តើអ្នកបានកត់សម្គាល់ឃើញព្រះវត្តមានរបស់ព្រះវិញ្ញាណបរិសុទ្ធក្នុងជីវិតរបស់អ្នកក្នុងសប្តាហ៍នេះ ដោយរបៀបណាខ្លះ?
នៅពេលយើងមានភាពចាស់ទុំក្នុងព្រះគ្រីស្ទ នោះយើងកាន់តែយល់ដឹងអំពីកិច្ចការរបស់ព្រះវិញ្ញាណក្នុងជីវិតរបស់យើង។
ជីវិតរស់នៅតាមរយៈវិញ្ញាណរបស់ទ្រង់
ប្រសិនបើអ្នកបានវះកាត់បេះដូងដើម្បីដាក់ថ្ម ដើម្បីឲ្យបេះដូងដំណើរការ តើអ្នកគិតថា អ្នកនឹងអាចដឹងពីតួនាទីរបស់ថ្មបេះដូងនោះនៅក្នុងជីវិតរបស់អ្នកតាមរបៀបណា?
កិច្ចការរបស់ព្រះវិញ្ញាណបរិសុទ្ធនៅក្នុងជីវិតរបស់យើងចាប់ផ្តើមឡើង សូម្បីតែមុនពេលយើងទទួលជឿព្រះគ្រីស្ទ នៅពេលដែលទ្រង់បានបង្ហាញយើងថាយើងត្រូវងាកមករកព្រះយេស៊ូវ (យ៉ូហាន ១៦:៨-១១).
ការចែកចាយ : តើព្រះវិញ្ញាណបរិសុទ្ធបានបង្ហាញថា អ្នកត្រូវការព្រះយេស៊ូវដោយរបៀបណា?
ព្រះវិញ្ញាណនៅតែមានតួនាទីដ៏សំខាន់ ខណៈដែលទ្រង់ប្រទានជីវិតដល់យើង។ សូមមើលកិច្ចការរបស់ព្រះវិញ្ញាណនៅក្នុង យ៉ូហាន ៣:៦-៧ និង រ៉ូម ៨:១១.
យ៉ូហាន ៣:៦-៧
របស់អ្វីដែលកើតពីសាច់ នោះជាសាច់ទេ ហើយដែលកើតពីព្រះវិញ្ញាណ នោះជាវិញ្ញាណវិញ កុំឲ្យឆ្ងល់ពីពាក្យដែលខ្ញុំប្រាប់ថា ត្រូវតែកើតជាថ្មីនោះឡើយ
រ៉ូម ៨:១១
មួយទៀត បើព្រះវិញ្ញាណនៃព្រះអង្គ ដែលបានប្រោសឲ្យព្រះយេស៊ូវរស់ពីស្លាប់ឡើងវិញ ទ្រង់សណ្ឋិតក្នុងខ្លួនអ្នករាល់គ្នា នោះព្រះអង្គនោះឯង ដែលបានប្រោសឲ្យព្រះគ្រីស្ទរស់ពីស្លាប់ឡើង ទ្រង់នឹងប្រោសរូបកាយនៃអ្នករាល់គ្នាដែលទៀងតែស្លាប់ ឲ្យមានជីវិតឡើងដែរ ដោយសារព្រះវិញ្ញាណទ្រង់ ដែលសណ្ឋិតនៅក្នុងខ្លួនអ្នករាល់គ្នា។
ការរកឃើញ : តើព្រះយេស៊ូវមានបន្ទូលថាយើងទទួលជីវិតថ្មីដោយរបៀបណា?
ការរកឃើញ : តើអ្វីជាប្រភពនៃជីវិតរបស់អ្នកនៅសព្វថ្ងៃនេះ? តើស្ថានភាពរបស់អ្នកនឹងទៅជាយ៉ាងណា បើគ្មានទ្រង់?
ការគិតពិចារណា : ពេញមួយថ្ងៃរបស់អ្នក តើអ្នកដឹងដល់កម្រិតណាថា ព្រះវិញ្ញាណបរិសុទ្ធកំពុងប្រទានជីវិតដល់អ្នក? តើអ្វីដែលរារាំង
អ្នកមិនឲ្យយល់ឃើញបែបនេះ?
ទីតុស ៣:៤-៥ ចែងថា ព្រះវិញ្ញាណបរិសុទ្ធ បង្កើតយើងជាថ្មី និង ផ្លាស់ប្រែ យើងជាថ្មី។ ការកើតជាថ្មី កើតឡើងភ្លាមៗនៅពេលយើងទទួលការសង្គ្រោះ នៅពេលយើងកើតជាថ្មី ប៉ុន្តែដំណើរការនៃការផ្លាស់ប្រែជាថ្មី គឺពាក់ព័ន្ធនឹងការឆ្លើយតបរបស់យើងចំពោះព្រះវិញ្ញាណបរិសុទ្ធ។
ទីតុស ៣:៤-៥
តែកាលសេចក្ដីសប្បុរសរបស់ព្រះដ៏ជាព្រះអង្គសង្គ្រោះនៃយើង នឹងសេចក្ដីស្រឡាញ់របស់ទ្រង់ដល់មនុស្ស បានលេចមកឲ្យឃើញ នោះទ្រង់បានជួយសង្គ្រោះយើង មិនមែនដោយការដែលយើងបានប្រព្រឹត្តដោយសុចរិតនោះទេ គឺដោយសេចក្ដីមេត្តាករុណារបស់ទ្រង់វិញ ដោយសារការសំអាតនៃសេចក្ដីកើតជាថ្មី ហើយការប្រោសជាថ្មីឡើងវិញនៃព្រះវិញ្ញាណបរិសុទ្ធ . . .
ការឲ្យព្រះវិញ្ញាណគ្រប់គ្រង
ដើម្បីឲ្យព្រះវិញ្ញាណផ្លាស់ប្រែយើង យើងត្រូវតែមានឆន្ទៈទទួលយកការដឹកនាំរបស់ព្រះ ហើយថ្វាយឲ្យទ្រង់គ្រប់គ្រងជីវិតរបស់យើង។ បន្ទាប់ពីរស់នៅជាច្រើនឆ្នាំដោយ «ខ្លួនឯង» ជាអ្នកគ្រប់គ្រង ចិត្តគំនិតរបស់យើងត្រូវតែផ្លាស់ប្រែជាថ្មី។ ជំហានដ៏សំខាន់មួយក្នុងការផ្លាស់ប្រែជាថ្មីនេះ គឺការទទួលស្គាល់ថាព្រះទ្រង់ជាម្ចាស់ដ៏ត្រឹមត្រូវនៃជីវិតរបស់យើង។ សូមអាន ១ កូរិនថូស ៦:១៩-២០.
១ កូរិនថូស ៦:១៩-២០
តើមិនដឹងទេឬអីថា រូបកាយអ្នករាល់គ្នាជាវិហារនៃព្រះវិញ្ញាណបរិសុទ្ធ ដែលអ្នករាល់គ្នាបានទទួលមកពីព្រះ ហើយអ្នករាល់គ្នាមិនមែនជារបស់ផងខ្លួនទេ ដ្បិតព្រះទ្រង់បានចេញថ្លៃលោះអ្នករាល់គ្នាហើយ ដូច្នេះ ចូរដំកើងព្រះនៅក្នុងរូបកាយ ហើយក្នុងវិញ្ញាណនៃអ្នករាល់គ្នា ដែលជារបស់ផងទ្រង់ចុះ។
ការរកឃើញ : តើព្រះអង្គបានលោះអ្នកដោយរបៀបណា? (ព្រះគម្ពីរក៏ប្រើពាក្យ «ប្រោសលោះ»)។ តើទ្រង់បានបង់ថ្លៃអ្វី ដើម្បីលោះអ្នក?
ការពិភាក្សា : តើម្ចាស់មានសិទ្ធិអ្វីខ្លះ?
ការគិតពិចារណា : នៅពេលដែលយើងលើកតម្កើងនរណាម្នាក់ យើងទទួលស្គាល់ការរួមចំណែក ឬតួនាទីរបស់ពួកគេ។ តើអ្នកគិតថាវាមានន័យយ៉ាងណា ក្នុងការលើកតម្កើងព្រះនៅក្នុងរូបកាយអ្នក?
សូមពិចារណាអំពីគំនូសតាងដ្យាក្រាមទាំងនេះ ដែលបង្ហាញពីការឆ្លើយតបផ្សេងៗគ្នាដែលមនុស្សអាចមានចំពោះការគ្រប់គ្រងរបស់ព្រះ នៅលើជីវិតរបស់ពួកគេ។ សូមអានខគម្ពីរដែលពិពណ៌នាអំពីមនុស្សប្រភេទនីមួយៗ បន្ទាប់មកសូមឆ្លើយសំណួរទាំងនេះ ៖
ការរកឃើញ : តើព្រះវិញ្ញាណបរិសុទ្ធមានតួនាទីអ្វីនៅក្នុងជីវិតរបស់មនុស្សម្នាក់ៗ?
ការរកឃើញ : តើ «ខ្លួនយើង» ឆ្លើយតបទៅនឹងព្រះវិញ្ញាណក្នុងស្ថានភាពនីមួយៗយ៉ាងដូចម្ដេច ?
បុគ្គលដែលមិនស្ថិតនៅក្នុងអង្គព្រះគ្រីស្ទ
រ៉ូម ៨:៩ អ្នកណាគ្មានព្រះវិញ្ញាណរបស់
ព្រះគ្រីស្ទ អ្នកនោះមិនមែនជារបស់ផងទ្រង់ទេ។
យ៉ូហាន ១៦:៨ «កាលណាទ្រង់ [ព្រះវិញ្ញាណ] បានយាងមកហើយ នោះទ្រង់នឹងសំដែង ឲ្យមនុស្សលោកដឹងច្បាស់ ពីអំពើបាប ពីសេចក្ដីសុចរិត ហើយពីសេចក្ដីជំនុំជំរះ។»
១ កូរិនថូស ២:១៤ ប៉ុន្តែ មនុស្សខាងសាច់ឈាម គេមិនទទួលសេចក្ដីខាងឯព្រះវិញ្ញាណនៃព្រះទេ . . .
១ ពេត្រុស ៤:៥ . . . តែគេនឹងត្រូវរាប់រៀបទូលដល់ព្រះវិញ ដែលទ្រង់រៀបនឹងជំនុំជំរះ ទាំងមនុស្សរស់នឹងមនុស្សស្លាប់។
អ្នកជឿដែលមានព្រះវិញ្ញាណគ្រប់គ្រង
រ៉ូម ៨:៤-៦ . . . ដើម្បីឲ្យសេចក្ដីដែលក្រិត្យវិន័យបង្គាប់មក បានសំរេចក្នុងខ្លួនយើងរាល់គ្នា ដែលមិនដើរតាមសាច់ឈាម គឺដើរតាមព្រះវិញ្ញាណវិញ. . . តែអស់អ្នកណាដែលតាមព្រះវិញ្ញាណ នោះគិតតែខាងវិញ្ញាណវិញ. . . ឯគំនិតនៃព្រះវិញ្ញាណ នោះទើបជាជីវិត នឹងសេចក្ដីសុខសាន្តវិញ។
កាឡាទី ៥:២៥ បើសិនជាយើងរស់ដោយនូវព្រះវិញ្ញាណ នោះត្រូវដើរដោយព្រះវិញ្ញាណដែរ។
អ្នកជឿដែលរស់នៅតាម «សាច់ឈាម»
រ៉ូម ៨:៥, ៧ ពីព្រោះអស់អ្នកណាដែលតាមសាច់ឈាម នោះគិតតែខាងសាច់ឈាម. . . ព្រោះគំនិតខាងសាច់ឈាម នោះរមែងទាស់ទទឹងនឹងព្រះ ដ្បិតមិនចុះចូលនឹងក្រិត្យវិន័យរបស់ព្រះទេ. . .
កាឡាទី ៣:៣ តើអ្នករាល់គ្នាជាមនុស្សឥតបើគិតជាខ្លាំងដល់ម៉្លេះឬអី ដែលបានចាប់ផ្តើម ដោយព្រះវិញ្ញាណហើយ តើឥឡូវនេះបានគ្រប់លក្ខណ៍ឡើង ដោយសាច់ឈាមវិញឬ ?
ការពិភាក្សា : តើអ្វីដែលធ្វើឲ្យអ្នកជឿទាំងពីរប្រភេទមានភាពខុសគ្នា?
ការពិភាក្សា : យើងអាននៅក្នុង រ៉ូម ៨:៦ ថា «ឯគំនិតនៃព្រះវិញ្ញាណ នោះទើបជាជីវិត នឹង
សេចក្ដីសុខសាន្តវិញ» តើអ្នកនឹងពណ៌នាថាមនុស្សម្នាក់ៗស្ថិតនៅត្រង់ចំណុចណា នៅក្នុងដំណើរការដែលគំនិតរបស់ពួកគេត្រូវបានផ្លាស់ប្រែជាថ្មី?
ការចែកចាយ : តើអ្នកមានបទពិសោធយ៉ាងណាខ្លះ ជាមួយនឹងស្ថានភាពនីមួយៗទាំងនេះ?
ការជ្រើសរើសឲ្យព្រះវិញ្ញាណគ្រប់គ្រង
សូមស្រមៃថា អ្នកជាតៃកុងឡាន ប៉ុន្តែអ្នកមិនប្រាកដថាត្រូវទៅទីណា អ្នកមិនទាន់ចេះបើករថយន្តនោះច្បាស់ ហើយក៏មិនដឹងពីការលំបាកនៃស្ថានភាពផ្លូវខាងមុខដែរ។ ក្នុងស្ថានភាពនេះ តើមានអត្ថប្រយោជន៍អ្វីខ្លះ ក្នុងការប្រគល់ការបើកបរឡានទៅដល់អ្នកបើកបរដែលបានផលិតរថយន្ត រៀបចំផ្លូវ និងរៀបចំផែនការធ្វើដំណើរ?
ឧទាហរណ៍នេះមានលក្ខណៈសាមញ្ញ ប៉ុន្តែវាឆ្លុះបញ្ចាំងពីជម្រើសដែលយើងមាន។ យើងអាចទទូចបើកបររថយន្ដនោះដោយខ្លួនឯងបាន ប៉ុន្តែប្រសិនបើយើងធ្វើដូច្នេះ យើងបោះបង់អត្ថប្រយោជន៍ក្នុងការមានអ្នកបើកបរដែលល្អបំផុតហើយ។ សូមស្រមៃថា អ្នកនឹងមានសេរីភាពយ៉ាងណា បើអ្នកជិះក្នុងរថយន្ដក្នុងនាមជាអ្នកដំណើរ ហើយមើលទេសភាពតាមផ្លូវដោយរីករាយ ជាជាងខ្វល់ខ្វាយពីការបើកបរ។
សូមអាន អេភេសូរ ៥:១៧-១៨.
អេភេសូរ ៥:១៧-១៨
ដូច្នេះ កុំឲ្យខ្លៅល្ងង់ឡើយ ត្រូវខំឲ្យយល់បំណងព្រះហឫទ័យព្រះអម្ចាស់វិញ កុំឲ្យស្រវឹងស្រា ដែលនាំឲ្យព្រើលចិត្តឡើយ តែចូរឲ្យបានពេញជាព្រះវិញ្ញាណវិញ . . .
ការរកឃើញ : តើអ្វីជាព្រះហឫទ័យរបស់ព្រះអម្ចាស់?
ការគិតពិចារណា : តើការស្រវឹងស្រា ជះឥទ្ធិពល និងគ្រប់គ្រងអាកប្បកិរិយារបស់នរណាម្នាក់ដោយរបៀបណា?
ការគិតពិចារណា : តើនឹងមានលក្ខណៈបែបណា បើវិញ្ញាណរបស់ព្រះជះឥទ្ធិពល និងគ្រប់គ្រងជីវិតរបស់យើងបែបនោះ?
ការមានព្រះគ្រប់គ្រងជីវិតរបស់អ្នកទាំងស្រុង គឺជាអត្ថន័យអំពីការបានពោរពេញដោយព្រះវិញ្ញាណ។ ទោះបីជាយើងឃើញយ៉ាងច្បាស់ថា ព្រះចង់ឲ្យយើងធ្វើបែបនេះ ហើយដើម្បីជាប្រយោជន៍ដល់យើង ក៏ជាញឹកញាប់យើងនៅតែប្រឆាំង មិនព្រមអនុញ្ញាតឲ្យទ្រង់គ្រប់គ្រងដែរ។
តើអ្នកធ្លាប់ជិះឡានជាមួយអ្នកដំណើរដែលចង់ធ្វើជាតៃកុងទេ? (ប្រហែលជាអ្នកធ្លាប់ធ្វើជាអ្នកដំណើរបែបនោះ!) តើអ្នកដំណើរអាចធ្វើអ្វី ឬនិយាយអ្វីខ្លះ? តើអ្នកនឹងនិយាយថា អ្នកដំណើរនោះមានឥរិយាបថបែបណា?
និស្ស័យរបស់មនុស្សធ្វើឲ្យយើងប្រាថ្នាចង់ដឹកនាំជីវិតខ្លួនឯង។ យើងប្រហែលជាគិតថាយើងអាចធ្វើកិច្ចការនោះបានល្អជាង ឬប្រហែលជាយើងខ្លាចកន្លែងដែលព្រះនឹងដឹកនាំយើងទៅ។ សូមពិចារណាអំពីអ្វីដែលធ្វើឲ្យអ្នកមានការពិបាកក្នុងការអនុញ្ញាតឲ្យព្រះវិញ្ញាណដឹកនាំ។
ការគិតពិចារណា : តើអ្វីដែលបណ្តាលឲ្យអ្នកចង់បន្តគ្រប់គ្រងខ្លួនឯង?
ការពិភាក្សា : តើសម្ពាធអ្វីខ្លះនៅក្នុងសង្គម ដែលធ្វើឲ្យយើងកាន់តែមានបំណងចិត្តចង់គ្រប់គ្រងខ្លួនយើងកាន់តែខ្លាំង?
ការគិតពិចារណា : តើអ្នកមានការភ័យខ្លាច ឬកង្វល់អ្វីខ្លះអំពីការឲ្យព្រះគ្រប់គ្រង?
ការចែកចាយ : តើអ្នកមានបទពិសោធបែបណា ក្នុងការថ្វាយការគ្រប់គ្រងទៅកាន់ព្រះ?
ការសម្រេចចិត្តថ្វាយការគ្រប់គ្រងដល់ព្រះវិញ្ញាណ អាចជាចំណុចរបត់ដ៏សំខាន់មួយក្នុងជីវិតរបស់យើង។ នៅពេលយើងធ្វើការជ្រើសរើសនោះ យើងមានបទពិសោធអំពីការរីកចម្រើននៅក្នុងជំនឿរបស់យើង នៅពេលយើងរៀន «ដើរតាមព្រះវិញ្ញាណ» (កាឡាទី ៥:២៥).
ការចែកចាយ : តើមានចំណុចរបត់ណាមួយ ដែលអ្នកបានថ្វាយការគ្រប់គ្រងជីវិតរបស់អ្នកទៅកាន់ព្រះទេ?
តើនេះជាជម្រើសដែលអ្នកចង់ធ្វើឥឡូវនេះទេ?
ការប្រតិបត្តិតាមព្រះវិញ្ញាណ
យើងត្រូវជ្រើសរើសប្រតិបត្តិតាមព្រះវិញ្ញាណឲ្យបានខ្ជាប់ខ្ជួន។ ដូចអ្នកដំណើរនៅក្នុងរថយន្តដែលចង់បើកបរ យើងប្រហែលជាចាប់ដៃចង្កូតពីព្រះវិញ្ញាណ ហើយកាន់ចង្កូតបើកវិញ។ ឬយើងប្រហែលជាដឹងថា យើងបានចូលទៅគ្រប់គ្រងខ្លួនយើង ជំនួសទ្រង់ទៀត។
នៅក្នុង អេភេសូរ ជំពូក ៤ យើងត្រូវបានណែនាំឲ្យបោះបង់នូវចរិតចាស់របស់យើង និងរបៀបរស់នៅពីមុនចោល។
អេភេសូរ ៤:៣០
កុំធ្វើឲ្យព្រះវិញ្ញាណបរិសុទ្ធនៃព្រះបានព្រួយព្រះហឫទ័យ ដែលទ្រង់ដៅចំណាំអ្នករាល់គ្នា ទុកសំរាប់ដល់ថ្ងៃប្រោសលោះនោះឡើយ
ការរកឃើញ : តើអេភេសូរ ៤:៣០ ដាស់តឿនយើងកុំឲ្យធ្វើអ្វី?
ការគិតពិចារណា : តើអ្វីនឹងធ្វើឲ្យព្រះវិញ្ញាណបរិសុទ្ធព្រួយព្រះហឫទ័យ?
អំពើបាបមិនបណ្តាលឲ្យព្រះវិញ្ញាណបរិសុទ្ធចាកចេញពីយើងទេ ប៉ុន្តែវាបានបំបែកការរួមប្រកបរបស់យើងជាមួយនឹងព្រះ។ បើដូច្នោះមែន ការរួមប្រកបនោះចាំបាច់ត្រូវស្ដារឡើងវិញ។
«ការដកដង្ហើមខាងវិញ្ញាណ» គឺជាគោលគំនិតមួយដែលជួយយើងឲ្យថ្វាយការគ្រប់គ្រងទៅកាន់ព្រះវិញ្ញាណ ហើយផ្លាស់ប្រែចិត្តគំនិតយើងជាថ្មី។ សូមពិនិត្យមើលអត្ថបទគម្ពីរទាំងនេះ។
ការដកដង្ហើមចេញ – លន់តួ (សារភាព) អំពើបាបរបស់អ្នក ៖ ១ យ៉ូហាន ១:៩
១ យ៉ូហាន ១:៩
បើយើងលន់តួបាបវិញ នោះទ្រង់មានព្រះហឫទ័យស្មោះត្រង់ ហើយសុចរិត ប្រយោជន៍នឹងអត់ទោសបាបឲ្យយើង ហើយនឹងសំអាតយើង ពីគ្រប់អំពើទុច្ចរិតទាំងអស់ផង
ការរកឃើញ : នៅពេលដែលយើងលន់តួបាប ឬសារភាព តើយើងទទួលស្គាល់ថាអ្នកណាជាអ្នកគ្រប់គ្រង?
ការពិភាក្សា : ហេតុអ្វីកិច្ចការនេះសំខាន់?
ការដកដង្ហើមចូល - អនុញ្ញាតឲ្យព្រះវិញ្ញាណបំពេញអ្នក ៖ អេភេសូរ ៥:១៧-១៨
អេភេសូរ ៥:១៧-១៨
ដូច្នេះ កុំឲ្យខ្លៅល្ងង់ឡើយ ត្រូវខំឲ្យយល់បំណងព្រះហឫទ័យព្រះអម្ចាស់វិញ កុំឲ្យស្រវឹងស្រា ដែលនាំឲ្យព្រើលចិត្តឡើយ តែចូរឲ្យបានពេញជាព្រះវិញ្ញាណវិញ . . .
ការរកឃើញ : តើព្រះជាម្ចាស់មានព្រះហឫទ័យចង់ឲ្យព្រះវិញ្ញាណធ្វើអ្វីនៅក្នុងជីវិតរបស់យើង?
ការរកឃើញ : យោងតាម ១ យ៉ូហាន ៥:១៤-១៥តើយើងអាចប្រាកដចិត្តថា ព្រះវិញ្ញាណនឹងបំពេញយើងដោយរបៀបណា ប្រសិនបើយើងទូលសុំ?
១ យ៉ូហាន ៥:១៤-១៥
យើងក៏មានសេចក្ដីក្លាហាន ដល់ទ្រង់យ៉ាងដូច្នេះដែរ គឺថា បើយើងនឹងសូមអ្វី ដែលត្រូវតាមព្រះហឫទ័យទ្រង់ នោះទ្រង់នឹងទទួលព្រម បើយើងដឹងថា ទ្រង់ទទួលព្រមតាមយើង ក្នុងការអ្វីដែលយើងសូមដូច្នេះ នោះយើងក៏ដឹងថា យើងបានអ្វីដែលយើងសូមពីទ្រង់ហើយដែរ។
ការពិភាក្សា : ហេតុអ្វីបានជាព្រះធ្វើឲ្យការពោរពេញដោយព្រះវិញ្ញាណ ជាការងាយស្រួលធ្វើសម្រាប់យើង? តើអ្វីដែលធ្វើឲ្យពិបាកសម្រាប់យើង?
ព្រះវិញ្ញាណបរិសុទ្ធធ្វើឲ្យយើងអាចរស់នៅដូចដែលព្រះចង់ឲ្យយើងធ្វើ។ ចូរអរព្រះគុណដល់ព្រះជាម្ចាស់ ដែលទោះបីជាចរិតចាស់របស់យើងនឹងប្រឆាំងនឹងការឲ្យទ្រង់គ្រប់គ្រងក៏ដោយ ក៏យើងត្រូវបានរំដោះដើម្បីឲ្យយើងអាចជ្រើសរើសធ្វើតាមព្រះហឫទ័យទ្រង់ក្នុងជីវិតរបស់យើង។
ការបន្តឆ្ពោះទៅមុខ
ការបញ្ជាក់ : តើអ្នកមានគំនិត ឬសំណួរអ្វីខ្លះ?
ការសង្ខេប : ហេតុអ្វីយើងគួរថ្វាយការគ្រប់គ្រងទៅកាន់ព្រះ? តើយើងធ្វើការជ្រើសរើសនោះដោយរបៀបណា?
ការអនុវត្ត : តើព្រះចង់ឲ្យអ្នកឆ្លើយតបនឹងអ្វីដែលទ្រង់បានបង្ហាញអ្នកដោយរបៀបណា?
ការចែកចាយបន្ត : ចេញពីប្រធានបទនេះ តើមានចំណុចណាដែលអ្នកយល់ថានឹងមានប្រយោជន៍
ក្នុងការចែករំលែកជាមួយនរណាម្នាក់?
ការពង្រឹង:
នៅសប្តាហ៍នេះ សូមគិតអំពីអត្ថប្រយោជន៍អ្វីខ្លះ ដែលកើតចេញពីការថ្វាយការគ្រប់គ្រងទៅកាន់ព្រះវិញ្ញាណបរិសុទ្ធ។
អេសេគាល ៣៦:២៥-២៨
នោះអញនឹងប្រោះទឹកស្អាតទៅលើឯងរាល់គ្នា ដូច្នេះ ឯងនឹងបានស្អាត អញនឹងជំរះឯងរាល់គ្នាឲ្យស្អាត ពីគ្រប់ទាំងសេចក្ដីស្មោកគ្រោក ហើយពីអស់ទាំងរូបព្រះរបស់ឯងផង អញនឹងឲ្យឯងមានចិត្តថ្មី ហើយនឹងដាក់វិញ្ញាណថ្មីនៅក្នុងឯងដែរ អញនឹងដកចិត្តដែលរឹងដូចថ្មពីរូបសាច់ឯងចេញ រួចនឹងឲ្យមានចិត្តជាសាច់វិញ អញនឹងដាក់វិញ្ញាណរបស់អញនៅក្នុងឯងរាល់គ្នា ហើយបណ្តាលឲ្យឯងរាល់គ្នាដើរតាមក្រឹត្យក្រម ហើយរក្សាបញ្ញត្តច្បាប់របស់អញ ព្រមទាំងប្រព្រឹត្តតាមផង នោះឯងរាល់គ្នានឹងអាស្រ័យនៅក្នុងស្រុកដែលអញបានឲ្យដល់ពួកឰយុកោឯង ឯងរាល់គ្នានឹងធ្វើជារាស្ត្ររបស់អញ ហើយអញនឹងបានជាព្រះដល់ឯង
អេភេសូរ ៤:១៧-៣២
ដូច្នេះ ខ្ញុំនិយាយសេចក្ដីនេះ ហើយធ្វើបន្ទាល់ក្នុងព្រះអម្ចាស់ថា កុំបីឲ្យអ្នករាល់គ្នាដើរដូចជាសាសន៍ដទៃឯទៀត ដែលគេដើរតាមគំនិតឥតប្រយោជន៍របស់គេទៀតឡើយ គំនិតគេត្រូវបង្អាប់ ហើយគេដាច់ចេញពីព្រះជន្មព្រះ ដោយសារសេចក្ដីខ្លៅល្ងង់ក្នុងខ្លួនគេ ព្រោះចិត្តគេរឹងទទឹង គេលែងខ្លាចបាប បានជាគេប្រគល់ខ្លួនទៅខាងសេចក្ដីអាសអាភាស ដើម្បីនឹងប្រព្រឹត្តសេចក្ដីស្មោកគ្រោកគ្រប់យ៉ាង ដោយចិត្តវក់វិញ តែអ្នករាល់គ្នាមិនបានរៀនឲ្យស្គាល់ព្រះគ្រីស្ទយ៉ាងនោះទេ នោះគឺបើតិចណាស់អ្នករាល់គ្នាបានឮ ហើយរៀននឹងទ្រង់ តាមសេចក្ដីពិតដែលនៅក្នុងព្រះយេស៊ូវដែរ ថាខាងឯកិរិយាប្រព្រឹត្តកាលពីដើម នោះត្រូវឲ្យអ្នករាល់គ្នាបានដោះមនុស្សចាស់ ដែលតែងតែខូចទៅ តាមសេចក្ដីប៉ងប្រាថ្នារបស់សេចក្ដីឆបោកចោលចេញ ហើយឲ្យគំនិតក្នុងចិត្តបានកែប្រែជាថ្មីឡើង ព្រមទាំងប្រដាប់ខ្លួន ដោយមនុស្សថ្មីវិញ ដែលកើតមកក្នុងសេចក្ដីសុចរិត ហើយក្នុងសេចក្ដីបរិសុទ្ធរបស់ផងសេចក្ដីពិត តាមភាពព្រះ។
ដូច្នេះ ដែលបានដោះសេចក្ដីកំភូតចេញហើយ នោះត្រូវឲ្យនិយាយសេចក្ដីពិត នឹងអ្នកជិតខាងរៀងខ្លួនវិញ ដ្បិតយើងរាល់គ្នាជាអវយវៈផងគ្នាទៅវិញទៅមក ចូរខឹងចុះ តែកុំឲ្យធ្វើបាបឡើយ កុំឲ្យសេចក្ដីកំហឹងរបស់អ្នកនៅដរាបដល់ថ្ងៃលិចឡើយ ក៏កុំឲ្យអារក្សមានឱកាសឲ្យសោះ អ្នកណាដែលធ្លាប់លួច ត្រូវឈប់លួចទៅ ស៊ូឲ្យអ្នកនោះទ្រាំនឿយហត់ជាជាង ទាំងធ្វើការល្អដោយដៃខ្លួនវិញ ដើម្បីឲ្យមានអ្វីនឹងចែកដល់អ្នកណាដែលត្រូវការផង មិនត្រូវឲ្យមានពាក្យអាក្រក់ណាមួយ ចេញពីមាត់អ្នករាល់គ្នាឡើយ ចូរបញ្ចេញតែពាក្យណាដែលល្អៗ សំរាប់នឹងស្អាងចិត្តតាមត្រូវការ ដើម្បីឲ្យបានផ្តល់ព្រះគុណដល់អស់អ្នកដែលស្តាប់ កុំធ្វើឲ្យព្រះវិញ្ញាណបរិសុទ្ធនៃព្រះបានព្រួយព្រះហឫទ័យ ដែលទ្រង់ដៅចំណាំអ្នករាល់គ្នា ទុកសំរាប់ដល់ថ្ងៃប្រោសលោះនោះឡើយ ចូរខំដកគ្រប់ទាំងសេចក្ដីជូរល្វីង ក្តៅក្រហាយ កំហឹង ឡូឡា ជេរប្រមាថ នឹងគ្រប់ទាំងសេចក្ដីអាក្រក់ ចេញពីពួកអ្នករាល់គ្នាទៅ ចូរមានចិត្តសប្បុរសនឹងគ្នាទៅវិញទៅមក ព្រមទាំងមានចិត្តទន់សន្តោស ហើយអត់ទោសគ្នា ដូចជាព្រះទ្រង់បានអត់ទោសឲ្យអ្នករាល់គ្នា ដោយព្រះគ្រីស្ទដែរ។
រ៉ូម ៨:៥-១៤
ពីព្រោះអស់អ្នកណាដែលតាមសាច់ឈាម នោះគិតតែខាងសាច់ឈាម តែអស់អ្នកណាដែលតាមព្រះវិញ្ញាណ នោះគិតតែខាងវិញ្ញាណវិញ ដ្បិតគំនិតខាងសាច់ឈាម នោះជាសេចក្ដីស្លាប់ទទេ ឯគំនិតនៃព្រះវិញ្ញាណ នោះទើបជាជីវិត នឹងសេចក្ដីសុខសាន្តវិញ ព្រោះគំនិតខាងសាច់ឈាម នោះរមែងទាស់ទទឹងនឹងព្រះ ដ្បិតមិនចុះចូលនឹងក្រិត្យវិន័យរបស់ព្រះទេ ក៏ពុំអាចនឹងចុះចូលបានផង ពួកអ្នកដែលនៅខាងសាច់ឈាម នោះពុំអាចនឹងគាប់ព្រះហឫទ័យដល់ព្រះបានឡើយ។
តែបើសិនជាព្រះវិញ្ញាណនៃព្រះសណ្ឋិតក្នុងខ្លួនអ្នករាល់គ្នា នោះអ្នករាល់គ្នាមិននៅខាងសាច់ឈាមទៀតទេ គឺនៅខាងវិញ្ញាណវិញ ប៉ុន្តែ បើអ្នកណាគ្មានព្រះវិញ្ញាណរបស់ព្រះគ្រីស្ទ អ្នកនោះមិនមែនជារបស់ផងទ្រង់ទេ ហើយបើសិនជាព្រះគ្រីស្ទសណ្ឋិតក្នុងអ្នករាល់គ្នា នោះរូបសាច់បានស្លាប់ ដោយព្រោះអំពើបាបមែន តែវិញ្ញាណមានជីវិតវិញ ដោយព្រោះសេចក្ដីសុចរិត មួយទៀត បើព្រះវិញ្ញាណនៃព្រះអង្គ ដែលបានប្រោសឲ្យព្រះយេស៊ូវរស់ពីស្លាប់ឡើងវិញ ទ្រង់សណ្ឋិតក្នុងខ្លួនអ្នករាល់គ្នា នោះព្រះអង្គនោះឯង ដែលបានប្រោសឲ្យព្រះគ្រីស្ទរស់ពីស្លាប់ឡើង ទ្រង់នឹងប្រោសរូបកាយនៃអ្នករាល់គ្នាដែលទៀងតែស្លាប់ ឲ្យមានជីវិតឡើងដែរ ដោយសារព្រះវិញ្ញាណទ្រង់ ដែលសណ្ឋិតនៅក្នុងខ្លួនអ្នករាល់គ្នា។
ដូច្នេះ បងប្អូនអើយ យើងមានសេចក្ដីជាប់ជំពាក់ មិនមែនជំពាក់ចំពោះសាច់ឈាម ឲ្យបានរស់តាមសាច់ឈាមនោះទេ ដ្បិតបើសិនជាអ្នករាល់គ្នារស់តាមសាច់ឈាម នោះនឹងត្រូវស្លាប់ទៅ តែបើសំឡាប់អំពើរបស់រូបសាច់ចេញ ដោយសារព្រះវិញ្ញាណ នោះអ្នករាល់គ្នានឹងបានរស់វិញ ហើយអស់អ្នកណាដែលព្រះវិញ្ញាណនៃព្រះទ្រង់នាំ អ្នកទាំងនោះហើយជាពួកកូនរបស់ព្រះ។
កាឡាទី ៥:១៦-២៦
តែខ្ញុំប្រាប់ថា ចូរដើរក្នុងព្រះវិញ្ញាណ នោះអ្នករាល់គ្នានឹងមិនបំពេញសេចក្ដីប៉ងប្រាថ្នាខាងសាច់ឈាមទេ ដ្បិតសាច់ឈាមតែងតែប៉ងប្រាថ្នាទាស់នឹងព្រះវិញ្ញាណ ឯព្រះវិញ្ញាណ ទ្រង់ក៏ទាស់នឹងសាច់ឈាមដែរ សេចក្ដីទាំង២នេះប្រឆាំងនឹងគ្នា ដល់ម៉្លេះបានជាអ្នករាល់គ្នារកធ្វើការ ដែលចង់ធ្វើទៅមិនកើត បើព្រះវិញ្ញាណទ្រង់នាំអ្នករាល់គ្នាវិញ នោះអ្នករាល់គ្នាមិននៅក្រោមបន្ទុកក្រិត្យវិន័យទៀតទេ រីឯកិច្ចការខាងសាច់ឈាម នោះប្រាកដច្បាស់ហើយ គឺជាសេចក្ដីកំផិត សហាយស្មន់ ស្មោកគ្រោក អាសអាភាស ថ្វាយបង្គំរូបព្រះ មន្តអាគម សំអប់គ្នា ឈ្លោះប្រកែក ឈ្នានីស កំហឹង ទាស់ទែងគ្នា បាក់បែក បក្សពួក ច្រណែន កាប់សំឡាប់ ប្រមឹក ស៊ីផឹកជ្រុល នឹងការអ្វីទៀត ដែលស្រដៀងនឹងសេចក្ដីទាំងនេះផង ហើយខ្ញុំប្រាប់អ្នករាល់គ្នាទុកជាមុន ដូចជាបានប្រាប់រួចមកហើយថា អស់អ្នកដែលប្រព្រឹត្តដូច្នេះ នោះមិនបានគ្រងនគរព្រះទុកជាមរដកឡើយ តែឯផលផ្លែនៃព្រះវិញ្ញាណវិញ នោះគឺសេចក្ដីស្រឡាញ់ អំណរអរ មេត្រីភាព អត់ធ្មត់ សុភាព សប្បុរស ស្មោះត្រង់ ស្លូតបូត ហើយដឹងខ្នាត គ្មានក្រិត្យវិន័យណាទាស់នឹងសេចក្ដីយ៉ាងនោះទេ ហើយអស់អ្នកដែលជារបស់ផងព្រះគ្រីស្ទ នោះបានឆ្កាងសាច់ឈាមហើយ ព្រមទាំងសេចក្ដីរំជួល នឹងសេចក្ដីប៉ងប្រាថ្នាទាំងប៉ុន្មានផង។
បើសិនជាយើងរស់ដោយនូវព្រះវិញ្ញាណ នោះត្រូវដើរដោយព្រះវិញ្ញាណដែរ កុំឲ្យយើងរាល់គ្នារកកេរ្តិ៍ឈ្មោះ ដែលឥតប្រយោជន៍ ទាំងចាក់រុក ហើយឈ្នានីសគ្នាទៅវិញទៅមកឡើយ។
កូល៉ុស ៣:១៥-១៧
ចូរឲ្យសេចក្ដីមេត្រីរបស់ព្រះគ្រីស្ទត្រួតត្រានៅក្នុងចិត្ត ដែលទ្រង់បានហៅអ្នករាល់គ្នាមកក្នុងសេចក្ដីនោះឯង ឲ្យមានរូបកាយតែ១ ហើយត្រូវដឹងគុណផង។
ចូរឲ្យព្រះបន្ទូលនៃព្រះគ្រីស្ទ បានសណ្ឋិតនៅក្នុងអ្នករាល់គ្នាជាបរិបូរ ដោយប្រាជ្ញាគ្រប់យ៉ាង ទាំងបង្រៀន ហើយទូន្មានគ្នា ដោយនូវទំនុកដំកើង ទំនុកបរិសុទ្ធ នឹងចំរៀងខាងឯវិញ្ញាណ ទាំងច្រៀងក្នុងចិត្តថ្វាយព្រះ ដោយព្រះគុណ ហើយក្នុងគ្រប់ទាំងអស់ ទោះបើការអ្វីដែលអ្នករាល់គ្នានឹងធ្វើ ដោយពាក្យសំដីឬកិរិយាក៏ដោយ ចូរធ្វើទាំងអស់ ដោយព្រះនាមនៃព្រះអម្ចាស់យេស៊ូវ ទាំងអរព្រះគុណដល់ព្រះដ៏ជាព្រះវរបិតា ដោយសារទ្រង់ផង។
ទីតុស ៣:៣-៨
ដ្បិតពីដើម យើងរាល់គ្នាក៏ជាមនុស្សឥតប្រាជ្ញា រឹងចចេស ហើយវង្វេងដែរ ទាំងបំរើសេចក្ដីប៉ងប្រាថ្នា នឹងសេចក្ដីសំរើបផ្សេងៗ ទាំងរស់នៅដោយសេចក្ដីគំរក់ នឹងសេចក្ដីឈ្នានីស យើងក៏គួរខ្ពើម ហើយបានស្អប់គ្នាទៅវិញទៅមកដែរ តែកាលសេចក្ដីសប្បុរសរបស់ព្រះដ៏ជាព្រះអង្គសង្គ្រោះនៃយើង នឹងសេចក្ដីស្រឡាញ់របស់ទ្រង់ដល់មនុស្ស បានលេចមកឲ្យឃើញ នោះទ្រង់បានជួយសង្គ្រោះយើង មិនមែនដោយការដែលយើងបានប្រព្រឹត្តដោយសុចរិតនោះទេ គឺដោយសេចក្ដីមេត្តាករុណារបស់ទ្រង់វិញ ដោយសារការសំអាតនៃសេចក្ដីកើតជាថ្មី ហើយការប្រោសជាថ្មីឡើងវិញនៃព្រះវិញ្ញាណបរិសុទ្ធ ដែលទ្រង់បានចាក់មកលើយើងជាបរិបូរ ដោយសារព្រះយេស៊ូវគ្រីស្ទ ជាព្រះអង្គសង្គ្រោះនៃយើង ដើម្បីកាលណាយើងបានរាប់ជាសុចរិត ដោយសារព្រះគុណទ្រង់ នោះឲ្យយើងបានត្រឡប់ជាអ្នកគ្រងមរដក តាមសេចក្ដីសង្ឃឹមដល់ជីវិតដ៏នៅអស់កល្បជានិច្ច ពាក្យនេះគួរជឿ ហើយខ្ញុំចង់បញ្ជាក់អ្នក ពីសេចក្ដីទាំងនេះឲ្យច្បាស់ ដើម្បីឲ្យពួកអ្នកដែលបានជឿដល់ព្រះ បានខំប្រឹងនឹងធ្វើការល្អអស់ពីចិត្ត នោះទើបល្អ ហើយមានប្រយោជន៍ដល់មនុស្ស។