តើអ្នកធ្លាប់ឮគេនិយាយអ្វីខ្លះអំពីអាកប្បកិរិយា ឬអត្តចរិតអាក្រក់របស់គ្រីស្ទបរិស័ទ?
តើអ្នកគិតថា ព្រះយេស៊ូវចង់មានន័យយ៉ាងណានៅក្នុង ម៉ាថាយ ១២:៣៣ ថា «ដ្បិតគេស្គាល់ដើមឈើដោយសារផ្លែវា»?
របៀបដែលយើងប្រព្រឹត្តក្នុងនាមជាគ្រីស្ទបរិស័ទ គឺសំខាន់។ សូមមើលអ្វីដែលព្រះយេស៊ូវមានបន្ទូលអំពីរឿងនេះនៅក្នុង យ៉ូហាន ១៥:៨.
យ៉ូហាន ១៥:៨
ព្រះវរបិតាខ្ញុំបានដំកើងឡើង ដោយសេចក្ដីនេះឯង គឺដោយអ្នករាល់គ្នាបង្កើតផលជាច្រើន យ៉ាងនោះអ្នករាល់គ្នានឹងធ្វើជាសិស្សខ្ញុំមែន។
ការរកឃើញ : តើអាកប្បកិរិយារបស់យើងឆ្លុះបញ្ចាំងពីព្រះយ៉ាងដូចម្តេច?
ការរកឃើញ : តើអ្វីនឹងបង្ហាញដល់អ្នកដទៃថា យើងជាអ្នកដើរតាមព្រះយេស៊ូវ?
ការពិភាក្សា : ប្រសិនបើនរណាម្នាក់ហៅខ្លួនឯងថាជាគ្រីស្ទបរិស័ទ ប៉ុន្តែមិនបង្កើតផល តើអាចមានបញ្ហាអ្វីដែលធ្វើឲ្យគេមិនបង្កើតផល?
ការគិតពិចារណា : តើរង្វង់មួយណាខាងក្រោម ដែលអ្នកគិតថាតំណាងឲ្យជីវិតរបស់នរណាម្នាក់ដែលនិយាយថាគាត់ជាគ្រីស្ទបរិស័ទ ប៉ុន្តែមិនរស់នៅដូចព្រះយេស៊ូវ?
[បញ្ចូលដ្យាក្រាមរង្វង់ទាំង ៣]
ការគិតពិចារណា : តើអ្វីដែលធ្វើឲ្យពិបាកក្នុងការដឹងថាតើនរណាម្នាក់ពិតជាគ្រីស្ទបរិស័ទ?
អេភេសូរ ៤:២២-២៤ រម្លឹកយើងថា ពេលខ្លះគ្រីស្ទបរិស័ទមានកិរិយាដូចគ្នានឹងអ្នកដែលមិនស្គាល់ព្រះយេស៊ូវដែរ។
អេភេសូរ ៤:២២-២៤
. . . ថាខាងឯកិរិយាប្រព្រឹត្តកាលពីដើម នោះត្រូវឲ្យអ្នករាល់គ្នាបានដោះមនុស្សចាស់ ដែលតែងតែខូចទៅ តាមសេចក្ដីប៉ងប្រាថ្នារបស់សេចក្ដីឆបោកចោលចេញ ហើយឲ្យគំនិតក្នុងចិត្តបានកែប្រែជាថ្មីឡើង ព្រមទាំងប្រដាប់ខ្លួន ដោយមនុស្សថ្មីវិញ ដែលកើតមកក្នុងសេចក្ដីសុចរិត ហើយក្នុងសេចក្ដីបរិសុទ្ធរបស់ផងសេចក្ដីពិត តាមភាពព្រះ។
ការរកឃើញ : តើលោកប៉ុលជំរុញឲ្យយើងជ្រើសរើសជម្រើសអ្វី?
ការពិភាក្សា : តើជីវិតរបស់បុគ្គលដែលមិនប្រកាន់យក (ការរស់នៅក្នុង ឬតាមចរិត) ជាមនុស្សថ្មី នឹងខុសពីអ្នកដែលមិនស្គាល់ព្រះគ្រីស្ទយ៉ាងដូចម្ដេច?
កត្តាដែលញែកនរណាម្នាក់ដែលមិនស្គាល់ព្រះគ្រីស្ទឲ្យខុសប្លែកពីអ្នកដែលពិតជាគ្រីស្ទបរិស័ទ មានពន្យល់នៅក្នុង រ៉ូម ៨:៩.
ការរកឃើញ : តើអ្វីជាការពិតអំពីគ្រីស្ទបរិស័ទ?
ការគិតពិចារណា : តើភាពខុសគ្នានេះតែងតែអាចសង្កេតឃើញនៅក្នុងលក្ខណៈខាងក្រៅក្នុងជីវិតរបស់មនុស្សឬទេ?
ដូច្នេះ ប្រសិនបើនរណាម្នាក់និយាយថាគាត់ជាគ្រីស្ទបរិស័ទ ប៉ុន្តែគាត់មិនបានបង្កើតផលផ្លែទេ គាត់ប្រហែលជាមិនមានទំនាក់ទំនងជាមួយព្រះគ្រីស្ទ ឬគាត់អាចជាគ្រីស្ទបរិស័ទដែលកំពុងរស់នៅដូចជីវិតចាស់។
ដោយសារយើងមិនអាចមើលទៅក្នុងចិត្តមនុស្សដូចជាដែលព្រះដែលអាចទតឃើញក្នុងជម្រៅចិត្តមនុស្ស វាអាចជាការពិបាកណាស់ក្នុងការដឹងពីរបៀបចូលទៅកាន់នរណាម្នាក់ ឬអ្វីដែលត្រូវនិយាយ។ តើយើងគួរសន្មតថា ពួកគេជាអ្នកមិនជឿ ឬតើយើងគួរចាត់ទុកពួកគេជាអ្នកជឿដែលមិនដើរតាមព្រះវិញ្ញាណ? តើយើងគួរធ្វើអ្វីក្នុងស្ថានភាពទាំងនេះ?
សូមព្យាយាមស្វែងយល់ពីស្ថានភាពនៃជំនឿរបស់មនុស្សម្នាក់
សូមស្រមៃមើលសេណារីយ៉ូខាងក្រោម ៖
អ្នកមានសហការីម្នាក់ដែលហៅខ្លួននាងថាជាគ្រីស្ទបរិស័ទ (ជាសមាជិកព្រះវិហារ ពាក់ខ្សែ ក ឈើឆ្កាង ឬមានបញ្ជាក់នៅលើឯកសារអត្តសញ្ញាណរបស់នាង)។ នាងតែងតែជូនពរអ្នកនៅថ្ងៃបុណ្យគ្រីស្ទបរិស័ទ ហើយនិយាយអំពីសកម្មភាពសាសនារបស់នាង ប៉ុន្តែនាងបានត្អូញត្អែរខ្លាំងៗ និងម្តងហើយម្តងទៀតអំពីរឿងនៅកន្លែងធ្វើការ ហើយនិយាយរឿងដ៏អាក្រក់អំពីមិត្តរួមការងារផ្សេងទៀត។
តើអ្នកអាចដឹកនាំការសន្ទនាដោយរបៀបណា ដើម្បីបញ្ជាក់ឲ្យដឹងថា គាត់មានស្ថានភាពយ៉ាងណាខាងឯជំនឿ?
• សូមនិយាយនៅក្នុងបរិបទនៃទំនាក់ទំនង។
តើអ្នកអាចធ្វើអ្វី ឬនិយាយអ្វីបាន ទើបនាងដឹងថាអ្នកយកចិត្តទុកដាក់ចំពោះនាង?
• សូមសួរអំពីទំនាក់ទំនងរបស់គាត់ជាមួយព្រះ។
o នេះជាអ្វីដែលអ្នកអាចសួរបាន ៖
▪ តើជំនឿរបស់បងបានក្លាយជាការសំខាន់សម្រាប់បងដោយរបៀបណា?
▪ តើជំនឿរបស់បងនៅលើព្រះ ធ្វើឲ្យមានការផ្លាស់ប្តូរយ៉ាងណាក្នុងជីវិតរបស់បង?
តើអ្នកអាចសួរសំណួរអ្វីទៀត?
o តើអ្នកកំពុងស្តាប់មើលអំពីអ្វី?
▪ បុគ្គលនោះនិយាយអំពីទំនាក់ទំនងផ្ទាល់ខ្លួនជាមួយព្រះ។
▪ បុគ្គលនោះទទួលស្គាល់សេចក្ដីសង្រ្គោះផ្ទាល់ខ្លួនដោយជំនឿលើព្រះយេស៊ូវ។
តើអ្នកគិតថាសហការីនៅក្នុងសេណារីយ៉ូនេះអាចផ្តល់ចម្លើយអ្វីខ្លះ?
សូមណែនាំនរណាម្នាក់ឲ្យមានជំនឿផ្ទាល់ខ្លួន
ប្រសិនបើហាក់ដូចជាពួកគេមិនមានទំនាក់ទំនងផ្ទាល់ខ្លួនជាមួយព្រះ តើអ្នកអាចនិយាយអ្វីបាន?
• អ្នកអាចចែករំលែកទីបន្ទាល់របស់អ្នក។
តើចំណុចអ្វីដែលនឹងសំខាន់ដើម្បីឲ្យអ្នកសង្កត់ធ្ងន់?
• សូមសួរអំពីការឆ្លើយតបរបស់ពួកគេចំពោះព្រះបំណងរបស់ព្រះ ក្នុងការចង់មានទំនាក់ទំនងជាមួយគេ។
o នេះជាអ្វីដែលអ្នកអាចសួរបាន ៖
▪ តើបងធ្លាប់ទទួលព្រះអំណោយទាននៃសេចក្ដីសង្គ្រោះរបស់ព្រះទេ?
▪ តើបងចង់ដឹងបន្ថែមទៀតអំពីរបៀបដែលបងអាចមានទំនាក់ទំនងផ្ទាល់ខ្លួនជាមួយនឹងព្រះដែរឬទេ?
តើអ្នកអាចឆ្លើយតបទៅនឹងចម្លើយខុសៗគ្នា ដែលពួកគេអាចនឹងឆ្លើយមកអ្នកដោយរបៀបណា?
តើអ្នកមានសំណួរ ឬកង្វល់អំពីចំណុចណាមួយក្នុងចំណោមចំណុចទាំងនេះទេ?
សូមខ្វល់ខ្វាយពីសុខភាពខាងវិញ្ញាណរបស់អ្នកជឿដទៃទៀត
ប្រសិនបើហាក់ដូចជាពួកគេមានទំនាក់ទំនងផ្ទាល់ខ្លួនជាមួយព្រះ តើពួកគេត្រូវការជំនួយអ្វីក្នុងជីវិតជាគ្រីស្ទបរិស័ទរបស់ពួកគេ?
រង្វង់នៅក្នុងផ្នែកទីមួយ តំណាងឲ្យមនុស្សបីប្រភេទដែលបានពិពណ៌នានៅក្នុង ១ កូរិនថូស ជំពូក ២ និង ៣។ នៅទីនោះ លោកប៉ុលនិយាយអំពីមនុស្សដែលរស់នៅតាមលក្ខណៈធម្មជាតិ (អ្នកមិនជឿ) និងមនុស្សដែលរស់នៅតាមព្រះវិញ្ញាណ (អ្នកជឿ) ។ ១ កូរិនថូស ៣:១-៣ ពន្យល់ពីប្រភេទមនុស្សនៅក្នុងរង្វង់ទីបី។
១ កូរិនថូស ៣:១-៣
ឯខ្ញុំ បងប្អូនអើយ ខ្ញុំពុំអាចនិយាយនឹងអ្នករាល់គ្នា ដូចនឹងមនុស្សខាងឯវិញ្ញាណបានទេ ត្រូវតែនិយាយដូចនឹងមនុស្សខាងឯសាច់ឈាមវិញ គឺដូចជានិយាយនឹងកូនខ្ចីក្នុងព្រះគ្រីស្ទ ខ្ញុំបានឲ្យទឹកដោះមកអ្នករាល់គ្នាផឹក មិនបានឲ្យសាច់បរិភោគទេ ដ្បិតកាលណោះអ្នករាល់គ្នាពុំអាចនឹងបរិភោគបាន ហើយឥឡូវនេះ ក៏មិនទាន់បានដែរ ដោយព្រោះអ្នករាល់គ្នា នៅតែខាងសាច់ឈាមនៅឡើយ ដ្បិតដែលមានសេចក្ដីឈ្នានីស ឈ្លោះប្រកែក នឹងបាក់បែកគ្នា ក្នុងពួកអ្នករាល់គ្នា នោះតើមិននៅខាងសាច់ឈាម ហើយដើរតាមបែបមនុស្សលោកទេឬអី
ការរកឃើញ : តើធ្វើយ៉ាងណាទើបយើងដឹងថាមនុស្សទាំងនេះជាអ្នកជឿ?
ការរកឃើញ : តើលោកប៉ុលពិពណ៌នាអំពីពួកគេយ៉ាងដូចម្តេច?
ការគិតពិចារណា : តើអ្នកនឹងពណ៌នាអំពីមនុស្សទាំងនេះយ៉ាងណា បើនិយាយអំពីមនុស្សថ្មី (ចរិតថ្មី) និងមនុស្សចាស់ (ចរិតចាស់)?
ការពិភាក្សា : តើលោកប៉ុលកែសម្រួលរបៀបដែលគាត់ទាក់ទងនឹងពួកគេយ៉ាងដូចម្តេច? ហេតុអ្វី?
ការគិតពិចារណា : តើអ្នកគិតថា អ្វីជាគោលដៅរបស់លោកប៉ុលក្នុងការនិយាយជាមួយពួកគេអំពីរឿងនេះ?
លោកប៉ុលពិតជាយកចិត្តទុកដាក់ចំពោះពួកគេ។ គាត់មើលឃើញថា របៀបដែលពួកគេកំពុងរស់នៅកំពុងរារាំងការរីកចម្រើនខាងវិញ្ញាណរបស់ពួកគេ។ អ្នកជឿជាច្រើនមិនយល់ថា ព្រះវិញ្ញាណបរិសុទ្ធគង់នៅក្នុងពួកគេ ហើយនឹងដើរជាមួយពួកគេពេញមួយជីវិតទេ។ ពួកគេប្រហែលជាមួរម៉ៅដែលមិនបានរស់នៅ ដូចជាព្រះយេស៊ូវ ប៉ុន្តែមិនដឹងថាត្រូវធ្វើយ៉ាងណាចំពោះរឿងនោះ។
តើជីវិតគ្រីស្ទបរិស័ទប្រភេទណាដែលអ្នកគិតថាព្រះយេស៊ូវប្រាថ្នាចង់ឲ្យយើងទាំងអស់គ្នាមាន?
តើអ្នកអាចជួយអ្នកជឿដែលអាចស្ថិតក្នុងស្ថានភាពនេះដោយរបៀបណា?
• សូមចែករំលែកអ្វីដែលអ្នកបានរៀនអំពីព្រះវិញ្ញាណបរិសុទ្ធ និងរបៀបអនុញ្ញាតឲ្យទ្រង់បំពេញជីវិតរបស់អ្នក។
តើអ្នកនឹងចែករំលែកអំពីអ្វី?
• សូមចែករំលែកអំពីការដកដង្ហើមខាងវិញ្ញាណ និងរបៀបដើរក្នុងព្រះវិញ្ញាណ។
តើអ្នកអាចផ្តល់ឧទាហរណ៍អ្វីខ្លះអំពីរបៀបដែលអ្នកកំពុងធ្វើកិច្ចការនេះ?
សូមមានអាកប្បកិរិយាត្រឹមត្រូវពេលនិយាយជាមួយអ្នកដទៃ
ការចែកចាយ : តើមាននរណាម្នាក់ធ្លាប់និយាយជាមួយអ្នក អំពីអ្វីមួយដែលអាចជួយអ្នកក្នុងជីវិតខាងវិញ្ញាណរបស់អ្នកទេ? តើអ្វីបានធ្វើឲ្យវាក្លាយជាបទពិសោធវិជ្ជមាន ឬអវិជ្ជមាន?
សូមក្រឡេកមើលរង្វង់ទាំងបីម្តងទៀត។
តើយើងត្រូវការរង្វង់មួយណាដើម្បីឲ្យព្រះប្រើប្រាស់យើងដើម្បីជួយអ្នកដទៃ?
តើធ្វើយ៉ាងណាទើបអ្នកអាចប្រាកដថា វាជាការពិតចំពោះអ្នក?
សូមចាំថា នៅក្នុង យ៉ូហាន ជំពូក ១៥ ព្រះយេស៊ូវប្រើឧទាហរណ៍អំពីអង្គទ្រង់ជាដើមទំពាំងបាយជូរ និងអ្នកដើរតាមទ្រង់ជាមែក ដើម្បីបង្ហាញពីសារៈសំខាន់សម្រាប់យើងក្នុងការនៅជាប់នឹងទ្រង់។
ការពិភាក្សា ៖ តើ យ៉ូហាន ១៥:៤-៥ អនុវត្តយ៉ាងណាចំពោះការសន្ទនាពាក់ព័ន្ធនឹងជំនឿ ជាមួយនរណាម្នាក់? តើការសន្ទនានោះត្រូវការអ្វីខ្លះ ដើម្បីឲ្យវាក្លាយជាការសន្ទនាប្រកបដោយផ្លែផ្កា?
យ៉ូហាន ១៥:៤-៥
ចូរនៅជាប់នឹងខ្ញុំ ហើយខ្ញុំជាប់នឹងអ្នករាល់គ្នាចុះ ប្រៀបដូចជាខ្នែង បើមិននៅជាប់នឹងគល់ នោះពុំអាចនឹងបង្កើតផលដោយឯកឯងបានទេ ដូច្នេះ អ្នករាល់គ្នាក៏ពុំបានដែរ លើកតែនៅជាប់នឹងខ្ញុំ ខ្ញុំជាគល់ អ្នករាល់គ្នាជាខ្នែង អ្នកណាដែលនៅជាប់នឹងខ្ញុំ ហើយខ្ញុំជាប់នឹងអ្នកនោះ នោះទើបនឹងបង្កើតផលឡើងជាច្រើន ដ្បិតបើដាច់ពីខ្ញុំចេញ នោះអ្នករាល់គ្នាពុំអាចនឹងធ្វើអ្វីបានទេ។
ការគិតពិចារណា : តើការដឹងថា គឺជាព្រះយេស៊ូវដែលនឹងបង្កើតផល ជួយអ្នកឲ្យសម្រាក (ឬគ្មានភាពតានតឹង) នៅពេលអ្នកនិយាយជាមួយនរណាម្នាក់អំពីជីវិតខាងវិញ្ញាណរបស់គាត់យ៉ាងណាដែរ?
អាកប្បកិរិយា និងចិត្តគំនិតរបស់មនុស្សអាចផ្តល់ឲ្យយើងនូវតម្រុយអំពីស្ថានភាពនៃដួងចិត្ត និងជីវិតរបស់ពួកគេ ប៉ុន្តែវាមិនមែនជាតួនាទីរបស់យើងដើម្បីវិនិច្ឆ័យអ្នកដទៃទេ។ ព្រះយេស៊ូវបានព្រមានអំពីរឿងនេះនៅក្នុង ម៉ាថាយ ៧:៣-៥.
ម៉ាថាយ ៧:៣-៥
ហេតុអ្វីបានជាអ្នកមើលឃើញកំទេច ដែលនៅក្នុងភ្នែករបស់បងប្អូនអ្នក តែមិនឃើញធ្នឹម ដែលនៅក្នុងភ្នែករបស់ខ្លួនសោះដូច្នេះ ឬធ្វើដូចម្តេចឲ្យអ្នកនិយាយនឹងបងប្អូនថា ចូរឲ្យអញយកកំទេចពីភ្នែកឯងចេញ តែមើល មានធ្នឹមនៅក្នុងភ្នែកខ្លួនអ្នកវិញ អ្នកមានពុតអើយ ចូរយកធ្នឹមពីភ្នែករបស់ខ្លួនចេញជាមុនសិន នោះទើបនឹងបានឃើញច្បាស់ អាចនឹងយកកំទេចចេញពីភ្នែករបស់បងប្អូនអ្នកបានដែរ។
ការរកឃើញ : ក្នុងអត្ថបទគម្ពីរនេះ តើកម្ទេច និងធ្នឹមតំណាងឲ្យអ្វី?
ការគិតពិចារណា : តើនេះមានន័យថាជីវិតរបស់យើងផ្ទាល់ត្រូវតែល្អឥតខ្ចោះ មុនពេលដែលយើងអាចនិយាយជាមួយនរណាម្នាក់អំពីស្ថានភាពខាងវិញ្ញាណរបស់គាត់ឬ?
ការពិភាក្សា : តើយើងអាចជៀសវាងការដែលមើលទៅហាក់ដូចជាលាក់ពុត ឬវិនិច្ឆ័យគេដោយរបៀបណា នៅពេលដែលយើងសន្ទនាជាមួយនរណាម្នាក់អំពីជីវិតខាងវិញ្ញាណរបស់គេ?
ការចែកចាយឧទាហរណ៍ពីជីវិតផ្ទាល់ខ្លួនរបស់អ្នកអំពីការដើរក្នុងព្រះវិញ្ញាណនឹងជួយអ្នកដទៃឲ្យឃើញពីភាពស្មោះត្រង់របស់អ្នក ហើយបង្ហាញថាអ្នកមិនវិនិច្ឆ័យពួកគេទេ។ នៅក្នុង ១ ពេត្រុស ៣:១៥ យើងត្រូវបានប្រាប់ឲ្យ «ត្រៀមខ្លួនជានិច្ច» នៅពេលមានគេសួរយើងអំពីជំនឿរបស់យើង ហើយនិយាយ «ដោយសុភាព និងដោយការគោរព»។
ការបន្តឆ្ពោះទៅមុខ
ការបញ្ជាក់ : តើអ្នកមានគំនិត ឬសំណួរអ្វីខ្លះ?
ការសង្ខេប : សម្រាប់នរណាម្នាក់ដែលនិយាយថា គាត់ជាគ្រីស្ទបរិស័ទ ប៉ុន្តែជីវិតរបស់គាត់មិនឆ្លុះបញ្ចាំងពីព្រះយេស៊ូវ តើសេចក្ដីពិតអ្វីខ្លះអំពីព្រះវិញ្ញាណបរិសុទ្ធ ដែលនឹងអាចជួយគាត់បាន?
ការអនុវត្ត : សូមអធិស្ឋាននៅសប្តាហ៍នេះថា ព្រះនឹងប្រទានឱកាសឲ្យយើងដើម្បីចែកចាយរឿងនេះជាមួយនរណាម្នាក់។
ការចែកចាយបន្ត : តើអ្នកមានអារម្មណ៍ថា «ត្រៀមខ្លួន» ដើម្បីចែករំលែកសេចក្ដីពិតទាំងនេះទេ? បើមិនមែន តើអ្វីនឹងជួយអ្នក?
សូមគិតឡើងវិញអំពីការសន្ទនាទាំងនេះអំពីព្រះវិញ្ញាណរបស់ព្រះ។ តើការយល់ដឹងរបស់អ្នកអំពីព្រះវិញ្ញាណបរិសុទ្ធបានរីកចម្រើនយ៉ាងដូចម្តេច? តើរបៀបដែលអ្នករស់នៅ មានភាពខុសប្លែកពីមុនយ៉ាងណាខ្លះ?
ចូរយើងចំណាយពេលដើម្បីអរព្រះគុណព្រះសម្រាប់ការប្រទានព្រះវិញ្ញាណបរិសុទ្ធរបស់ទ្រង់មកយើង។
ការពង្រឹង:
នៅពេលអ្នកអានអត្ថបទគម្ពីរទាំងនេះ សូមពិចារណាពីរបៀបដែលព្រះប្រហែលជាចង់ប្រើប្រាស់អ្នកក្នុងចំណោមមនុស្សដែលអ្នកធ្វើការជាមួយ។
១ កូរិនថូស ២:៦-៣:៩
ប៉ុន្តែ នៅក្នុងចំណោមមនុស្សគ្រប់លក្ខណ៍ នោះយើងខ្ញុំក៏និយាយតាមប្រាជ្ញាដែរ តែមិនមែនតាមប្រាជ្ញារបស់លោកីយនេះ ឬរបស់ពួកចៅហ្វាយនៅលោកីយនេះ ដែលត្រូវសាបសូន្យនោះទេ គឺនិយាយតាមតែប្រាជ្ញានៃព្រះវិញ ជាសេចក្ដីអាថ៌កំបាំងដ៏លាក់ទុក ដែលព្រះបានគិតគូ តាំងពីមុនអស់ទាំងកល្ប សំរាប់ជាសិរីល្អដល់យើងរាល់គ្នា គ្មានចៅហ្វាយណាក្នុងលោកីយនេះ បានស្គាល់សេចក្ដីអាថ៌កំបាំងនោះឡើយ បើបានស្គាល់ នោះគេមិនបានឆ្កាងព្រះអម្ចាស់ដ៏មានសិរីទេ ដូចមានសេចក្ដីចែងទុកមកថា
«សេចក្ដីដែលភ្នែកមិនដែលឃើញ ត្រចៀកមិនដែលឮ
ហើយចិត្តនឹកមិនដែលដល់
គឺសេចក្ដីនោះឯងដែលព្រះបានរៀបចំទុក សំរាប់ពួកអ្នកដែលស្រឡាញ់ទ្រង់»
ព្រះទ្រង់បានសំដែងឲ្យយើងរាល់គ្នាឃើញសេចក្ដីទាំងនោះ ដោយសារព្រះវិញ្ញាណទ្រង់ ដ្បិតព្រះវិញ្ញាណនៃទ្រង់ស្ទង់មើលគ្រប់ទាំងអស់ ព្រមទាំងសេចក្ដីជ្រាលជ្រៅនៃព្រះដែរ ដ្បិតបើមិនមែនជាវិញ្ញាណ ដែលនៅក្នុងខ្លួនមនុស្សទេ នោះតើមានអ្វីនឹងស្គាល់សណ្ឋានមនុស្សនោះបាន ហើយបើមិនមែនជាព្រះវិញ្ញាណនៃព្រះ នោះក៏គ្មានអ្នកណាស្គាល់សណ្ឋានព្រះបានដែរ។ ឯយើងរាល់គ្នា យើងមិនបានទទួលវិញ្ញាណរបស់លោកីយទេ គឺទទួលព្រះវិញ្ញាណដែលមកពីព្រះវិញ ដើម្បីឲ្យបានស្គាល់អស់ទាំងព្រះគុណ ដែលព្រះបានផ្តល់មកយើង ហើយយើងក៏និយាយពីសេចក្ដីទាំងនោះឯង មិនមែនដោយពាក្យសំដី ដែលប្រាជ្ញាមនុស្សបានបង្រៀនទេ គឺដោយពាក្យសំដី ដែលព្រះវិញ្ញាណបង្រៀនវិញ ព្រមទាំងផ្ទឹមពន្យល់សេចក្ដីខាងឯវិញ្ញាណ ដោយសារសេចក្ដីខាងឯវិញ្ញាណផង
ប៉ុន្តែ មនុស្សខាងសាច់ឈាម គេមិនទទួលសេចក្ដីខាងឯព្រះវិញ្ញាណនៃព្រះទេ ពីព្រោះជាសេចក្ដីល្ងង់ល្ងើដល់គេ ក៏រកស្គាល់មិនបានដែរ ដ្បិតត្រង់ឯសេចក្ដីទាំងនោះ ត្រូវពិចារណាយល់ខាងវិញ្ញាណវិញ ឯមនុស្សខាងវិញ្ញាណវិញ គេពិចារណាយល់គ្រប់ទាំងអស់បាន តែមិនត្រូវអ្នកណាពិចារណាខ្លួនឡើង ដ្បិតតើអ្នកណាបានស្គាល់គំនិតនៃព្រះអម្ចាស់ តើអ្នកណានឹងបង្រៀនទ្រង់បាន តែយើងរាល់គ្នាមានគំនិតជារបស់ផងព្រះគ្រីស្ទវិញ។
ឯខ្ញុំ បងប្អូនអើយ ខ្ញុំពុំអាចនិយាយនឹងអ្នករាល់គ្នា ដូចនឹងមនុស្សខាងឯវិញ្ញាណបានទេ ត្រូវតែនិយាយដូចនឹងមនុស្សខាងឯសាច់ឈាមវិញ គឺដូចជានិយាយនឹងកូនខ្ចីក្នុងព្រះគ្រីស្ទ ខ្ញុំបានឲ្យទឹកដោះមកអ្នករាល់គ្នាផឹក មិនបានឲ្យសាច់បរិភោគទេ ដ្បិតកាលណោះអ្នករាល់គ្នាពុំអាចនឹងបរិភោគបាន ហើយឥឡូវនេះ ក៏មិនទាន់បានដែរ ដោយព្រោះអ្នករាល់គ្នា នៅតែខាងសាច់ឈាមនៅឡើយ ដ្បិតដែលមានសេចក្ដីឈ្នានីស ឈ្លោះប្រកែក នឹងបាក់បែកគ្នា ក្នុងពួកអ្នករាល់គ្នា នោះតើមិននៅខាងសាច់ឈាម ហើយដើរតាមបែបមនុស្សលោកទេឬអី គឺកាលដែលម្នាក់ប្រកាន់ថា ខ្លួនជាសិស្សរបស់ប៉ុល ហើយម្នាក់ទៀតថា ខ្លួនជារបស់អ័ប៉ុឡូស នោះតើមិនមែននៅខាងសាច់ឈាមទេឬអី
ដូច្នេះ តើប៉ុលជាអ្វី ឬអ័ប៉ុឡូសជាអ្វី គឺគ្រាន់តែជាអ្នកបំរើដែលនាំឲ្យអ្នករាល់គ្នាជឿ តាមដែលព្រះអម្ចាស់បានប្រទានមកគ្រប់គ្នាតែប៉ុណ្ណោះទេតើ ខ្ញុំបានសាបព្រោះ អ័ប៉ុឡូសជាអ្នកស្រោច តែដែលបានដុះឡើង នោះគឺព្រះបានធ្វើវិញ ហេតុនោះបានជាអ្នកដែលសាបព្រោះ នឹងអ្នកដែលស្រោច នោះមិនមែនជាអ្វីទេ ស្រេចហើយនឹងព្រះដែលធ្វើឲ្យដុះវិញទេតើ ឯអ្នកដែលសាបព្រោះ នឹងអ្នកដែលស្រោច នោះដូចគ្នាទេ ហើយក្នុងអ្នកនិមួយៗ នោះនឹងបានរង្វាន់តាមការដែលខ្លួនធ្វើ ដ្បិតយើងរាល់គ្នាជាអ្នកធ្វើការជាមួយនឹងព្រះ ឯអ្នករាល់គ្នាជាស្រែដែលព្រះទ្រង់ភ្ជួរ ហើយជាផ្ទះដែលព្រះទ្រង់ធ្វើ។
អេភេសូរ ៤:១៧-២៤
ដូច្នេះ ខ្ញុំនិយាយសេចក្ដីនេះ ហើយធ្វើបន្ទាល់ក្នុងព្រះអម្ចាស់ថា កុំបីឲ្យអ្នករាល់គ្នាដើរដូចជាសាសន៍ដទៃឯទៀត ដែលគេដើរតាមគំនិតឥតប្រយោជន៍របស់គេទៀតឡើយ គំនិតគេត្រូវបង្អាប់ ហើយគេដាច់ចេញពីព្រះជន្មព្រះ ដោយសារសេចក្ដីខ្លៅល្ងង់ក្នុងខ្លួនគេ ព្រោះចិត្តគេរឹងទទឹង គេលែងខ្លាចបាប បានជាគេប្រគល់ខ្លួនទៅខាងសេចក្ដីអាសអាភាស ដើម្បីនឹងប្រព្រឹត្តសេចក្ដីស្មោកគ្រោកគ្រប់យ៉ាង ដោយចិត្តវក់វិញ តែអ្នករាល់គ្នាមិនបានរៀនឲ្យស្គាល់ព្រះគ្រីស្ទយ៉ាងនោះទេ នោះគឺបើតិចណាស់អ្នករាល់គ្នាបានឮ ហើយរៀននឹងទ្រង់ តាមសេចក្ដីពិតដែលនៅក្នុងព្រះយេស៊ូវដែរ ថាខាងឯកិរិយាប្រព្រឹត្តកាលពីដើម នោះត្រូវឲ្យអ្នករាល់គ្នាបានដោះមនុស្សចាស់ ដែលតែងតែខូចទៅ តាមសេចក្ដីប៉ងប្រាថ្នារបស់សេចក្ដីឆបោកចោលចេញ ហើយឲ្យគំនិតក្នុងចិត្តបានកែប្រែជាថ្មីឡើង ព្រមទាំងប្រដាប់ខ្លួន ដោយមនុស្សថ្មីវិញ ដែលកើតមកក្នុងសេចក្ដីសុចរិត ហើយក្នុងសេចក្ដីបរិសុទ្ធរបស់ផងសេចក្ដីពិត តាមភាពព្រះ។
កាឡាទី ៦:១-១០
ឱបងប្អូនអើយ បើបានទាន់ឃើញមនុស្សណាធ្វើខុសអ្វី នោះអ្នករាល់គ្នាដែលដើរដោយព្រះវិញ្ញាណ ចូរដំរង់អ្នកនោះដោយចិត្តសុភាព ព្រមទាំងប្រយ័តខ្លួនឯងផង ក្រែងត្រូវសេចក្ដីល្បួងដែរ ចូរយកអាសាគ្នាទៅវិញទៅមក យ៉ាងនោះ ទើបបានសំរេចតាមក្រិត្យវិន័យនៃព្រះគ្រីស្ទ ដ្បិតបើអ្នកណាគិតស្មានថាខ្លួនជាអ្វីៗ តែមិនជាអ្វីសោះ អ្នកនោះឈ្មោះថាបញ្ឆោតខ្លួនឯងហើយ ចូរឲ្យគ្រប់គ្នាល្បងលការ ដែលធ្វើរៀងៗខ្លួន នោះនឹងមានសេចក្ដីអំនួតចំពោះតែខ្លួនឯង មិនមែនចំពោះអ្នកណាទៀតទេ ដ្បិតគ្រប់គ្នាត្រូវទទួលបន្ទុកជារបស់ផងខ្លួន។
អ្នកណាដែលមានគ្រូបង្រៀនខាងព្រះបន្ទូល នោះត្រូវចែកគ្រប់ទាំងរបស់ល្អដល់គ្រូនោះផង កុំឲ្យច្រឡំឡើយ នឹងបញ្ឆោតព្រះមិនបានទេ ដ្បិតពូជណាដែលមនុស្សព្រោះចុះ នោះនឹងច្រូតបានពូជនោះឯងវិញ អ្នកណាដែលព្រោះខាងឯសាច់ឈាមរបស់ខ្លួន នឹងច្រូតបានសេចក្ដីពុករលួយពីសាច់ឈាមនោះឯង តែអ្នកណាដែលព្រោះខាងឯព្រះវិញ្ញាណ នោះនឹងច្រូតបានជីវិតអស់កល្បជានិច្ច ពីព្រះវិញ្ញាណវិញ កុំឲ្យយើងណាយចិត្តនឹងធ្វើការល្អឡើយ ដ្បិតបើមិនរសាយចិត្តទេ នោះដល់កំណត់ យើងនឹងច្រូតបានហើយ ដូច្នេះ កាលណាយើងមានឱកាស នោះត្រូវធ្វើល្អដល់មនុស្សទាំងអស់ ហើយគឺដល់ពួកអ្នកជឿជាដើម។
ម៉ាកុស ២:១៣-១៧
ទ្រង់យាងចេញទៅតាមឆ្នេរសមុទ្រម្តងទៀត ឯហ្វូងមនុស្សទាំងអស់ ក៏មកឯទ្រង់ ហើយទ្រង់បង្រៀនគេ លុះទ្រង់យាងហួសពីនោះទៅ ក៏ទតឃើញលេវី ជាកូនអាល់ផាយ អង្គុយនៅត្រង់កន្លែងយកពន្ធ រួចមានបន្ទូលទៅគាត់ថា ចូរមកតាមខ្ញុំ នោះគាត់ក៏ក្រោកឡើងដើរតាមទ្រង់
កាលព្រះយេស៊ូវទ្រង់គង់នៅតុក្នុងផ្ទះគាត់ នោះមានមនុស្សយកពន្ធ នឹងមនុស្សបាបជាច្រើន មកអង្គុយនៅតុជាមួយនឹងទ្រង់ ហើយនឹងពួកសិស្ស ដ្បិតមានគ្នាច្រើនណាស់ ដែលតាមទ្រង់មក ឯពួកអាចារ្យនឹងពួកផារិស៊ី កាលគេឃើញទ្រង់សោយជាមួយនឹងពួកអ្នកយកពន្ធ នឹងមនុស្សមានបាបដូច្នេះ ក៏សួរពួកសិស្សទ្រង់ថា ហេតុអ្វីបានជាលោកបរិភោគជាមួយនឹងពួកអ្នកយកពន្ធ ហើយនឹងមនុស្សមានបាបដូច្នេះ លុះព្រះយេស៊ូវបានឮ នោះទ្រង់មានបន្ទូលថា ពួកអ្នកដែលជាសុខសប្បាយ គេមិនត្រូវការនឹងគ្រូពេទ្យទេ គឺជាមនុស្សដែលមានជំងឺវិញទេតើ ខ្ញុំមិនបានមក ដើម្បីហៅមនុស្សសុចរិតទេ គឺមកហៅតែមនុស្សមានបាបប៉ុណ្ណោះ ដើម្បីឲ្យគេប្រែចិត្តឡើង។
២ កូរិនថូស ១៣:៥-១១
ចូរអ្នករាល់គ្នាពិចារណាខ្លួនឯងមើល តើស្ថិតនៅក្នុងសេចក្ដីជំនឿឬទេ ចូរល្បងខ្លួនមើលចុះ តើអ្នករាល់គ្នាមិនយល់ឃើញថា ព្រះយេស៊ូវគ្រីស្ទគង់ក្នុងអ្នករាល់គ្នាទេឬអី លើកតែអ្នករាល់គ្នាត្រូវកាត់ចោលចេញប៉ុណ្ណោះ តែខ្ញុំសង្ឃឹមថា អ្នករាល់គ្នានឹងដឹងថា យើងខ្ញុំមិនត្រូវកាត់ចោលចេញទេ ហើយខ្ញុំអធិស្ឋានដល់ព្រះ សូមកុំឲ្យអ្នករាល់គ្នាធ្វើការអាក្រក់អ្វីឡើយ មិនមែនដើម្បីឲ្យយើងខ្ញុំបានរាប់ជាគួរទេ គឺប្រយោជន៍ឲ្យអ្នករាល់គ្នាបានប្រព្រឹត្តសេចក្ដីល្អតែប៉ុណ្ណោះ ហើយឲ្យយើងខ្ញុំទុកដូចជាត្រូវកាត់ចេញវិញចុះ ដ្បិតយើងខ្ញុំពុំអាចនឹងធ្វើអ្វី ទាស់នឹងសេចក្ដីពិតបានទេ ធ្វើបានតែអ្វីដែលសំរាប់សេចក្ដីពិតវិញ ពីព្រោះយើងខ្ញុំមានសេចក្ដីអំណរ ក្នុងកាលដែលយើងខ្ញុំខ្សោយ ហើយអ្នករាល់គ្នាមានកំឡាំងឡើង តែយើងខ្ញុំអធិស្ឋានសូមសេចក្ដីនេះទៀត គឺឲ្យពួកអ្នករាល់គ្នាបានគ្រប់លក្ខណ៍ទាំងអស់គ្នា ហេតុនោះបានជាកាលខ្ញុំនៅឃ្លាតពីអ្នករាល់គ្នា នោះខ្ញុំធ្វើសំបុត្រនេះ ក្រែងកាលណាខ្ញុំមកនៅជាមួយ នោះខ្ញុំនឹងប្រព្រឹត្តនឹងអ្នករាល់គ្នាដោយតឹងរុឹង តាមអំណាចដែលព្រះអម្ចាស់បានប្រទានមកខ្ញុំ គឺសំរាប់នឹងស្អាងចិត្តឡើង មិនមែននឹងផ្តួលទេ។
ឯសេចក្ដីឯទៀត បងប្អូនអើយ ចូរមានសេចក្ដីអំណរ ចូរឲ្យបានគ្រប់លក្ខណ៍ ចូរឲ្យមានចិត្តក្សេមក្សាន្ត ចូរមានគំនិតដូចគ្នា ចូរនៅដោយមេត្រីនឹងគ្នាចុះ នោះព្រះនៃសេចក្ដីស្រឡាញ់ នឹងសេចក្ដីសុខសាន្ត ទ្រង់នឹងគង់នៅជាមួយនឹងអ្នករាល់គ្នា
លូកា ៦:៣៧-៤៥
កុំឲ្យថ្កោលទោសគេឲ្យសោះ ដើម្បីកុំឲ្យមានគេថ្កោលទោសអ្នកវិញ កុំឲ្យនិន្ទាគេឡើយ ដើម្បីកុំឲ្យមានគេនិន្ទាអ្នកវិញដែរ ចូរលើកលែងឲ្យគេ នោះគេនឹងលើកលែងឲ្យអ្នកវិញ ចូរឲ្យទៅគេ នោះនឹងបានឲ្យមកអ្នកដែរ គេនឹងវាល់ឲ្យអ្នកយ៉ាងល្អ ទាំងញាត់ ទាំងរលាក់ ហើយដាក់ឲ្យហៀរ នឹងយកមកដាក់បំពេញចិត្តអ្នកផង ដ្បិតគេនឹងវាល់ឲ្យអ្នក តាមរង្វាល់ណាដែលអ្នកវាល់ឲ្យគេ។
ទ្រង់ក៏មានបន្ទូលពាក្យប្រៀបទៅគេថា តើមនុស្សខ្វាក់អាចនឹងដឹកមនុស្សខ្វាក់បានឬទេ តើមិនធ្លាក់ទៅក្នុងរណ្តៅទាំង២នាក់ទេឬអី សិស្សមិនមែនលើសជាងគ្រូទេ តែអ្នកណាដែលបានគ្រប់លក្ខណ៍ នោះនឹងបានដូចជាគ្រូដែរ ហេតុអ្វីបានជាមើលឃើញកំទេច ដែលនៅក្នុងភ្នែកប្អូនអ្នក តែមិនឃើញធ្នឹម ដែលនៅក្នុងភ្នែកខ្លួនវិញសោះ ធ្វើដូចម្តេចឲ្យអ្នក ដែលមើលធ្នឹមក្នុងភ្នែកខ្លួនមិនឃើញ អាចនិយាយទៅប្អូនបាន ថា ប្អូនអើយឲ្យអញយកកំទេច ពីភ្នែកឯងចេញដូច្នេះ ឱអ្នកមានពុតអើយ ចូរយកធ្នឹមពីភ្នែកអ្នកចេញជាមុនសិន នោះទើបនឹងបានឃើញច្បាស់ អាចនឹងយកកំទេចចេញពីភ្នែកប្អូនអ្នកបានដែរ
ដ្បិតគ្មានដើមឈើល្អណា ដែលមានផលផ្លែអាក្រក់ទេ ក៏គ្មានដើមអាក្រក់ណា ដែលមានផលផ្លែល្អដែរ ពីព្រោះគេស្គាល់ដើមឈើនិមួយៗ ដោយសារតែផ្លែទេ គេមិនដែលបេះផ្លែល្វាពីគុម្ពបន្លា ឬផ្លែទំពាំងបាយជូរពីអញ្ចាញឡើយ ឯមនុស្សល្អ គេក៏យកសេចក្ដីល្អ ពីកំណប់ល្អ ដែលកប់ទុកក្នុងចិត្តគេ ហើយមនុស្សអាក្រក់ក៏យកសេចក្ដីអាក្រក់ ចេញពីកំណប់អាក្រក់ក្នុងចិត្តខ្លួនដែរ ដ្បិតមាត់គេពោលបញ្ចេញសេចក្ដីបរិបូរ ដែលនៅក្នុងចិត្តជានិច្ច