សូមចំណាយពេល ១នាទី ដើម្បីសរសេរពាក្យឲ្យបានច្រើនតាមដែលអ្នកគិតដល់ ជាពាក្យដែលពិពណ៌នាអំពីព្រះ។ សូមចែកចាយជាមួយគ្នា។
តើអ្នកចង់ស្គាល់អ្វីខ្លះអំពីព្រះ?
យើងមិនអាចយល់អស់អំពីព្រះទេ ប៉ុន្តែទ្រង់ចង់ឲ្យយើងស្គាល់ទ្រង់។ របៀបមួយដែលព្រះបើកបង្ហាញអង្គទ្រង់គឺ តាមរយៈព្រះបន្ទូលទ្រង់ ដែលប្រាប់យើងពីព្រះនាមទ្រង់ ព្រមទាំងមានការពិពណ៌នា និងពាក្យជារូបភាពផង។ សូមអាន អេសាយ ៤០:១០-១១។
អេសាយ ៤០:១០-១១
មើល ព្រះអម្ចាស់យេហូវ៉ាទ្រង់នឹងយាងមក ដោយមានព្រះចេស្តា ហើយព្រះពាហុនៃទ្រង់នឹងកាន់កាប់ត្រួតត្រាឲ្យទ្រង់ មើល ទ្រង់នាំយករង្វាន់មកជាមួយ ហើយបំណាច់ដែលទ្រង់សងដល់គេក៏នៅចំពោះទ្រង់ ទ្រង់នឹងឃ្វាលហ្វូងរបស់ទ្រង់ ដូចជាអ្នកគង្វាល ទ្រង់នឹងប្រមូលអស់ទាំងកូនចៀមមកបីនៅព្រះពាហុ ហើយលើកផ្ទាប់នៅព្រះឧរា ក៏នឹងនាំពួកមេៗ ដែលមានកូនខ្ចីទៅដោយថ្នម។
ការរកឃើញ : តើអត្ថបទគម្ពីរនេះ បង្ហាញពីលក្ខណៈអត្តចរិតអ្វីខ្លះរបស់ព្រះ?
ការចែកចាយ : តើការពណ៌នាទាំងនេះ ធ្វើឲ្យអ្នកនឹកឃើញរូបភាពអ្វីខ្លះ?
ការគិតពិចារណា : តើអ្នកគង្វាលត្រូវមានកម្លាំង និងរឹងមាំ ប៉ុន្តែក៏សុភាព និងទន់ភ្លន់ដោយរបៀបណាខ្លះ?
ព្រះបើកបង្ហាញអំពីអត្តចរិត និងលក្ខណៈរបស់ទ្រង់
គម្ពីរអេសាយ ជំពូក ៤០ បន្តប្រាប់ពីលក្ខណៈផ្សេងៗទៀតរបស់ព្រះ និងពន្យល់ពីរបៀបដែលលក្ខណៈទាំងនោះផ្ដល់ព្រះពរដល់យើងនៅពេលផ្សេងៗ និងតាមរបៀបផ្សេងៗ។ សូមអាន អេសាយ ៤០:២៨-២៩.
អេសាយ ៤០:២៨-២៩
តើឯងមិនបានដឹង តើមិនបានឮទេឬអី ថាព្រះដ៏គង់នៅអស់កល្បជានិច្ច គឺព្រះយេហូវ៉ា ជាព្រះដែលបានបង្កើតផែនដី រហូតដល់ចុងបំផុត ទ្រង់មិនដែលល្វើយឡើយ ក៏មិនដែលអស់កំឡាំងផង គ្មានអ្នកណាអាចស្ទង់យល់យោបល់របស់ទ្រង់បានទេ ទ្រង់រមែងចំរើនកំឡាំង ដល់អ្នកដែលល្វើយ ហើយចំណែកអ្នកដែលគ្មានកំឡាំងសោះ នោះទ្រង់ក៏ប្រទានឲ្យ
ការរកឃើញ: តើខគម្ពីរទាំងនេះ ហៅព្រះថាដូចម្ដេចខ្លះ? តើមានបង្ហាញពីលក្ខណៈបែបណាខ្លះរបស់ព្រះ?
ការគិតពិចារណា : តើធ្លាប់មានពេលណាមួយ ដែលអ្នកមានអារម្មណ៍ហត់នឿយ ឬអស់កម្លាំងរលីង ប៉ុន្តែព្រះប្រទានកម្លាំងដល់អ្នកដែរឬទេ?
ការចែកចាយ : តើលក្ខណៈបែបនេះរបស់ព្រះ ផ្ដល់ឲ្យយើងមានបទពិសោធខុសប្លែកពីមុនយ៉ាងណា?
នៅពេលលោកម៉ូសេសុំឲ្យព្រះបង្ហាញអង្គទ្រង់ ទ្រង់បានពន្យល់គាត់ថា ទ្រង់មិនអាចធ្វើបែបនោះបានទេ ព្រោះគាត់នឹងមិនអាចទ្រាំទ្រនឹងសិរីល្អដ៏អស្ចារ្យរបស់ទ្រង់បានឡើយ (និក្ខមនំ ៣៣)។ ប៉ុន្តែទ្រង់មានបន្ទូលប្រាប់គាត់ពីព្រះនាមទ្រង់ ជាការពណ៌នាមួយដែលមានចែងម្ដងហើយម្ដងទៀតនៅក្នុងព្រះគម្ពីរ តួយ៉ាងដូចជា ទំនុកដំកើង ១៤៥:៨-៩។
ទំនុកដំកើង ១៤៥:៨-៩
ព្រះយេហូវ៉ាទ្រង់ប្រកបដោយមេត្តាករុណា នឹងអាណិតអាសូរ ទ្រង់យឺតនឹងខ្ញាល់ ក៏មានសេចក្ដីសប្បុរសដ៏ធំទូលាយ ព្រះយេហូវ៉ាទ្រង់ល្អដល់មនុស្សទាំងអស់ ហើយព្រះហឫទ័យទន់សន្តោសរបស់ទ្រង់ ក៏គ្របលើកិច្ចការរបស់ទ្រង់ទាំងប៉ុន្មាន
ការរកឃើញ : តើត្រង់នេះមានបង្ហាញនូវលក្ខណៈអ្វីខ្លះអំពីព្រះ?
ការចែកចាយ : តើអ្នកធ្លាប់ជួបប្រទះនូវក្ដីមេត្តា និង/ឬព្រះគុណរបស់ទ្រង់ដោយរបៀបណាខ្លះ?
ការគិតពិចារណា : តើអ្នកគិតថាឃ្លា ព្រះយឺតនឹងខ្ញាល់ មានន័យដូចម្ដេច? តើការណ៍នេះ ធ្វើឲ្យមានភាពខុសប្លែកយ៉ាងណាខ្លះ?
ការចែកចាយ : តើអ្នកធ្លាប់បានឃើញ ឬជួបប្រទះសេចក្ដីមេត្តាករុណារបស់ព្រះដោយរបៀបណាខ្លះ?
នៅពេលដែលយើងកាន់តែរកឃើញថាព្រះជានរណា យើងក៏រកឃើញការធានាអះអាងថាទ្រង់មិនដែលប្រែប្រួលឡើយ :
ទំនុកដំកើង ១០២:២៥-២៧
កាលដើមដំបូងទ្រង់បានតាំងឫសផែនដី ហើយផ្ទៃមេឃក៏ជាស្នាដៃរបស់ព្រះហស្តទ្រង់ដែរ របស់ទាំងនោះនឹងវិនាសសូន្យទៅពិត តែទ្រង់នឹងស្ថិតស្ថេរនៅវិញ អើ . . .
ប៉ុន្តែ ឯទ្រង់ៗនៅដដែល ហើយព្រះជន្មទ្រង់មិនចេះផុតឡើយ
ការរកឃើញ : តាមរយៈខគម្ពីរ ទំនុកដំកើង ១០២ តើព្រះខុសពីអ្វីៗដែលទ្រង់បានបង្កើតយ៉ាងណាខ្លះ?
ការគិតពិចារណា : តើការដែលដឹងថា ព្រះមិនដែលប្រែប្រួល ធ្វើឲ្យយើងមានទំនុកចិត្ត និងលើកទឹកចិត្តយើងយ៉ាងណាខ្លះ?
[ចំណាំ: លក្ខណៈដែលមិនចេះប្រែប្រួលនេះ យើងហៅថា «ភាពមិនចេះប្រែប្រួល» របស់ព្រះ។]
ព្រះបង្ហាញពីអង្គទ្រង់តាមរយៈព្រះនាមទ្រង់
នៅក្នុងវប្បធម៌បុរាណ ឈ្មោះមានសារៈសំខាន់ណាស់។ ឈ្មោះឆ្លុះបញ្ចាំងពីអត្តសញ្ញាណ តួនាទី ឬអត្តចរិតរបស់មនុស្សម្នាក់។ ជារឿយៗ គេស្គាល់មនុស្សម្នាក់ដោយឈ្មោះជាច្រើន ដែលសង្កត់ធ្ងន់លើទិដ្ឋភាពផ្សេងៗនៃជីវិត និងចរិតលក្ខណៈរបស់ពួកគេ។
ចូរយើងមើលពីព្រះនាមពីរ ដែលលោកអាប់រ៉ាម (ក្រោយមក គាត់ឈ្មោះថាអ័ប្រាហាំ) បានស្គាល់ព្រះ ។ សូមអាន លោកុប្បត្តិ ១៤:២២ និង ១៧:១។
លោកុប្បត្តិ ១៤:២២
តែអាប់រ៉ាមគាត់ទូល... ទូលបង្គំបានលើកដៃស្បថចំពោះព្រះយេហូវ៉ាជាព្រះដ៏ខ្ពស់បំផុត ជាម្ចាស់នៃស្ថានសួគ៌ នឹងផែនដី...
លោកុប្បត្តិ ១៧:១
លុះដល់អាប់រ៉ាមអាយុបាន៩៩ឆ្នាំ នោះព្រះយេហូវ៉ាទ្រង់លេចមកឯគាត់ ប្រាប់ថា អញជាព្រះដ៏មានគ្រប់ព្រះចេស្តា ចូរឯងដើរនៅមុខអញ ហើយឲ្យបានគ្រប់លក្ខណ៍ចុះ
ការគិតពិចារណា : តើព្រះនាម «ព្រះដ៏ខ្ពស់បំផុត» បង្ហាញយ៉ាងណាពីសិទ្ធិអំណាចទ្រង់នៅលើពិភពលោក និងក្នុងជីវិតរបស់យើង?
ការពិភាក្សា : តើសង្គមឆ្លើយតបយ៉ាងណា ចំពោះការប្រកាសថា ព្រះទ្រង់ជាព្រះអាទិករ (ព្រះដែលបានបង្កើត) ផ្ទៃមេឃ និងផែនដី?
ការគិតពិចារណា : តើមានផ្នែកណាខ្លះនៅក្នុងជីវិតយើង ដែលពិបាកដើម្បីទទួលស្គាល់នូវសិទ្ធិអំណាចរបស់ព្រះ ថាជាព្រះអាទិករ និងព្រះដែលរចនាយើងឡើងមក?
ការរកឃើញ : តើលោកអ័ប្រាហាំបានឆ្លើយតបនឹងព្រះវិញដោយរបៀបណា?
ព្រះនាម និងលក្ខណៈផ្សេងទៀតរបស់ព្រះ មានដូចជា : ព្រះយេហូវ៉ានៃពួកពលបរិវារ (១ សាំយូអែល ១៧:៤៥), ព្រះដ៏មានព្រះជន្មអស់កល្បជានិច្ច (លោកុប្បត្តិ ២១:៣៣), ព្រះដ៏ពិត (យេរេមា ១០:១០), ព្រះដ៏ស្មោះត្រង់ (ទំនុកដំកើង ៣៣:៤), ព្រះដ៏ទតឃើញ (លោកុប្បត្តិ ១៦:១៣), ព្រះដែលផ្គត់ផ្គង់ (លោកុប្បត្តិ ២២:១៤).
ព្រះខុសពីយើងទាំងស្រុង។ ទ្រង់បរិសុទ្ធ មានព្រះចេស្ដា មានឫទ្ធានុភាព មានព្រះហឫទ័យអាណិតអាសូរ មេត្តាករុណា និងពោរពេញដោយសេចក្ដីស្រឡាញ់។ គ្មានអ្វីអាចប្រៀបផ្ទឹមបាននឹងទ្រង់ទេ!
ការរកឃើញ : តើព្រះ ត្រូវបានហៅយ៉ាងដូចម្ដេចនៅ ចោទិយកថា ១០:១៧?
ចោទិយកថា ១០:១៧
ដ្បិតព្រះយេហូវ៉ាជាព្រះនៃឯង ទ្រង់ជាព្រះលើអស់ទាំងព្រះ ហើយជាព្រះអម្ចាស់លើអស់ទាំងព្រះអម្ចាស់ គឺជាព្រះដ៏ធំដែលមានព្រះចេស្តា ហើយក៏គួរស្ញែងខ្លាច . . .
សូមចំណាយពេលពីរបីនាទី ដើម្បីសរសើរតម្កើងព្រះ សម្រាប់លក្ខណៈរបស់ទ្រង់។
ព្រះចង់ឲ្យយើងស្គាល់ទ្រង់
មនុស្សមួយចំនួនចាត់ទុកព្រះថា ខ្ពង់ខ្ពស់ និងនៅឆ្ងាយ ហើយអស្ចារ្យខ្លាំង ដោយទ្រង់មិនចង់ពាក់ព័ន្ធនឹងមនុស្សយើងទេ រីឯអ្នកផ្សេងទៀតចាត់ទុកទ្រង់ថាធម្មតាៗ ដូចជាពួកម៉ាកដែលគេដើរលេងជាមួយ។ សូមអានគម្ពីរអេសាយ 57:15.
អេសាយ ៥៧:១៥
ដ៏ជាធំ ហើយខ្ពស់បំផុត ជាព្រះដ៏គង់នៅអស់កល្បជានិច្ច ដែលព្រះនាមទ្រង់ជានាមបរិសុទ្ធ ទ្រង់មានបន្ទូលដូច្នេះថា អញនៅឯស្ថានដ៏ខ្ពស់ ហើយបរិសុទ្ធ ក៏នៅជាមួយនឹងអ្នកណាដែលមានចិត្តសង្រេង ហើយទន់ទាប ដើម្បីនឹងធ្វើឲ្យចិត្តរបស់មនុស្សទន់ទាបបានសង្ឃឹមឡើង ហើយចិត្តរបស់មនុស្សសង្រេងបានសង្ឃឹមឡើងដែរ
ការពិភាក្សា : តើយើងធ្វើយ៉ាងណាដើម្បីថ្លឹងថ្លែងឲ្យមានតុល្យភាពរវាងការគោរពកោតខ្លាចព្រះ ជាមួយនឹងការស្គាល់ទ្រង់ដោយផ្ទាល់?
ការគិតពិចារណា: តើអ្នកគិតថា ហេតុអ្វីបានជាការសំខាន់ដែលយើងត្រូវយល់ឲ្យបានត្រឹមត្រូវអំពីព្រះ?
ដូចដែលព្រះបានបើកបង្ហាញអង្គទ្រង់នៅក្នុងព្រះបន្ទូលទ្រង់ ទ្រង់ក៏បានលាតត្រដាងពីផែនការរបស់ទ្រង់សម្រាប់ការប្រោសលោះដែរ។ ទ្រង់បានបញ្ជាក់យ៉ាងច្បាស់ថា ទ្រង់ចង់មានទំនាក់ទំនងជាមួយយើងម្នាក់ៗ។ យើងឃើញពីការណ៍នេះនៅក្នុង អេសាយ ៤៣:១០-១១.
អេសាយ ៤៣:១០-១១
ព្រះយេហូវ៉ាទ្រង់មានបន្ទូលថា ឯងរាល់គ្នាជាស្មរបន្ទាល់របស់អញ ហើយជាអ្នកបំរើដែលអញបានរើសតាំង ដើម្បីឲ្យបានស្គាល់ ហើយជឿដល់អញ ព្រមទាំងយល់ថា គឺអញនេះហើយ ឥតមានព្រះណាកើតមកមុនអញទេ ហើយក្រោយអញក៏ឥតមានដែរ គឺអញ អញនេះហើយជាយេហូវ៉ា ក្រៅពីអញ គ្មានអ្នកសង្គ្រោះណាទៀតឡើយ
ការរកឃើញ : បើធៀបនឹងអ្នកដទៃទៀត តើអ្វីដែលធ្វើឲ្យព្រះមានលក្ខណៈពិសេសខុសប្លែកពីគេ?
ការរកឃើញ : តើមានកិរិយាសព្ទបីអ្វីខ្លះ ដែលព្រះប្រើ នៅពេលទ្រង់ពន្យល់ពីរបៀបដែលទ្រង់ចង់ឲ្យយើងមានទំនាក់ទំនងជាមួយទ្រង់?
ការពិភាក្សា : តើខុសគ្នាត្រង់ណារវាងការដឹង ការជឿ និងការយល់អ្វីមួយ ឬនរណាម្នាក់?
ការគិតពិចារណា : តើអ្វីអាចជួយយើងឲ្យរីកចម្រើននៅក្នុងផ្នែកនីមួយៗ?
ព្រះយេស៊ូវធ្វើឲ្យមនុស្សអាចស្គាល់ព្រះ
ការពិភាក្សា : ដើម្បីឲ្យស្គាល់អ្នកដែលយើងមិនអាចមើលឃើញ តើអ្នកមានការពិបាកត្រង់ណាខ្លះ?
ព្រះនាមរបស់ព្រះ អត្តចរិតរបស់ទ្រង់ និងលក្ខណៈរបស់ទ្រង់ គឺជាវិធីទាំងអស់ដែលទ្រង់បានបង្ហាញអង្គទ្រង់ដល់យើង។ ហេព្រើរ ១:១-៣ ប្រាប់យើងពីរបៀបមួយទៀត។
ហេព្រើរ ១:១-៣
ឯព្រះ ដែលពីដើម ទ្រង់មានបន្ទូលនឹងពួកឰយុកោ ដោយពួកហោរា ជាច្រើនដងច្រើនបែប នៅជាន់ក្រោយបង្អស់នេះ ទ្រង់បានមានបន្ទូលនឹងយើងរាល់គ្នា ដោយសារព្រះរាជបុត្រាវិញ . . . គឺទ្រង់ជារស្មីភ្លឺមកពីសិរីល្អនៃព្រះ ហើយជារូបភាពនៃអង្គទ្រង់ . . .
ការរកឃើញ : ព្រះយេស៊ូវធ្វើឲ្យយើងអាចស្គាល់ព្រះបានដោយរបៀបណា?
ការពិភាក្សា : តើអត្ថបទគម្ពីរនេះប្រាប់យើងអ្វីខ្លះ ពីការប្ដេជ្ញារបស់ព្រះ ដើម្បីមានទំនាក់ទំនងជាមួយយើង?
ការគិតពិចារណា : តើព្រះយេស៊ូវឆ្លើយតបយ៉ាងណា ចំពោះការពិបាកក្នុងការស្គាល់ព្រះដែលមើលមិនឃើញ?
ដំណឹងល្អដោយលោកយ៉ូហានណែនាំយើងឲ្យស្គាល់ព្រះយេស៊ូវជាព្រះបន្ទូលដែលបានប្រសូតជាមនុស្ស ដើម្បីគង់នៅក្នុងចំណោមយើង (យ៉ូហាន ១:១៤)។ សូមអាន យ៉ូហាន ១:១, ១៧-១៨ និង យ៉ូហាន ១៤:៩.
យ៉ូហាន ១:១
កាលដើមដំបូងមានព្រះបន្ទូល ព្រះបន្ទូលក៏គង់នៅជាមួយនឹងព្រះ ហើយព្រះបន្ទូលនោះឯងជាព្រះ
យ៉ូហាន ១:១៧-១៨
ដ្បិតបណ្តាក្រិត្យវិន័យទាំងប៉ុន្មាន បានប្រទានមក ដោយសារលោកម៉ូសេ តែឯព្រះគុណ នឹងសេចក្ដីពិត នោះបានមក ដោយសារព្រះយេស៊ូវគ្រីស្ទវិញ គ្មានអ្នកណាដែលឃើញព្រះឡើយ មានតែព្រះរាជបុត្រាតែ១ដែលគង់នៅក្នុងឱរាព្រះវរបិតាប៉ុណ្ណោះ ទ្រង់បានសំដែងឲ្យស្គាល់ព្រះអង្គ។
យ៉ូហាន ១៤:៩
ព្រះយេស៊ូវមានបន្ទូលទៅថា អ្នកណាដែលឃើញខ្ញុំ នោះក៏បានឃើញព្រះវរបិតាដែរ
ការគិតពិចារណា : តើអ្នកគិតថា ឃ្លាថា ព្រះគុណ នឹងសេចក្ដីពិត នោះបានមក ដោយសារព្រះយេស៊ូវគ្រីស្ទ មានន័យដូចម្ដេច?
ការរកឃើញ : តើអត្ថបទគម្ពីរទាំងនេះ អះអាងអ្វីខ្លះអំពីព្រះយេស៊ូវ?
ការពិភាក្សា : តើអត្ថបទគម្ពីរទាំងនេះជួយយើងឲ្យឆ្លើយតបចំពោះអ្នកដែលគិតថាព្រះយេស៊ូវមិនមែនជាព្រះពិតយ៉ាងដូចម្ដេច?
ការគិតពិចារណា : តើអ្វីដែលអ្នកដឹងអំពីព្រះយេស៊ូ អ្វីដែលទ្រង់មានបន្ទូល និងបានធ្វើ ប្រាប់អ្នកអំពីព្រះជាម្ចាស់ និងអត្តចរិតរបស់ទ្រង់យ៉ាងណាខ្លះ?
ព្រះយេស៊ូវក៏បានប្រាប់យើងជាច្រើនអំពីរបៀបដែលព្រះវរបិតាទតឃើញ និងមានអារម្មណ៍ចំពោះយើង។ សូមអាន ម៉ាថាយ ១០:២៩-៣១.
ម៉ាថាយ ១០:២៩-៣១
តើគេមិនលក់ចាប២ថ្លៃ១លុយទេឬអី តែគ្មានចាបណាមួយធ្លាក់ទៅដី ឥតព្រះវរបិតានៃអ្នករាល់គ្នាជ្រាបឡើយ សូម្បីតែសក់ក្បាលរបស់អ្នករាល់គ្នា ក៏បានរាប់ទាំងអស់ដែរ យ៉ាងនោះ មិនត្រូវឲ្យខ្លាចឡើយ អ្នករាល់គ្នាមានដំឡៃលើសជាងចាបជាច្រើន
ការរកឃើញ : តើព្រះជ្រាបអ្វីខ្លះអំពីសត្វបក្សីនីមួយៗ ហើយតើការណ៍នោះធៀបនឹងអ្វីដែលទ្រង់ជ្រាបអំពីយើងយ៉ាងដូចម្តេចខ្លះ?
ការគិតពិចារណា : តើអ្នកមានអារម្មណ៍យ៉ាងណា ពេលដឹងថាព្រះជាម្ចាស់យល់ច្បាស់ពីអ្នក និងយកចិត្តទុកដាក់ចំពោះអ្នកដូច្នេះ?
យើងឆ្លើយតបទៅនឹងលក្ខណៈរបស់ព្រះ
ព្រះសក្ដិសមនឹងឲ្យយើងថ្វាយបង្គំ គោរព ថ្វាយសិរីល្អ និងសរសើរតម្កើង។ ទំនុកដំកើង ២៩:២ ចែងថា «ចូរសរសើរពីសិរីល្អនៃព្រះយេហូវ៉ាឲ្យសមនឹងព្រះនាមទ្រង់»។
ការរកឃើញ : តើ ទំនុកដំកើង ៣៣:៨ ណែនាំយើងឲ្យឆ្លើយតបនឹងលក្ខណៈរបស់ព្រះដោយរបៀបណា?
ទំនុកដំកើង ៣៣:៨
ចូរឲ្យគ្រប់ផែនដីខ្លាចចំពោះព្រះយេហូវ៉ា ហើយឲ្យគ្រប់មនុស្សនៅលោកីយកោតក្រែងដល់ទ្រង់ចុះ
ជួនកាល ការគោរពចំពោះព្រះ ត្រូវបានគេហៅថា «ការកោតខ្លាចព្រះ»។ នេះមិនមែនមានន័យថាយើងត្រូវខ្លាចរអាទ្រង់ទេ ប៉ុន្តែយើងគោរពទ្រង់ ហើយគោរពសិទ្ធិអំណាច និងព្រះចេស្ដារបស់ទ្រង់ ក្នុងនាមជាព្រះដ៏មានគ្រប់ចេស្តា។ ទំនុកតម្កើង ១៤៧ ពណ៌នាពីព្រះបំណងរបស់ព្រះជាម្ចាស់ ដែលចង់ឲ្យយើងថ្វាយបង្គំទ្រង់។
ទំនុកដំកើង ១៤៧:១០-១១
ទ្រង់មិនសព្វព្រះហឫទ័យនឹងកំឡាំងនៃសេះទេ
ក៏មិនត្រូវការនឹងជើងមនុស្សដែរ
គឺព្រះយេហូវ៉ាទ្រង់សព្វព្រះហឫទ័យតែនឹងអស់អ្នក
ដែលកោតខ្លាចទ្រង់
ហើយនឹងអស់អ្នកដែលសង្ឃឹមដល់សេចក្ដីសប្បុរស
របស់ទ្រង់ប៉ុណ្ណោះ
ការរកឃើញ : តើមានពាក្យពីរ អ្វីខ្លះ ដែលប្រើដើម្បីពណ៌នាពីការឆ្លើយតបរបស់ព្រះ ចំពោះការថ្វាយបង្គំរបស់យើង?
ការគិតពិចារណា : ហេតុអ្វីបានជាការថ្វាយបង្គំរបស់យើង សំខាន់ចំពោះព្រះ?
ការឆ្លើយតបរបស់យើងចំពោះព្រះនឹងរីកចម្រើនឡើង ហើយកាន់តែស៊ីជម្រៅពីមួយពេលទៅមួយពេល នៅពេលយើងស្គាល់ទ្រង់កាន់តែច្បាស់ឡើង។ យើងឃើញនៅក្នុង អេសាយ ៤៣ ថា ព្រះចង់ឲ្យយើងស្គាល់ ជឿ និងយល់ពីទ្រង់។
ការចែកចាយ : តើបច្ចុប្បន្ននេះ អ្នកកំពុងធ្វើអ្វីខ្លះ ដើម្បីស្គាល់ព្រះកាន់តែច្បាស់ក្នុងផ្នែកនីមួយៗនេះ?
នៅពេលអ្នកបន្តចំណាយពេលសិក្សាព្រះបន្ទូលព្រះ សូមបន្តសួរខ្លួនឯង :
- តើមានអ្វីខ្លះ ដែលព្រះចង់ឲ្យខ្ញុំស្គាល់ពីទ្រង់?
- តើការណ៍នោះនឹងផ្លាស់ប្ដូរអ្វីដែលខ្ញុំជឿអំពីទ្រង់យ៉ាងណាខ្លះ?
- តើការណ៍នោះនឹងជួយខ្ញុំឲ្យយល់កាន់តែច្បាស់អំពីទ្រង់ ដោយរបៀបណា?
ការបន្តឆ្ពោះទៅមុខ
ការបញ្ជាក់ : តើអ្នកមានគំនិត ឬសំណួរអ្វីខ្លះ?
ការសង្ខេប : តើមានរបៀបណាខ្លះដែលព្រះបានបើកបង្ហាញអង្គទ្រង់? តើមានអ្វីខ្លះដែលអ្នកបានរៀនអំពីព្រះហឫទ័យរបស់ព្រះ?
ការអនុវត្ត : តើអ្នកចង់ធ្វើអ្វីនៅសប្ដាហ៍នេះ ដើម្បីឲ្យស្គាល់ព្រះកាន់តែច្បាស់?
ការចែកចាយបន្ត : តើអ្នកអាចចែកចាយអំពីអ្វីដែលអ្នកបានរៀនអំពីព្រះ ទៅកាន់នរណា?
ការពង្រឹង:
ពេលអ្នកអានអត្ថបទគម្ពីរទាំងនេះ សូមរកមើលអ្វីដែលអត្ថបទទាំងនេះប្រាប់អ្នកអំពីព្រះ។ ចូរសុំទ្រង់ឲ្យដកចេញនូវទស្សនៈខុសទាំងឡាយដែលអ្នកមានអំពីទ្រង់។
អេសាយ ៤៣:១-១៣
ប៉ុន្តែ ឱពួកយ៉ាកុបអើយ ឥឡូវនេះ ព្រះយេហូវ៉ាជាព្រះដែលបង្កើតឯងមក ហើយឱពួកអ៊ីស្រាអែលអើយ ព្រះដែលជបសូនឯង ទ្រង់មានបន្ទូលដូច្នេះថា កុំឲ្យខ្លាចឡើយ ដ្បិតអញបានលោះឯងហើយ អញបានហៅចំឈ្មោះឯង ឯងជារបស់ផងអញ កាលណាឯងដើរកាត់ទឹកធំ នោះអញនឹងនៅជាមួយ កាលណាដើរកាត់ទន្លេ នោះទឹកនឹងមិនលិចឯងឡើយ កាលណាឯងលុយកាត់ភ្លើង នោះឯងនឹងមិនត្រូវរលាក ហើយអណ្តាតភ្លើងក៏មិនឆាប់ឆេះឯងដែរ ដ្បិតអញនេះ គឺយេហូវ៉ា ជាព្រះនៃឯង អញជាព្រះដ៏បរិសុទ្ធនៃសាសន៍អ៊ីស្រាអែល គឺជាព្រះដ៏សង្គ្រោះរបស់ឯង អញបានឲ្យស្រុកអេស៊ីព្ទទុកជាថ្លៃលោះឯង ព្រមទាំងស្រុកអេធីយ៉ូពី នឹងស្រុកសេបា ជំនួសឯងផង អញនឹងឲ្យមនុស្សដទៃជំនួសឯង ហើយប្រជាជាតិផ្សេងៗ ស្នងនឹងជីវិតឯង ដោយព្រោះឯងមានដំឡៃវិសេសនៅភ្នែកអញ ក៏គួរលើកដំកើង ហើយជាទីស្រឡាញ់ដល់អញផង កុំឲ្យខ្លាចឡើយ ដ្បិតអញនៅជាមួយ អញនឹងនាំពូជពង្សឯងមកពីទិសខាងកើត ហើយនឹងប្រមូលគេមកពីទិសខាងលិច អញនឹងបង្គាប់ដល់ទិសខាងជើងថា ចូរប្រគល់គេមក ហើយដល់ទិសខាងត្បូងថា កុំឃាត់គេទុកឡើយ ចូរនាំអស់ទាំងកូនប្រុសរបស់អញមកពីទីឆ្ងាយ ហើយពួកកូនស្រីអញមកពីចុងផែនដីចុះ គឺគ្រប់មនុស្សដែលបានហៅតាមនាមឈ្មោះអញ ជាអ្នកដែលអញបានបង្កើតមកសំរាប់សិរីល្អនៃអញ គឺជាអ្នកដែលអញបានជបសូន អើ ជាអ្នកដែលអញបានតែងតាំងឡើង។
ចូរនាំមនុស្សខ្វាក់ដែលមានភ្នែក នឹងមនុស្សថ្លង់ដែលមានត្រចៀកចេញមក ត្រូវឲ្យអស់ទាំងសាសន៍ប្រជុំគ្នា ហើយឲ្យប្រជាជាតិទាំងពួងជំនុំគ្នាចុះ ក្នុងពួកគេ តើមានអ្នកណាដែលអាចនឹងទាយពីការនេះបាន ឬអាចនឹងសំដែង ឲ្យយើងដឹងពីដំណើរ ដែលកន្លងមកហើយនោះ ចូរឲ្យគេនាំស្មរបន្ទាល់របស់គេមក ដើម្បីតាំងខ្លួនជាត្រឹមត្រូវ បើមិនដូច្នោះទេ នោះត្រូវថា នេះពិតមែនវិញ ព្រះយេហូវ៉ាទ្រង់មានបន្ទូលថា ឯងរាល់គ្នាជាស្មរបន្ទាល់របស់អញ ហើយជាអ្នកបំរើដែលអញបានរើសតាំង ដើម្បីឲ្យបានស្គាល់ ហើយជឿដល់អញ ព្រមទាំងយល់ថា គឺអញនេះហើយ ឥតមានព្រះណាកើតមកមុនអញទេ ហើយក្រោយអញក៏ឥតមានដែរ គឺអញ អញនេះហើយជាយេហូវ៉ា ក្រៅពីអញ គ្មានអ្នកសង្គ្រោះណាទៀតឡើយ អញបានទាយប្រាប់ អញបានជួយសង្គ្រោះ អញបានសំដែងឲ្យឃើញហើយ ឥតមានព្រះដទៃណានៅកណ្តាលឯងរាល់គ្នាឡើយ ហេតុដូច្នោះ ឯងរាល់គ្នាជាស្មរបន្ទាល់របស់អញ ហើយគឺអញនេះដែលជាព្រះ នេះជាព្រះបន្ទូលនៃព្រះយេហូវ៉ា អើ ចាប់តាំងពីមានពេលថ្ងៃឡើងវេលាណា នោះគឺជាអញនេះហើយ ឥតមានអ្នកណាអាចនឹងដោះឲ្យរួចពីដៃអញបានទេ ឯការដែលអញធ្វើ តើអ្នកណានឹងឃាត់បាន។
អេសាយ ៤០:១-៣១
ព្រះនៃឯងរាល់គ្នា ទ្រង់មានបន្ទូលថា ចូរកំសាន្តទុក្ខ ចូរកំសាន្តទុក្ខរាស្ត្រអញចុះ ត្រូវឲ្យលួងលោមចិត្តនៃក្រុងយេរូសាឡិម ហើយស្រែកប្រាប់គេថា គ្រាធ្វើសឹកសង្គ្រាមរបស់គេបានសំរេចហើយ អំពើទុច្ចរិតរបស់គេក៏បានអត់ទោសឲ្យ ហើយគេបានទទួលសំណង១ជា២ពីព្រះហស្តនៃព្រះយេហូវ៉ា ឲ្យស្នងនឹងអំពើបាបគេដែរ។
មានឮសំឡេង១កំពុងតែស្រែកនៅទីរហោស្ថានថា ចូររៀបចំផ្លូវសំរាប់ទទួលព្រះយេហូវ៉ា ចូរធ្វើឲ្យមានថ្នល់រាបស្មើនៅទីស្ងាត់ ថ្វាយព្រះនៃយើងរាល់គ្នាចុះ ឯគ្រប់ទាំងច្រកភ្នំ នោះនឹងត្រូវលើកឡើង ហើយគ្រប់ទាំងភ្នំធំតូច នឹងត្រូវពង្រាបទៅ នៅកន្លែងណាដែលគ្រលិកគ្រលុក នោះត្រូវធ្វើឲ្យស្មើ ហើយកន្លែងណាដែលរដិបរដុបនឹងត្រូវធ្វើឲ្យរាបចុះ នោះសិរីល្អនៃព្រះយេហូវ៉ានឹងសំដែងមក គ្រប់មនុស្សទាំងឡាយនឹងបានឃើញព្រមគ្នា ដ្បិតព្រះឱស្ឋនៃព្រះយេហូវ៉ាបានមានបន្ទូលហើយ។
មានឮសំឡេង១កំពុងតែថា ចូរប្រកាសចុះ នោះមានម្នាក់សួរថា តើត្រូវឲ្យស្រែកថាដូចម្តេច ចូរថា មនុស្សជាតិទាំងឡាយប្រៀបដូចជាស្មៅ ហើយអំពើដ៏ល្អទាំងប៉ុន្មានរបស់គេក៏ដូចជាផ្កានៅទីវាល ឯស្មៅក៏ស្វិតក្រៀមទៅ ហើយផ្ការោយរុះចុះ ដោយព្រោះខ្យល់នៃព្រះយេហូវ៉ាបក់មកត្រូវ ឯបណ្តាជន គេពិតដូចជាស្មៅដែរ ស្មៅក៏ស្វិតក្រៀម ហើយផ្ការោយរុះចុះ តែព្រះបន្ទូលរបស់ព្រះនៃយើងរាល់គ្នាវិញ នោះស្ថិតស្ថេរនៅជាដរាប។
ឱអ្នកដែលនាំដំណឹងល្អ មកដល់ក្រុងស៊ីយ៉ូនអើយ ចូរឡើងទៅប្រកាសប្រាប់ពីលើភ្នំខ្ពស់ចុះ ឱអ្នកដែលនាំដំណឹងល្អមកដល់ក្រុងយេរូសាឡិមអើយ ចូរបន្លឺសំឡេងឡើងជាខ្លាំង ចូរបន្លឺឡើង កុំខ្លាចឡើយ ចូរប្រាប់ដល់ទីក្រុងនៃស្រុកយូដាទាំងប៉ុន្មានថា មើលន៏ ព្រះនៃអ្នករាល់គ្នា មើល ព្រះអម្ចាស់យេហូវ៉ាទ្រង់នឹងយាងមក ដោយមានព្រះចេស្តា ហើយព្រះពាហុនៃទ្រង់នឹងកាន់កាប់ត្រួតត្រាឲ្យទ្រង់ មើល ទ្រង់នាំយករង្វាន់មកជាមួយ ហើយបំណាច់ដែលទ្រង់សងដល់គេក៏នៅចំពោះទ្រង់ ទ្រង់នឹងឃ្វាលហ្វូងរបស់ទ្រង់ ដូចជាអ្នកគង្វាល ទ្រង់នឹងប្រមូលអស់ទាំងកូនចៀមមកបីនៅព្រះពាហុ ហើយលើកផ្ទាប់នៅព្រះឧរា ក៏នឹងនាំពួកមេៗ ដែលមានកូនខ្ចីទៅដោយថ្នម។
តើអ្នកណាបានវាល់ទឹកទាំងប៉ុន្មាន នៅក្នុងទូកដៃ ហើយវាស់ផ្ទៃមេឃដោយចំអាមដែរ ព្រមទាំងដាក់ធូលីដីទាំងអស់ចុះក្នុងរង្វាល់ ហើយថ្លឹងអស់ទាំងភ្នំធំ ដោយជញ្ជីង នឹងភ្នំតូចទាំងប៉ុន្មានដោយត្រាជូ តើអ្នកណាបានស្ទង់ព្រះវិញ្ញាណនៃព្រះយេហូវ៉ា ឬបានបង្រៀនទ្រង់ដោយខ្លួនធ្វើជាអ្នកជួយប្រឹក្សា តើទ្រង់បានប្រឹក្សានឹងអ្នកណា ហើយអ្នកណាបានពន្យល់ទ្រង់ ឬបង្រៀនទ្រង់ក្នុងផ្លូវយុត្តិធម៌ ឬឲ្យទ្រង់មានចំណេះ ឬបង្ហាញផ្លូវនៃយោបល់ដល់ទ្រង់ មើល អស់ទាំងសាសន៍ប្រៀបដូចជាទឹក១ដំណក់នៅក្នុងថាំង ហើយក៏រាប់ទុកដូចជាលំអងធូលីនៅលើថាសជញ្ជីងដែរ មើល ទ្រង់លើកកោះទាំងប៉ុន្មានឡើង ដូចជារបស់យ៉ាងតិចតួច ឯព្រៃល្បាណូននោះមិនគ្រាន់នឹងដុត ហើយសត្វទាំងប៉ុន្មាននៅព្រៃនោះក៏មិនល្មមនឹងធ្វើជាដង្វាយដុតផង អស់ទាំងសាសន៍រាប់ដូចជាទទេសោះនៅចំពោះទ្រង់ ទ្រង់រាប់គេទុកដូចជាតិចជាងសូន្យទៅទៀត ហើយជាឥតប្រយោជន៍ផង។
ដូច្នេះតើអ្នករាល់គ្នានឹងធៀបផ្ទឹមព្រះ ដូចជាអ្នកណា ឬប្រៀបទ្រង់នឹងភាពអ្វី ឯរូបព្រះ គឺមានជាងម្នាក់បានសិតធ្វើទេ ហើយជាងទង គេស្រោបដោយមាស ក៏ធ្វើខ្សែប្រាក់ឲ្យផង ចំណែកអ្នកណាដែលខ្វះខាតគ្មានល្មមនឹងធ្វើដូច្នោះបាន គេក៏រើសយកឈើដែលមិនចេះពុកវិញ គេរកជាងមានស្នាដៃឲ្យមកឆ្លាក់ធ្វើរូប១ដំកល់ឡើងជាប់ មិនឲ្យត្រូវរើចេញឡើយ
តើអ្នករាល់គ្នាមិនបានដឹងទេឬ តើមិនបានឮ តើឥតមានអ្នកណាប្រាប់ដល់អ្នករាល់គ្នា តាំងពីដើមមក តើអ្នករាល់គ្នាមិនបានយល់សេចក្ដីតាំងពីកំណើតលោកីយរៀងមកទេឬអី គឺព្រះដែលគង់ពីលើរង្វង់ផែនដី ហើយមនុស្សនៅផែនដីប្រៀបដូចជាកណ្តូបវិញ គឺទ្រង់ដែលលាតផ្ទៃមេឃ ដូចជាលាតបារាំ ហើយសន្ធឹងទៅ ដូចជាត្រសាលសំរាប់អាស្រ័យនៅ ទ្រង់ទំលាក់ងារពួកអ្នកគ្រប់គ្រងឲ្យសូន្យទៅ ក៏ធ្វើឲ្យពួកចៅក្រមនៅផែនដីទៅជាឥតប្រយោជន៍ដែរ
អើពួកទាំងនោះនឹងមិនដែលបានដាំចុះឡើយ ក៏នឹងបានសាបព្រោះសឹងតែមិនទាន់ផង អើ ដើមគេនឹងមិនដែលចាក់ឫសចុះក្នុងដីឡើយ ទ្រង់នឹងផ្លុំខ្យល់ទៅ នោះគេនឹងស្វិតក្រៀម រួចខ្យល់កួចនឹងផាត់យកគេទៅ ដូចជាជញ្ជ្រាំង
ដូច្នេះ ព្រះដ៏បរិសុទ្ធទ្រង់មានបន្ទូលថា ឯងរាល់គ្នានឹងប្រៀបផ្ទឹមអញដូចជាអ្នកណា ឲ្យអញបានស្មើនឹងគេនោះ ចូរងើយភ្នែកឯងមើលទៅលើ ហើយពិចារណាពីអ្នកណាដែលបានបង្កើតរបស់ទាំងនេះ ដែលនាំឲ្យពួកពលបរិវារចេញមកតាមចំនួនដូច្នេះ ទ្រង់ក៏ហៅរបស់ទាំងនោះតាមឈ្មោះរៀងរាល់តួ ដោយព្រះចេស្តាដ៏ធំរបស់ទ្រង់ ហើយគ្មានណាមួយខានឡើយ ដោយព្រោះតេជានុភាពដ៏ខ្លាំងក្លាដែរ។
ឱពួកយ៉ាកុបអើយ ហេតុអ្វីបានជានិយាយ ឱពួកអ៊ីស្រាអែលអើយ ហេតុអ្វីបានជាថា ផ្លូវដែលឯងប្រព្រឹត្ត នោះលាក់កំបាំងនឹងព្រះយេហូវ៉ា ហើយរឿងរ៉ាវរបស់ឯងបានរំលងផុតពីព្រះនៃឯងដូច្នេះ តើឯងមិនបានដឹង តើមិនបានឮទេឬអី ថាព្រះដ៏គង់នៅអស់កល្បជានិច្ច គឺព្រះយេហូវ៉ា ជាព្រះដែលបានបង្កើតផែនដី រហូតដល់ចុងបំផុត ទ្រង់មិនដែលល្វើយឡើយ ក៏មិនដែលអស់កំឡាំងផង គ្មានអ្នកណាអាចស្ទង់យល់យោបល់របស់ទ្រង់បានទេ ទ្រង់រមែងចំរើនកំឡាំង ដល់អ្នកដែលល្វើយ ហើយចំណែកអ្នកដែលគ្មានកំឡាំងសោះ នោះទ្រង់ក៏ប្រទានឲ្យ ទោះទាំងពួកជំទង់ គេនឹងល្វើយ ហើយនឿយហត់ទៅបាន ពួកកំឡោះក៏នឹងដួលជ្រលាកបានផង តែអស់អ្នកណាដែលសង្ឃឹមដល់ព្រះយេហូវ៉ាវិញ នោះនឹងមានកំឡាំងចំរើនជានិច្ច គេនឹងហើរឡើងទៅលើ ដោយស្លាប ដូចជាឥន្ទ្រី គេនឹងរត់ទៅឥតដែលហត់ ហើយនឹងដើរឥតដែលល្វើយឡើយ។
កូល៉ុស ១:១៥-២៩
ដែលទ្រង់ជារូបអង្គនៃព្រះដ៏មើលមិនឃើញ ជាបងច្បងនៃគ្រប់ទាំងអស់ ដែលព្រះបានបង្កើតមក ដ្បិតគឺទ្រង់ហើយ ដែលបង្កើតគ្រប់ទាំងអស់ ទាំងរបស់នៅស្ថានសួគ៌ នឹងនៅផែនដី ទាំងរបស់ដែលមើលឃើញ ហើយដែលមើលមិនឃើញផង ទោះបើជារាជ្យ ឬអំណាចជាព្រះអម្ចាស់ ឬអំណាចគ្រប់គ្រង ឬអំណាចណាក៏ដោយ នោះសុទ្ធតែកើតមកដោយសារទ្រង់ ហើយសំរាប់ទ្រង់ទាំងអស់ផង ទ្រង់គង់នៅមុនទាំងអស់ ហើយរបស់ទាំងអស់ក៏នៅស្ថិតស្ថេរ ដោយសារទ្រង់ ទ្រង់ជាសិរសារបស់រូបកាយ គឺជាពួកជំនុំ ទ្រង់ជាដើម ក៏បានរស់ពីស្លាប់ឡើងវិញមុនគេបង្អស់ ដើម្បីឲ្យទ្រង់បានជាប្រធានក្នុងគ្រប់ទាំងអស់ ដ្បិតព្រះបានសព្វព្រះហឫទ័យ ឲ្យគ្រប់ទាំងសេចក្ដីពោរពេញបានស្ថិតនៅក្នុងទ្រង់ ហើយឲ្យបានផ្សះផ្សាគ្រប់ទាំងអស់ ឲ្យជានឹងអង្គទ្រង់ ដោយសារព្រះរាជបុត្រានោះ ទោះបើរបស់នៅស្ថានសួគ៌ ឬនៅផែនដីក្តី ទាំងតាំងស្ពានមេត្រី ដោយសារព្រះលោហិតនៃឈើឆ្កាងទ្រង់
រីឯអ្នករាល់គ្នា ដែលពីដើមត្រូវពង្រាត់ចេញ ហើយជាខ្មាំងសត្រូវក្នុងគំនិត ដោយអំពើអាក្រក់នោះ ឥឡូវនេះវិញ ទ្រង់បានផ្សះផ្សាក្នុងរូបសាច់ទ្រង់ ដោយបានទទួលសុគត ដើម្បីនឹងថ្វាយអ្នករាល់គ្នាជាដង្វាយបរិសុទ្ធ ឥតសៅហ្មង ហើយឥតកន្លែងបន្ទោសបាន នៅចំពោះទ្រង់ នោះគឺបើតិចណាស់ អ្នករាល់គ្នាបានតាំងនៅជាប់លាប់ ហើយមាំមួន ក្នុងសេចក្ដីជំនឿដែរ ឥតងាកបែរចេញពីសេចក្ដីសង្ឃឹមរបស់ដំណឹងល្អ ដែលអ្នករាល់គ្នាបានឮ ជាដំណឹងដែលបានផ្សាយទៅដល់គ្រប់ទាំងមនុស្ស ដែលកើតក្រោមមេឃផង ឯប៉ុលខ្ញុំ ជាអ្នកបំរើចំពោះដំណឹងល្អនោះដែរ។
ឥឡូវនេះ ខ្ញុំមានចិត្តអំណរក្នុងការរងទុក្ខលំបាក ដែលខ្ញុំទ្រាំដោយព្រោះអ្នករាល់គ្នា ហើយសេចក្ដីវេទនាណារបស់ព្រះគ្រីស្ទ ដែលខ្វះក្នុងរូបសាច់ខ្ញុំ នោះខ្ញុំកំពុងតែបំពេញឡើង ដោយព្រោះរូបកាយទ្រង់ គឺជាពួកជំនុំ ខ្ញុំបានត្រឡប់ជាអ្នកបំរើដល់ពួកជំនុំនោះ តាមការកាន់កាប់ត្រួតត្រារបស់ព្រះ ដែលបានប្រគល់មកខ្ញុំសំរាប់អ្នករាល់គ្នា ដើម្បីនឹងបំពេញព្រះបន្ទូល គឺជាសេចក្ដីអាថ៌កំបាំងដែលលាក់ទុក តាំងពីអស់កល្បរៀងរាល់តែដំណតមក តែឥឡូវនេះ បានបើកសំដែងឲ្យពួកបរិសុទ្ធទ្រង់ស្គាល់ ព្រះទ្រង់បានសព្វព្រះហឫទ័យ នឹងសំដែងឲ្យពួកបរិសុទ្ធនោះដឹងថា សិរីល្អដ៏បរិបូររបស់សេចក្ដីអាថ៌កំបាំងនេះជាយ៉ាងណា ក្នុងពួកសាសន៍ដទៃ គឺថា ព្រះគ្រីស្ទទ្រង់សណ្ឋិតនៅក្នុងអ្នករាល់គ្នា ដែលជាទីសង្ឃឹមយ៉ាងឧត្តម យើងខ្ញុំប្រកាសប្រាប់ពីទ្រង់ ទាំងទូន្មានដល់គ្រប់មនុស្ស ហើយទាំងបង្រៀនដល់គ្រប់មនុស្ស ដោយគ្រប់ទាំងប្រាជ្ញា ដើម្បីឲ្យបានថ្វាយគ្រប់មនុស្ស ជាដង្វាយគ្រប់លក្ខណ៍ក្នុងព្រះគ្រីស្ទ ខ្ញុំក៏ខំធ្វើការនោះឯង ទាំងតយុទ្ធតាមឫទ្ធិបារមីទ្រង់ ដែលបណ្តាលឡើងក្នុងខ្ញុំដោយព្រះចេស្តា។
ទំនុកដំកើង ១៤៥:១-២១
ទំនុកជាបទសរសើររបស់ស្តេចដាវីឌ។
ឱព្រះដ៏ជាមហាក្សត្រនៃទូលបង្គំអើយ
ទូលបង្គំនឹងលើកដំកើងទ្រង់
ហើយនឹងសូមឲ្យព្រះនាមទ្រង់បានពរអស់កល្បជានិច្ច
ទូលបង្គំនឹងសូមឲ្យទ្រង់បានប្រកបដោយព្រះពររាល់ៗថ្ងៃ
ព្រមទាំងសរសើរដល់ព្រះនាមទ្រង់អស់កល្បជានិច្ច
ព្រះយេហូវ៉ាទ្រង់ធំប្រសើរ គឺគួរសរសើរយ៉ាងក្រៃលែង
ឯសណ្ឋានធំប្រសើររបស់ទ្រង់ នោះនឹងរកយល់មិនបាន
មនុស្សដំណ១នឹងសរសើរស្នាដៃរបស់ទ្រង់
ដល់ដំណ១ទៀត
ព្រមទាំងប្រកាសប្រាប់ពីការឥទ្ធិឫទ្ធិរបស់ទ្រង់ផង
ទូលបង្គំនឹងរំពឹងគិតពីឫទ្ធានុភាពដ៏រុងរឿងឧត្តម
ហើយពីការអស្ចារ្យរបស់ទ្រង់ដែរ
មនុស្សទាំងឡាយនឹងថ្លែងពីឫទ្ធិនៃការដ៏គួរស្ញែងខ្លាច
របស់ទ្រង់
ឯទូលបង្គំនឹងប្រកាសពីសណ្ឋានដ៏ធំវិសេសនៃទ្រង់ដែរ
គេនឹងបញ្ចេញសេចក្ដីដែលនឹកចាំពីព្រះហឫទ័យ
ដ៏ល្អប្រសើរ
ហើយច្រៀងពីសេចក្ដីសុចរិតរបស់ទ្រង់
ព្រះយេហូវ៉ាទ្រង់ប្រកបដោយមេត្តាករុណា
នឹងអាណិតអាសូរ
ទ្រង់យឺតនឹងខ្ញាល់ ក៏មានសេចក្ដីសប្បុរសដ៏ធំទូលាយ
ព្រះយេហូវ៉ាទ្រង់ល្អដល់មនុស្សទាំងអស់
ហើយព្រះហឫទ័យទន់សន្តោសរបស់ទ្រង់
ក៏គ្របលើកិច្ចការរបស់ទ្រង់ទាំងប៉ុន្មាន
ឱព្រះយេហូវ៉ាអើយ
អស់ទាំងស្នាដៃរបស់ទ្រង់នឹងអរព្រះគុណដល់ទ្រង់
ហើយពួកអ្នកបរិសុទ្ធរបស់ទ្រង់នឹងសូមឲ្យទ្រង់បានប្រកប
ដោយព្រះពរ
គេនឹងថ្លែងពីសិរីល្អនៃនគរទ្រង់
នឹងពីតេជានុភាពរបស់ទ្រង់
ប្រយោជន៍ឲ្យពួកមនុស្សជាតិបានស្គាល់
អស់ទាំងការឥទ្ធិឫទ្ធិរបស់ទ្រង់
ហើយនឹងសិរីល្អនៃឫទ្ធានុភាពរបស់រាជ្យទ្រង់
រាជ្យទ្រង់ស្ថិតស្ថេរនៅអស់កល្បជានិច្ច
ហើយអំណាចទ្រង់ក៏នៅ ដរាបដល់អស់ទាំងដំណតទៅ
ព្រះយេហូវ៉ាទ្រង់គាំទ្រដល់អស់អ្នកដែលដួល
ក៏លើកពួកអ្នកដែលត្រូវឱនឡើងវិញ
ភ្នែករបស់មនុស្សទាំងអស់រង់ចាំតែទ្រង់
ហើយទ្រង់ក៏ប្រទានអាហារដល់គេតាមត្រូវពេល
ទ្រង់លាព្រះហស្ត ក៏បំពេញចិត្តប្រាថ្នានៃជីវិតទាំងឡាយ
ព្រះយេហូវ៉ាទ្រង់សុចរិតក្នុងគ្រប់ទាំងផ្លូវទ្រង់
ក៏សប្បុរសក្នុងគ្រប់ទាំងកិច្ចការរបស់ទ្រង់ដែរ
ព្រះយេហូវ៉ាទ្រង់គង់នៅជិតនឹងអស់អ្នក
ដែលអំពាវនាវដល់ទ្រង់
គឺអស់អ្នកដែលអំពាវនាវដល់ទ្រង់ដោយពិតត្រង់
ទ្រង់នឹងបំពេញបំណងចិត្តនៃអស់អ្នកដែលកោតខ្លាច
ដល់ទ្រង់
ក៏នឹងឮពាក្យអំពាវនាវរបស់គេ
ព្រមទាំងជួយសង្គ្រោះគេផង
ព្រះយេហូវ៉ាទ្រង់រមែងការពារអស់អ្នក
ដែលស្រឡាញ់ទ្រង់
តែនឹងបំផ្លាញពួកមនុស្សអាក្រក់វិញ
មាត់ទូលបង្គំនឹងពោលពាក្យសរសើរពីព្រះយេហូវ៉ា
គួរឲ្យមនុស្សទាំងឡាយ បានសូមឲ្យព្រះនាមបរិសុទ្ធ
របស់ទ្រង់បានពរ នៅអស់កល្បជានិច្ចដែរ។
ទំនុកដំកើង ១៤៧:១-២០
ចូរសរសើរដល់ព្រះយេហូវ៉ា
ដ្បិតការដែលច្រៀងសរសើរ
ដល់ព្រះនៃយើងខ្ញុំ
នោះជាការសំណំហើយ ក៏ពីរោះផង
សេចក្ដីសរសើរជាការគួរគប្បី
ព្រះយេហូវ៉ាទ្រង់កំពុងតែសង់ក្រុងយេរូសាឡិមឡើង
ទ្រង់កំពុងតែប្រមូលពួកសាសន៍អ៊ីស្រាអែល
ដែលត្រូវបំបរទៅជាឈ្លើយ មកវិញ
ទ្រង់ប្រោសអស់អ្នកដែលមានចិត្តសង្រេងឲ្យបានជា
ក៏រុំរបួសឲ្យគេផង
ទ្រង់រាប់ចំនួននៃអស់ទាំងផ្កាយ
ក៏ហៅបានតាមឈ្មោះទាំងអស់
ព្រះអម្ចាស់នៃយើងខ្ញុំទ្រង់ធំប្រសើរ
ហើយមានឫទ្ធានុភាពក្រៃលែង
ឯប្រាជ្ញាញាណរបស់ទ្រង់ក៏យល់គ្រប់ទាំងអស់
ព្រះយេហូវ៉ាទ្រង់ទប់ទល់មនុស្សរាបសា
តែបង្ក្រាបពួកមនុស្សអាក្រក់ចុះដល់ដីវិញ
ចូរច្រៀងថ្វាយព្រះយេហូវ៉ា ដោយពាក្យអរព្រះគុណ
ចូរច្រៀងបទសរសើរដល់ព្រះនៃយើងខ្ញុំ ដោយចាប់ស៊ុង
ទ្រង់បាំងមេឃដោយពពក ក៏ចាត់ចែងភ្លៀងសំរាប់ផែនដី
ហើយធ្វើឲ្យមានស្មៅដុះឡើងនៅលើភ្នំ
ទ្រង់ប្រទានអាហារដល់សត្វទាំងប៉ុន្មាន
ព្រមទាំងដល់កូនក្អែកដែលយំផង
ទ្រង់មិនសព្វព្រះហឫទ័យនឹងកំឡាំងនៃសេះទេ
ក៏មិនត្រូវការនឹងជើងមនុស្សដែរ
គឺព្រះយេហូវ៉ាទ្រង់សព្វព្រះហឫទ័យតែនឹងអស់អ្នក
ដែលកោតខ្លាចទ្រង់
ហើយនឹងអស់អ្នកដែលសង្ឃឹមដល់សេចក្ដីសប្បុរស
របស់ទ្រង់ប៉ុណ្ណោះ
ឱក្រុងយេរូសាឡិមអើយ ចូរសរសើរដល់ព្រះយេហូវ៉ា
ឱក្រុងស៊ីយ៉ូនអើយ ចូរសរសើរដល់ព្រះនៃឯងចុះ
ដ្បិតទ្រង់បានធ្វើឲ្យរនុកទ្វារឯងបានមាំមួនឡើង
ក៏បានប្រទានពរដល់កូនចៅនៅកណ្តាលឯងដែរ
ទ្រង់ធ្វើឲ្យមានសេចក្ដីសុខ នៅក្នុងដែនខេត្តរបស់ឯង
ទ្រង់ចំអែតឯង ដោយស្រូវសាលីយ៉ាងល្អបំផុត
ទ្រង់ចាត់ព្រះរាជបញ្ជាមកលើផែនដី
ព្រះបន្ទូលទ្រង់ក៏រត់លឿនណាស់ផង
ទ្រង់ប្រទានហិមៈមក ឲ្យដូចជារោមចៀម
ក៏បាចសាចសន្សើមកកដូចជាផែះ
ទ្រង់បោះទឹកកករបស់ទ្រង់មកជាដុំៗ
តើមានអ្នកណានឹងទ្រាំចំពោះពេលរងារបស់ទ្រង់បាន
ទ្រង់បញ្ចេញព្រះបន្ទូលទៅរំលាយទាំងអស់វិញ
ទ្រង់ធ្វើឲ្យខ្យល់របស់ទ្រង់បកមក នោះទឹកក៏ហូរ
ទ្រង់សំដែងព្រះបន្ទូលដល់យ៉ាកុប
ហើយបញ្ញត្ត នឹងច្បាប់របស់ទ្រង់ ដល់អ៊ីស្រាអែល
ទ្រង់មិនដែលប្រព្រឹត្តនឹងសាសន៍ណាទៀត
យ៉ាងនោះឡើយ
ឯច្បាប់ទាំងប៉ុន្មានរបស់ទ្រង់ គេមិនបានស្គាល់ទេ
ចូរសរសើរដល់ព្រះយេហូវ៉ាចុះ។
ហេព្រើរ ២:១៤-១៨
ដូច្នេះ ដែលកូនចៅបានប្រកបដោយសាច់ឈាមព្រមគ្នា នោះទ្រង់ក៏ទទួលចំណែកជាសាច់ឈាមដូច្នោះដែរ ដើម្បីឲ្យទ្រង់បានបំផ្លាញអានោះ ដែលមានអំណាចលើសេចក្ដីស្លាប់ គឺជាអារក្ស ដោយទ្រង់សុគត ហើយឲ្យបានប្រោសដល់ពួកអ្នកនោះ ដែលជាប់ជាបាវបំរើគ្រប់១ជីវិត ដោយខ្លាចស្លាប់ ឲ្យបានរួចចេញវិញ ដ្បិតច្បាស់ជាទ្រង់មិនបានយកពួកទេវតាទេ គឺបានយកពូជលោកអ័ប្រាហាំវិញ ហេតុនោះបានជាគួរឲ្យទ្រង់បានដូចបងប្អូនទ្រង់គ្រប់ជំពូកដែរ ដើម្បីឲ្យបានធ្វើជាសំដេចសង្ឃ ដែលមានព្រះទ័យមេត្តាករុណា ហើយក៏ស្មោះត្រង់ក្នុងការទាំងប៉ុន្មានខាងឯព្រះ ប្រយោជន៍នឹងថ្វាយដង្វាយ ឲ្យធួននឹងបាបរបស់ប្រជាជនទាំងឡាយ ដ្បិតដែលទ្រង់បានរងទុក្ខលំបាក ទាំងត្រូវសេចក្ដីល្បួង នោះទ្រង់ក៏អាចនឹងជួយដល់អស់អ្នក ដែលត្រូវសេចក្ដីល្បួងបានដែរ។
ហេព្រើរ ៤:១៤-១៦
ដូច្នេះ ដែលមានសំដេចសង្ឃយ៉ាងធំ១អង្គ ដែលទ្រង់បានយាងកាត់អស់ទាំងជាន់ស្ថានសួគ៌ គឺព្រះយេស៊ូវ ជាព្រះរាជបុត្រានៃព្រះ នោះត្រូវតែឲ្យយើងមានចិត្តដាច់ស្រឡះនឹងជឿតាមចុះ ដ្បិតសំដេចសង្ឃនៃយើង ទ្រង់មិនមែនមិនអាចនឹងអាណិតអាសូរ ដល់សេចក្ដីកំសោយរបស់យើងរាល់គ្នានោះទេ ព្រោះទ្រង់បានត្រូវសេចក្ដីល្បួងគ្រប់យ៉ាង ដូចជាយើងរាល់គ្នាដែរ តែឥតធ្វើបាបឡើយ ដូច្នេះ ត្រូវឲ្យយើងរាល់គ្នាមកដល់បល្ល័ង្កនៃព្រះគុណ ដោយក្លាហាន ដើម្បីនឹងទទួលសេចក្ដីមេត្តា ហើយរកបានព្រះគុណសំរាប់នឹងជួយដល់ពេលត្រូវការចុះ។