?
សូមចំណាយពេលពីរបីនាទីអធិស្ឋានជាមួយគ្នា ដើម្បីប្រាប់ព្រះពីគំនិតរបស់អ្នក។
ការបន្តឆ្ពោះទៅមុខ
ការបញ្ជាក់ : តើអ្នកមានគំនិត ឬសំណួរអ្វីខ្លះ?
ការសង្ខេប : ពេលឃើញខ្លួនឯងរស់នៅដូចជីវិតចាស់ តើអ្នកអាចធ្វើអ្វី?
ជំហានសកម្មភាព : តើអ្នកឃើញថាអ្នកត្រូវការអនុវត្តសេចក្ដីនេះ នៅក្នុងជីវិតរបស់អ្នកនៅត្រង់ណាខ្លះ?
ការចែកចាយ : តើអ្នកអាចចែករំលែកជំហាននៃការបំពាក់ចរិតថ្មីជាមួយអ្នកណា?
ការពង្រឹង:
នៅពេលអ្នកអានអត្ថបទគម្ពីរទាំងនេះ សូមគិតថាតើជីវិតរបស់អ្នកនឹងទៅជាយ៉ាងណា នៅពេលអ្នកជ្រើសរើសពឹងផ្អែកលើព្រះ ដើម្បីឲ្យអ្នកអាចរស់នៅក្នុងជីវិតថ្មី។
រ៉ូម ៦:១-១៤
ដូច្នេះ យើងនឹងថាដូចម្តេច តើត្រូវឲ្យយើងចេះតែប្រព្រឹត្តអំពើបាបទៅទៀត ដើម្បីឲ្យព្រះគុណបានចំរើនឡើងឬអី ទេ មិនត្រូវឡើយ ធ្វើដូចម្តេចឲ្យយើងដែលស្លាប់ខាងឯអំពើបាបហើយ បាននៅរស់ក្នុងអំពើបាបទៀតបាន តើអ្នករាល់គ្នាមិនដឹងទេឬអី ថា យើងទាំងប៉ុន្មានដែលបានទទួលបុណ្យជ្រមុជក្នុងព្រះយេស៊ូវគ្រីស្ទ នោះគឺបានទទួលជ្រមុជក្នុងសេចក្ដីសុគតនៃទ្រង់ដែរ ដូច្នេះ យើងបានត្រូវកប់ជាមួយនឹងទ្រង់ហើយ ដោយទទួលជ្រមុជក្នុងសេចក្ដីស្លាប់ ដើម្បីឲ្យយើងបានដើរក្នុងជីវិតបែបថ្មី ដូចជាព្រះគ្រីស្ទបានរស់ពីស្លាប់ឡើងវិញ ដោយសារសិរីល្អនៃព្រះវរបិតាដែរ
ដ្បិតបើយើងបានជាប់ជាមួយនឹងទ្រង់ ក្នុងការដែលជាគំរូពីសេចក្ដីសុគតរបស់ទ្រង់ នោះក៏នឹងបានជាប់ក្នុងសេចក្ដីរស់ឡើងវិញរបស់ទ្រង់ដែរ ដោយដឹងសេចក្ដីនេះថា មនុស្សចាស់របស់យើង បានត្រូវឆ្កាងជាមួយនឹងទ្រង់ហើយ ដើម្បីឲ្យតួអំពើបាបបានត្រូវសូន្យទៅ ប្រយោជន៍កុំឲ្យយើងនៅបំរើអំពើបាបទៀតឡើយ ដ្បិតអ្នកណាដែលស្លាប់ នោះក៏បានរាប់ជាសុចរិតរួចពីបាបហើយ បើសិនជាយើងស្លាប់ជាមួយនឹងព្រះគ្រីស្ទ នោះយើងជឿថា យើងនឹងរស់នៅជាមួយនឹងទ្រង់ដែរ ដោយដឹងថា ដែលព្រះគ្រីស្ទមានព្រះជន្មរស់ពីស្លាប់ឡើងវិញ នោះទ្រង់មិនចេះសុគតទៀតឡើយ ព្រោះសេចក្ដីស្លាប់គ្មានអំណាចលើទ្រង់ទៀត ដ្បិតដែលទ្រង់សុគត នោះគឺបានសុគតខាងឯបាប១ដងជាសំរេច ហើយដែលទ្រង់មានព្រះជន្មរស់ នោះទ្រង់រស់ខាងឯព្រះវិញ ដូច្នេះ ចូរអ្នករាល់គ្នារាប់ខ្លួនទុកជាស្លាប់ខាងឯបាបដែរ តែរស់ខាងឯព្រះវិញចុះ ដោយនូវព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នា។
ហេតុនេះ កុំឲ្យបាបសោយរាជ្យក្នុងរូបកាយរបស់អ្នករាល់គ្នា ដែលតែងតែស្លាប់ ដើម្បីនឹងស្តាប់តាមសេចក្ដីប៉ងប្រាថ្នារបស់បាបនោះឡើយ ក៏កុំឲ្យប្រគល់អវយវៈទាំងប៉ុន្មាន របស់អ្នករាល់គ្នាទៅក្នុងអំពើបាប ទុកដូចជាប្រដាប់ប្រដាទុច្ចរិតនោះឡើយ គឺត្រូវប្រគល់ខ្លួនទៅព្រះ ដូចជាបានរស់ពីស្លាប់នោះឡើងវិញ ហើយថ្វាយអវយវៈរបស់អ្នករាល់គ្នាទៅព្រះ ទុកដូចជាប្រដាប់ប្រដាសុចរិតផង ដ្បិតបាបមិនត្រូវមានអំណាចលើអ្នករាល់គ្នាទៀតឡើយ ដោយព្រោះអ្នករាល់គ្នាមិននៅក្រោមក្រិត្យវិន័យ គឺនៅក្រោមព្រះគុណវិញ។
អេភេសូរ ៤:១៧-២៤
ដូច្នេះ ខ្ញុំនិយាយសេចក្ដីនេះ ហើយធ្វើបន្ទាល់ក្នុងព្រះអម្ចាស់ថា កុំបីឲ្យអ្នករាល់គ្នាដើរដូចជាសាសន៍ដទៃឯទៀត ដែលគេដើរតាមគំនិតឥតប្រយោជន៍របស់គេទៀតឡើយ គំនិតគេត្រូវបង្អាប់ ហើយគេដាច់ចេញពីព្រះជន្មព្រះ ដោយសារសេចក្ដីខ្លៅល្ងង់ក្នុងខ្លួនគេ ព្រោះចិត្តគេរឹងទទឹង គេលែងខ្លាចបាប បានជាគេប្រគល់ខ្លួនទៅខាងសេចក្ដីអាសអាភាស ដើម្បីនឹងប្រព្រឹត្តសេចក្ដីស្មោកគ្រោកគ្រប់យ៉ាង ដោយចិត្តវក់វិញ តែអ្នករាល់គ្នាមិនបានរៀនឲ្យស្គាល់ព្រះគ្រីស្ទយ៉ាងនោះទេ នោះគឺបើតិចណាស់អ្នករាល់គ្នាបានឮ ហើយរៀននឹងទ្រង់ តាមសេចក្ដីពិតដែលនៅក្នុងព្រះយេស៊ូវដែរ ថាខាងឯកិរិយាប្រព្រឹត្តកាលពីដើម នោះត្រូវឲ្យអ្នករាល់គ្នាបានដោះមនុស្សចាស់ ដែលតែងតែខូចទៅ តាមសេចក្ដីប៉ងប្រាថ្នារបស់សេចក្ដីឆបោកចោលចេញ ហើយឲ្យគំនិតក្នុងចិត្តបានកែប្រែជាថ្មីឡើង ព្រមទាំងប្រដាប់ខ្លួន ដោយមនុស្សថ្មីវិញ ដែលកើតមកក្នុងសេចក្ដីសុចរិត ហើយក្នុងសេចក្ដីបរិសុទ្ធរបស់ផងសេចក្ដីពិត តាមភាពព្រះ។
២ ពេត្រុស ១:១-៩
សំបុត្រស៊ីម៉ូន-ពេត្រុស ជាបាវបំរើ ហើយជាសាវករបស់ព្រះយេស៊ូវគ្រីស្ទ
ខ្ញុំផ្ញើមកពួកអ្នក ដែលបានទទួលសេចក្ដីជំនឿដ៏វិសេសត្រូវគ្នានឹងយើងខ្ញុំដែរ ដោយសេចក្ដីសុចរិតរបស់ព្រះយេស៊ូវគ្រីស្ទដ៏ជាព្រះ ហើយជាព្រះអង្គសង្គ្រោះនៃយើងរាល់គ្នា
សូមឲ្យព្រះគុណ នឹងសេចក្ដីសុខសាន្ត បានចំរើនដល់អ្នករាល់គ្នាឲ្យបានស្គាល់ព្រះ នឹងព្រះយេស៊ូវ ជាព្រះអម្ចាស់នៃយើង
ដ្បិតព្រះចេស្តានៃព្រះ បានផ្តល់ឲ្យយើងរាល់គ្នាមានគ្រប់របស់ទាំងអស់ ខាងឯជីវិត នឹងសេចក្ដីគោរពប្រតិបត្តិដល់ព្រះ ដោយយើងបានស្គាល់ព្រះអង្គ ដែលទ្រង់ហៅយើងរាល់គ្នាមក ដោយសារសិរីល្អ នឹងសគុណរបស់ទ្រង់ ដែលដោយសារសេចក្ដីទាំងនោះ ទ្រង់បានប្រទានសេចក្ដីសន្យាដ៏ធំបំផុត ហើយវិសេសផង មកយើងរាល់គ្នា ដើម្បីឲ្យអ្នករាល់គ្នាបានចំណែកជានិស្ស័យនៃព្រះ ដោយសារសេចក្ដីសន្យានោះឯង ដោយបានរួចពីសេចក្ដីពុករលួយនៅក្នុងលោកីយនេះដែលកើតអំពីសេចក្ដីប៉ងប្រាថ្នា ហើយដោយហេតុនោះបានជាត្រូវឲ្យអ្នករាល់គ្នា បន្ថែមឲ្យមានសេចក្ដីឧស្សាហ៍ដែរ ដើម្បីឲ្យសេចក្ដីជំនឿបានទៀងត្រង់ ឲ្យសេចក្ដីទៀងត្រង់បានដំរិះ ឲ្យដំរិះបានចេះអត់សង្កត់ ឲ្យសេចក្ដីអត់សង្កត់បានខ្ជាប់ខ្ជួន ឲ្យសេចក្ដីខ្ជាប់ខ្ជួនបានចេះគោរពប្រតិបត្តិដល់ព្រះ ឲ្យសេចក្ដីគោរពប្រតិបត្តិ បានចេះរាប់អានគ្នាជាបងប្អូន ហើយឲ្យសេចក្ដីរាប់អានគ្នាបានសេចក្ដីស្រឡាញ់ថែមទៀត ដ្បិតបើមានសេចក្ដីទាំងនោះចំរើនឡើង ក្នុងចិត្តអ្នករាល់គ្នាហើយ នោះអ្នករាល់គ្នាមិននៅទំនេរ ឬឥតផលខាងឯដំណើរស្គាល់ព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នាឡើយ ពីព្រោះអ្នកណាដែលគ្មានសេចក្ដីទាំងនោះ គឺឈ្មោះថាជាអ្នកខ្វាក់ មើលទៅឆ្ងាយមិនឃើញ ព្រមទាំងភ្លេចថា ព្រះបានសំអាតបាបដែលខ្លួនធ្វើពីដើមផង
រ៉ូម ៨:១-១៧, ២៦-៣៩
ហេតុនោះ នៅជាន់នេះ អ្នកណាដែលនៅក្នុងព្រះគ្រីស្ទយេស៊ូវ នោះគ្មានទោសសោះ ដ្បិតអំណាចរបស់ព្រះវិញ្ញាណនៃជីវិត ដែលនៅក្នុងព្រះគ្រីស្ទយេស៊ូវ នោះបានប្រោសឲ្យខ្ញុំរួចពីអំណាចរបស់អំពើបាប នឹងសេចក្ដីស្លាប់ហើយ ពីព្រោះ ឯការដែលក្រិត្យវិន័យធ្វើមិនកើតដោយមានសេចក្ដីកំសោយ ព្រោះសាច់ឈាម នោះព្រះទ្រង់បានធ្វើវិញ ដោយចាត់ព្រះរាជបុត្រាទ្រង់ឲ្យមក មានរូបអង្គ បែបដូចជាសាច់ឈាមដែលតែងតែមានបាប ហើយដោយព្រោះអំពើបាប ក៏កាត់ទោសអំពើបាបនៅក្នុងសាច់ឈាម ដើម្បីឲ្យសេចក្ដីដែលក្រិត្យវិន័យបង្គាប់មក បានសំរេចក្នុងខ្លួនយើងរាល់គ្នា ដែលមិនដើរតាមសាច់ឈាម គឺដើរតាមព្រះវិញ្ញាណវិញ ពីព្រោះអស់អ្នកណាដែលតាមសាច់ឈាម នោះគិតតែខាងសាច់ឈាម តែអស់អ្នកណាដែលតាមព្រះវិញ្ញាណ នោះគិតតែខាងវិញ្ញាណវិញ ដ្បិតគំនិតខាងសាច់ឈាម នោះជាសេចក្ដីស្លាប់ទទេ ឯគំនិតនៃព្រះវិញ្ញាណ នោះទើបជាជីវិត នឹងសេចក្ដីសុខសាន្តវិញ ព្រោះគំនិតខាងសាច់ឈាម នោះរមែងទាស់ទទឹងនឹងព្រះ ដ្បិតមិនចុះចូលនឹងក្រិត្យវិន័យរបស់ព្រះទេ ក៏ពុំអាចនឹងចុះចូលបានផង ពួកអ្នកដែលនៅខាងសាច់ឈាម នោះពុំអាចនឹងគាប់ព្រះហឫទ័យដល់ព្រះបានឡើយ។
តែបើសិនជាព្រះវិញ្ញាណនៃព្រះសណ្ឋិតក្នុងខ្លួនអ្នករាល់គ្នា នោះអ្នករាល់គ្នាមិននៅខាងសាច់ឈាមទៀតទេ គឺនៅខាងវិញ្ញាណវិញ ប៉ុន្តែ បើអ្នកណាគ្មានព្រះវិញ្ញាណរបស់ព្រះគ្រីស្ទ អ្នកនោះមិនមែនជារបស់ផងទ្រង់ទេ ហើយបើសិនជាព្រះគ្រីស្ទសណ្ឋិតក្នុងអ្នករាល់គ្នា នោះរូបសាច់បានស្លាប់ ដោយព្រោះអំពើបាបមែន តែវិញ្ញាណមានជីវិតវិញ ដោយព្រោះសេចក្ដីសុចរិត មួយទៀត បើព្រះវិញ្ញាណនៃព្រះអង្គ ដែលបានប្រោសឲ្យព្រះយេស៊ូវរស់ពីស្លាប់ឡើងវិញ ទ្រង់សណ្ឋិតក្នុងខ្លួនអ្នករាល់គ្នា នោះព្រះអង្គនោះឯង ដែលបានប្រោសឲ្យព្រះគ្រីស្ទរស់ពីស្លាប់ឡើង ទ្រង់នឹងប្រោសរូបកាយនៃអ្នករាល់គ្នាដែលទៀងតែស្លាប់ ឲ្យមានជីវិតឡើងដែរ ដោយសារព្រះវិញ្ញាណទ្រង់ ដែលសណ្ឋិតនៅក្នុងខ្លួនអ្នករាល់គ្នា។
ដូច្នេះ បងប្អូនអើយ យើងមានសេចក្ដីជាប់ជំពាក់ មិនមែនជំពាក់ចំពោះសាច់ឈាម ឲ្យបានរស់តាមសាច់ឈាមនោះទេ ដ្បិតបើសិនជាអ្នករាល់គ្នារស់តាមសាច់ឈាម នោះនឹងត្រូវស្លាប់ទៅ តែបើសំឡាប់អំពើរបស់រូបសាច់ចេញ ដោយសារព្រះវិញ្ញាណ នោះអ្នករាល់គ្នានឹងបានរស់វិញ ហើយអស់អ្នកណាដែលព្រះវិញ្ញាណនៃព្រះទ្រង់នាំ អ្នកទាំងនោះហើយជាពួកកូនរបស់ព្រះ អ្នករាល់គ្នាមិនបានទទួលនិស្ស័យជាបាវបំរើ ឲ្យត្រូវភ័យខ្លាចទៀតឡើយ គឺបានទទួលនិស្ស័យជាកូនចិញ្ចឹមវិញ ដោយហេតុនោះបានជាយើងស្រែកឡើងថា ឱអ័ប្បា ព្រះវរបិតាអើយ ហើយព្រះវិញ្ញាណទ្រង់ក៏ធ្វើបន្ទាល់នឹងវិញ្ញាណយើងថា យើងជាកូនរបស់ព្រះ បើសិនណាជាកូនព្រះហើយ នោះយើងក៏បានគ្រងមរដកដែរ គឺជាអ្នកគ្រងមរដកនៃព្រះជាមួយនឹងព្រះគ្រីស្ទផង ឲ្យតែយើងទទួលរងទុក្ខជាមួយនឹងទ្រង់ចុះ ដើម្បីឲ្យបានដំកើងឡើងជាមួយនឹងទ្រង់ដែរ។ . . .
ព្រះវិញ្ញាណទ្រង់ក៏ជួយសេចក្ដីកំសោយរបស់យើងបែបដូច្នោះដែរ ដ្បិតយើងមិនដឹងជាគួរអធិស្ឋានសូមអ្វីទេ តែព្រះវិញ្ញាណទ្រង់ជួយអង្វរជំនួសយើង ដោយដំងូរដែលរកថ្លែងពុំបានវិញ ប៉ុន្តែ ព្រះអង្គដែលស្ទង់ចិត្ត ទ្រង់ជ្រាបនូវគំនិតនៃព្រះវិញ្ញាណ ដ្បិតព្រះវិញ្ញាណជួយអង្វរជួសពួកបរិសុទ្ធ ឲ្យត្រូវនឹងព្រះហឫទ័យព្រះ តែយើងដឹងថា គ្រប់ការទាំងអស់ផ្សំគ្នា សំរាប់សេចក្ដីល្អដល់ពួកអ្នកដែលស្រឡាញ់ព្រះ គឺដល់ពួកអ្នកដែលទ្រង់ហៅមក តាមព្រះដំរិះទ្រង់ ដ្បិតអ្នកណាដែលទ្រង់បានស្គាល់ជាមុន នោះទ្រង់ក៏ដំរូវទុកជាមុន ឲ្យបានត្រឡប់ដូចជារូបអង្គនៃព្រះរាជបុត្រាទ្រង់ ដើម្បីឲ្យព្រះរាជបុត្រាបានធ្វើជាបងច្បងគេក្នុងពួកបងប្អូនជាច្រើន ឯពួកអ្នកដែលទ្រង់បានដំរូវទុកជាមុន នោះទ្រង់ក៏ហៅ ហើយពួកអ្នកដែលទ្រង់បានហៅ នោះទ្រង់ក៏រាប់ទុកជាសុចរិត ហើយពួកអ្នកដែលទ្រង់បានរាប់ជាសុចរិត នោះទ្រង់ក៏បានដំកើងឡើងដែរ។
ដូច្នេះ យើងនឹងថ្លែងប្រាប់ពីសេចក្ដីទាំងនេះថាដូចម្តេច បើសិនជាព្រះកាន់ខាងយើង តើអ្នកណាអាចទាស់នឹងយើងបាន ឯព្រះអង្គ ដែលមិនបានសំចៃទុកនូវព្រះរាជបុត្រាទ្រង់បង្កើត គឺបានបញ្ជូនទ្រង់ទៅជំនួសយើងរាល់គ្នា នោះតើមានទំនងអ្វី ឲ្យទ្រង់មិនប្រទានគ្រប់ទាំងអស់មកយើង ជាមួយនឹងព្រះរាជបុត្រាទ្រង់នោះផង តើអ្នកណានឹងចោទប្តឹងពីពួករើសតាំងរបស់ព្រះបាន ដ្បិតគឺជាព្រះហើយ ដែលទ្រង់រាប់គេជាសុចរិត តើអ្នកណានឹងកាត់ទោសគេបាន ដ្បិតព្រះគ្រីស្ទទ្រង់បានសុគតជំនួសគេហើយ តែដែលថា ទ្រង់រស់ឡើងវិញ នោះមានទំនងជាង ទ្រង់ក៏គង់នៅខាងស្តាំនៃព្រះ ហើយជាអ្នកអង្វរជំនួសយើងរាល់គ្នាដែរ តើអ្នកណានឹងពង្រាត់យើងចេញពីសេចក្ដីស្រឡាញ់របស់ផងព្រះគ្រីស្ទបាន តើសេចក្ដីទុក្ខលំបាក ឬសេចក្ដីវេទនា សេចក្ដីបៀតបៀន សេចក្ដីអត់ឃ្លាន សេចក្ដីអាក្រាត សេចក្ដីអន្តរាយ ឬដាវឬអី ដូចមានសេចក្ដីចែងទុកមកថា
«យើងខ្ញុំត្រូវគេសំឡាប់វាល់ព្រឹកវាល់ល្ងាច ដោយយល់ដល់ទ្រង់» គេរាប់យើងទុកដូចជាចៀមដែលសំរាប់សំឡាប់
ទេ គឺក្នុងសេចក្ដីទាំងនោះ យើងខ្ញុំវិសេសលើសជាងអ្នកដែលមានជ័យជំនះទៅទៀត ដោយសារព្រះអង្គដែលទ្រង់ស្រឡាញ់យើង ដ្បិតខ្ញុំជឿជាក់ថា ទោះស្លាប់ ឬរស់ ពួកទេវតា ឬអំណាចអ្វី ការអ្វីនៅជាន់នេះ ឬទៅមុខ ឬឥទ្ធិឫទ្ធិអ្វី ទីមានកំពស់ ទីជំរៅ ឬរបស់អ្វីដែលកើតមកឯទៀតក្តី នោះពុំអាចនឹងពង្រាត់យើង ចេញពីសេចក្ដីស្រឡាញ់របស់ព្រះ ដែលនៅក្នុងព្រះគ្រីស្ទយេស៊ូវ ជាព្រះអម្ចាស់នៃយើងរាល់គ្នាទៅ បានឡើយ។
កូល៉ុស ៣:១២-១៧
ដូច្នេះ ចូរប្រដាប់កាយ ដោយចិត្តក្តួលអាណិត សប្បុរស សុភាព សំឡូត នឹងចិត្តអត់ធ្មត់ ទុកដូចជាពួកអ្នករើសតាំង ដែលបរិសុទ្ធ ហើយស្ងួនភ្ងាដល់ព្រះចុះ ហើយទ្រាំទ្រគ្នា ទាំងអត់ទោសទៅវិញទៅមក បើអ្នកណាមានហេតុទាស់នឹងអ្នកណា នោះចូរអត់ទោសឲ្យគេចុះ ដូចជាព្រះគ្រីស្ទបានអត់ទោសឲ្យអ្នករាល់គ្នាដែរ ចូរបន្ថែមទាំងសេចក្ដីស្រឡាញ់ថែមទៀត ជាចំណងនៃសេចក្ដីគ្រប់លក្ខណ៍ ចូរឲ្យសេចក្ដីមេត្រីរបស់ព្រះគ្រីស្ទត្រួតត្រានៅក្នុងចិត្ត ដែលទ្រង់បានហៅអ្នករាល់គ្នាមកក្នុងសេចក្ដីនោះឯង ឲ្យមានរូបកាយតែ១ ហើយត្រូវដឹងគុណផង។
ចូរឲ្យព្រះបន្ទូលនៃព្រះគ្រីស្ទ បានសណ្ឋិតនៅក្នុងអ្នករាល់គ្នាជាបរិបូរ ដោយប្រាជ្ញាគ្រប់យ៉ាង ទាំងបង្រៀន ហើយទូន្មានគ្នា ដោយនូវទំនុកដំកើង ទំនុកបរិសុទ្ធ នឹងចំរៀងខាងឯវិញ្ញាណ ទាំងច្រៀងក្នុងចិត្តថ្វាយព្រះ ដោយព្រះគុណ ហើយក្នុងគ្រប់ទាំងអស់ ទោះបើការអ្វីដែលអ្នករាល់គ្នានឹងធ្វើ ដោយពាក្យសំដីឬកិរិយាក៏ដោយ ចូរធ្វើទាំងអស់ ដោយព្រះនាមនៃព្រះអម្ចាស់យេស៊ូវ ទាំងអរព្រះគុណដល់ព្រះដ៏ជាព្រះវរបិតា ដោយសារទ្រង់ផង។
រ៉ូម ១២:១-២
ដូច្នេះ បងប្អូនអើយ ខ្ញុំទូន្មានអ្នករាល់គ្នាដោយសេចក្ដីមេត្តាករុណានៃព្រះ ឲ្យបានថ្វាយរូបកាយទុកជាយញ្ញបូជារស់ ហើយបរិសុទ្ធ ដែលគាប់ព្រះហឫទ័យដល់ព្រះ ជាការគោរពនៃអ្នករាល់គ្នា ដែលមានទំនង កុំឲ្យត្រាប់តាមសម័យនេះឡើយ ចូរឲ្យអ្នករាល់គ្នាបានផ្លាស់ប្រែវិញ ដោយគំនិតបានកែជាថ្មីឡើង ដើម្បីនឹងអាចលមើលឲ្យបានស្គាល់បំណងព្រះហឫទ័យនៃព្រះ ដែលល្អ ស្រួលទទួល ហើយគ្រប់លក្ខណ៍ផង
