ក្នុងនាមជាអ្នកដើរតាមព្រះយេស៊ូវ ទស្សនៈរបស់យើងចំពោះព្រះ សំខាន់ខ្លាំងណាស់។ វាក៏សំខាន់សម្រាប់យើងក្នុងការយល់ពីរបៀបដែលព្រះទតមើលមកយើងដែរ។
ប្រសិនបើព្រះនឹងណែនាំអំពីអ្នកទៅកាន់មនុស្សមួយក្រុម តើអ្នកគិតថា ទ្រង់នឹងមានបន្ទូលយ៉ាងណាអំពីអ្នក?
ហេតុអ្វីបានជាអ្នកគិតថា ទ្រង់នឹងមានបន្ទូលដូច្នេះ?
សំណួរស៊ីជម្រៅមួយចំនួននៅក្នុងជីវិតគឺអំពីអត្តសញ្ញាណរបស់យើង៖ «តើខ្ញុំជានរណា?» និង «តើខ្ញុំមានតម្លៃអ្វី?» អត្តសញ្ញាណរបស់យើង ឬរូបភាពអំពីខ្លួនឯងត្រូវបានបង្កើតឡើងភាគច្រើនដោយប្រវត្តិសាវតារ បទពិសោធ និងរបៀបដែលអ្នកដទៃមើលមកយើង។ ពេលខ្លះ យើងកំណត់ជីវិតរបស់យើងដោយអារម្មណ៍របស់យើងចំពោះខ្លួនយើង ឬអ្វីដែលអ្នកដទៃនិយាយអំពីយើង។ ផ្ទុយទៅវិញ អត្តសញ្ញាណ និងតម្លៃរបស់យើងគួរតែមកពីអ្វីដែលព្រះអាទិកររបស់យើងមានបន្ទូលអំពីយើង។
យើងមានតម្លៃក្នុងនាមជាស្នាព្រះហស្ដរបស់ព្រះ
ព្រះដាក់តម្លៃនៅលើមនុស្សម្នាក់ៗ។ សូមពិចារណាអំពី លោកុប្បត្តិ ១:២៧ និង ទំនុកដំកើង ៨:៤-៥.
លោកុប្បត្តិ ១:២៧
ទ្រង់ក៏បង្កើតមនុស្សឲ្យដូចរូបអង្គទ្រង់ គឺបានបង្កើតគេឲ្យចំនឹងរូបអង្គទ្រង់នោះឯង ក៏បង្កើតគេឡើងជាប្រុសជាស្រី
ទំនុកដំកើង ៨:៤-៥
. . . នោះតើមនុស្សជាអ្វី ដែលទ្រង់នឹករឭកដល់គេ
ហើយកូនមនុស្សផង ដែលទ្រង់ប្រោសដូច្នេះ
ដ្បិតទ្រង់បានធ្វើឲ្យគេទាបជាងពួកទេវតាតែបន្តិចទេ
ក៏បានបំពាក់សិរីល្អ នឹងកេរ្តិ៍ឈ្មោះឲ្យ ទុកជាមកុដ
ការរកឃើញ : តើអ្វីផ្តល់ឲ្យយើងមានតម្លៃ និងញែកយើងខុសប្លែកពីអ្វីៗផ្សេងទៀតដែលទ្រង់បានបង្កើតមក?
ការគិតពិចារណា : តើខគម្ពីរទាំងនេះប្រាប់យើងអ្វីខ្លះអំពីព្រះហឫទ័យរបស់ព្រះ និងពីអារម្មណ៍របស់ទ្រង់ចំពោះយើង?
ក្នុងចំណោមស្នាព្រះហស្ដទាំងអស់ដែលព្រះបានបង្កើត មានតែមនុស្សដែលមានលក្ខណៈដូចជារូបអង្គនៃព្រះ។ ទំនុកដំកើង ១៣៩:១៣-១៤ និយាយអំពីភាពពិសេសខុសប្លែកពីគ្នា ដែលព្រះបានប្រទានមកយើង។
ទំនុកដំកើង ១៣៩:១៣-១៤
ដ្បិតគឺទ្រង់ដែលបានបង្កើតចិត្តថ្លើមនៃទូលបង្គំ
ហើយបានផ្សំគ្រឿងនៃទូលបង្គំនៅក្នុងផ្ទៃម្តាយ
ទូលបង្គំនឹងអរព្រះគុណដល់ទ្រង់
ដ្បិតទ្រង់បានបង្កើតទូលបង្គំមកយ៉ាងគួរកោត គួរអស្ចារ្យ
ឯស្នាដៃនៃទ្រង់ ក៏សុទ្ធតែអស្ចារ្យទាំងអស់
ព្រលឹងទូលបង្គំក៏ដឹងច្បាស់ហើយ
ការពិភាក្សា : តើសង្គមមនុស្ស ផ្ដល់សារខុសៗគ្នាអំពីតម្លៃរបស់មនុស្សយ៉ាងណាខ្លះ?
យើងមានការទទួលខុសត្រូវធំក្នុងការបង្រៀនកុមារអំពីភាពពិសេសខុសប្លែកគ្នា និងតម្លៃរបស់ពួកគេដោយផ្អែកលើការពិតនេះ ប៉ុន្តែតើយើងជឿបែបនេះអំពីខ្លួនយើងដែរឬទេ?សូមអានឡើងវិញនូវ ទំនុកដំកើង ១៣៩:១៣-១៤.
ការពិភាក្សា : តើអ្នកឃើញខ្លួនឯងថា «ព្រះបានបង្កើតអ្នកឡើងមកយ៉ាងអស្ចារ្យ» ទេ? បើមិនដូច្នេះទេ តើអ្វីដែលបណ្តាលឲ្យអ្នកគិតខុសពីនេះ?
ការចែកចាយ : តើអ្នកស្រមៃថា ព្រះមានទស្សនៈយ៉ាងណាចំពោះអ្នក? តើវាស្របទៅនឹងអ្វីដែលខគម្ពីរទាំងនេះចែងយ៉ាងណាដែរ?
ព្រះទតឃើញមនុស្សម្នាក់ៗនៅលើពិភពលោកនេះថាជាស្នាព្រះហស្ដវិសេសវិសាលដែលមានតម្លៃ សូម្បីតែមុនពេលយើងជឿលើទ្រង់ក៏ដោយ។ តម្លៃរបស់យើងចំពោះព្រះ គឺមិនអាស្រ័យលើគុណសម្បត្តិរបស់យើង របៀបរស់នៅរបស់យើង ឬសូម្បីតែយើងស្គាល់ព្រះយេស៊ូវនោះទេ។ សេចក្តីស្រឡាញ់របស់ទ្រង់ចំពោះយើង ក្នុងនាមយើងជាស្នាព្រះហស្ដដ៏ពិសេសប្លែកគេរបស់ទ្រង់ បាននាំទ្រង់ឲ្យប្រទានផ្លូវនៃសេចក្តីសង្រ្គោះ ដូច្នេះយើងអាចស្គាល់ទ្រង់ ហើយនៅជាមួយទ្រង់អស់កល្បជានិច្ច។ សូមអាន រ៉ូម ៥:៨។
អត្តសញ្ញាណថ្មីរបស់យើងក្នុងនាមជាប្រជារាស្ដ្ររបស់ព្រះ
នៅពេលដែលយើងទទួលជឿលើព្រះគ្រីស្ទ ទំនាក់ទំនងរបស់យើងជាមួយព្រះមានការផ្លាស់ប្តូរ ហើយយើងមិនត្រឹមតែជាស្នាព្រះហស្ដដ៏ពិសេសរបស់ទ្រង់ប៉ុណ្ណោះទេ។ យើងទទួលបានអត្តសញ្ញាណថ្មីមួយក្នុងនាមជាប្រជារាស្ដ្ររបស់ព្រះ។ កូល៉ុស ៣:១២ ហៅយើងថា «ពួកអ្នករើសតាំង ដែលបរិសុទ្ធ ហើយស្ងួនភ្ងាដល់ព្រះ»។
ការពិភាក្សា : តើកត្តាអ្វីដែលអាចបណ្តាលឲ្យយើងមានអារម្មណ៍ថា ការពិពណ៌នានេះមិនមែន ឬមិនអាចត្រឹមត្រូវចំពោះយើង?
យើងមានអភ័យឯកសិទ្ធិក្នុងការរកឃើញនៅក្នុងព្រះបន្ទូលរបស់ព្រះ អំពីរបៀបដែលព្រះទតឃើញយើង និងលក្ខណៈពិតរបស់យើងក្នុងនាមជាប្រជារាស្ដ្ររបស់ទ្រង់។ ព្រះបន្ទូលរបស់ទ្រង់ចែងថា យើងបានកើតជាថ្មី (២ កូរិនថូស ៥:១៧) យើងបានកើតជាថ្មីជាកូនរបស់ព្រះ (យ៉ូហាន ១:១២-១៣) ហើយយើងបានទទួលជីវិតអស់កល្បជានិច្ច (១ យ៉ូហាន ៥:១១-១៣)។ ព្រះចាត់ទុកយើងម្នាក់ៗជាសមាជិកដ៏ជាទីស្រឡាញ់នៃក្រុមគ្រួសាររបស់ទ្រង់។ ប្រសិនបើទ្រង់នឹងណែនាំអ្នកទៅកាន់គេ ទ្រង់នឹងមានបន្ទូលថា «នេះគឺជាបុត្រដ៏ជាទីស្រឡាញ់របស់យើង គឺ (ឈ្មោះរបស់អ្នក)»។
ពាក្យមួយចំនួនផ្សេងទៀតដែលជាការពិតអំពីប្រជារាស្ដ្ររបស់ព្រះជាម្ចាស់គឺ ៖ អ្នកស្នងមរតក (រ៉ូម ៨:១៧), មិត្តសម្លាញ់ (យ៉ូហាន ១៥:១៥), ប្រជារាស្ដ្រដ៏បរិសុទ្ធ (១ កូរិនថូស ១:២), អ្នកជាទីស្រឡាញ់ (យូដាស ១), ព្រះវិហារដ៏វិសុទ្ធរបស់ព្រះ (១ កូរិនថូស ៣:១៦) និងទូតតំណាង (២ កូរិនថូស ៥:២០)។
ការចែកចាយ : តើការពណ៌នាមួយណាមានន័យបំផុតសម្រាប់អ្នក ហើយហេតុអ្វី? តើអ្នកដឹងពីឋានៈផ្សេងទៀតដែលព្រះបានប្រទានមកអ្នកទេ?
សូមមើល ១ យ៉ូហាន ៣:១; អេសាយ ៤៣:១, ៤, ៧; និង១ ពេត្រុស ២:៩ ដើម្បីមើលឃើញអ្វីដែលនៅពីក្រោយការជ្រើសរើសរបស់ព្រះ នៅក្នុងការផ្ដល់អត្តសញ្ញាណថ្មីនេះដល់យើង។
១ យ៉ូហាន ៣:១
មើល សេចក្ដីស្រឡាញ់យ៉ាងណាហ្ន៍ ដែលព្រះវរបិតាបានផ្តល់មកយើងរាល់គ្នា ឲ្យយើងបានហៅថាជាកូនរបស់ព្រះដូច្នេះ គឺដោយហេតុនោះបានជាលោកីយមិនស្គាល់យើងទេ ពីព្រោះមិនស្គាល់ទ្រង់ដែរ
អេសាយ ៤៣:១, ៤, ៧
ប៉ុន្តែ ឱពួកយ៉ាកុបអើយ ឥឡូវនេះ ព្រះយេហូវ៉ាជាព្រះដែលបង្កើតឯងមក ហើយឱពួកអ៊ីស្រាអែលអើយ ព្រះដែលជបសូនឯង ទ្រង់មានបន្ទូលដូច្នេះថា កុំឲ្យខ្លាចឡើយ ដ្បិតអញបានលោះឯងហើយ អញបានហៅចំឈ្មោះឯង ឯងជារបស់ផងអញ . . .
អញនឹងឲ្យមនុស្សដទៃជំនួសឯង ហើយប្រជាជាតិផ្សេងៗ ស្នងនឹងជីវិតឯង ដោយព្រោះឯងមានដំឡៃវិសេសនៅភ្នែកអញ ក៏គួរលើកដំកើង ហើយជាទីស្រឡាញ់ដល់អញផង. . .
. . . គឺគ្រប់មនុស្សដែលបានហៅតាមនាមឈ្មោះអញ ជាអ្នកដែលអញបានបង្កើតមកសំរាប់សិរីល្អនៃអញ គឺជាអ្នកដែលអញបានជបសូន អើ ជាអ្នកដែលអញបានតែងតាំងឡើង។
(អានបន្ថែម)”
១ ពេត្រុស ២:៩
តែអ្នករាល់គ្នាជាពូជជ្រើសរើស ជាពួកសង្ឃហ្លួង ជាសាសន៍បរិសុទ្ធ ជារាស្ត្រដ៏ជាកេរ្តិ៍អាករនៃព្រះ ដើម្បីឲ្យអ្នករាល់គ្នាបានសំដែងចេញ ឲ្យឃើញអស់ទាំងលក្ខណៈរបស់ព្រះ ដែលទ្រង់បានហៅអ្នករាល់គ្នាចេញពីសេចក្ដីងងឹត មកក្នុងពន្លឺអស្ចារ្យរបស់ទ្រង់។
ការរកឃើញ : តើព្រះពណ៌នាថាអ្នកជានរណា?
ការរកឃើញ : តើអត្ថបទគម្ពីរទាំងនេះបើកបង្ហាញអ្វីខ្លះអំពីព្រះហឫទ័យរបស់ព្រះ?
ការគិតពិចារណា : តើអត្តសញ្ញាណថ្មីរបស់អ្នកអាស្រ័យលើសេចក្ដីស្រឡាញ់របស់នរណា - របស់ទ្រង់ ឬរបស់អ្នក?
ការរកឃើញ : តើព្រះបានឲ្យបង្កើតអ្នកមក ហើយផ្តល់ឲ្យអ្នកនូវអត្តសញ្ញាណថ្មីនេះ ក្នុងគោលបំណងអ្វី?
ការគិតពិចារណា : តើព្រះទទួលសិរីរុងរឿងតាមរយៈអត្តសញ្ញាណរបស់អ្នកដោយរបៀបណា?
ការគិតពិចារណា : តើមានអ្វីខ្លះអំពីអ្នកដែលធ្វើឲ្យអ្នកមានអារម្មណ៍ថា អ្នកមិនបានថ្វាយសិរីរុងរឿងដល់ព្រះដែរឬទេ?
អត្តសញ្ញាណថ្មីរបស់យើងគឺ «ក្នុងអង្គព្រះគ្រីស្ទ»
ព្រះគម្ពីរសញ្ញាថ្មីពិពណ៌នាអំពីជីវិតថ្មីរបស់យើងថា «នៅក្នុងអង្គព្រះគ្រីស្ទ»។ សូមមើល ២ កូរិនថូស ៥:១៧។ យើងមានអត្តសញ្ញាណថ្មី តាមរយៈព្រះគ្រីស្ទ ដែលបន្ត ជាមួយនឹងព្រះគ្រីស្ទ ដោយសារយើង នៅក្នុងព្រះគ្រីស្ទ។
២ កូរិនថូស ៥:១៧
បានជាបើអ្នកណានៅក្នុងព្រះគ្រីស្ទ នោះឈ្មោះថាបានកើតជាថ្មីហើយ អស់ទាំងសេចក្ដីចាស់បានកន្លងបាត់ទៅ មើល គ្រប់ទាំងអស់បានត្រឡប់ជាថ្មីវិញ
ក្នុងនាមជាមនុស្សដែលបានកើតជាថ្មី ឥឡូវនេះយើងរួបរួមគ្នាជាមួយព្រះគ្រីស្ទ ហើយអត្តសញ្ញាណរបស់យើងគឺមកពីទ្រង់។ កូល៉ុស ៣:៣ ចែងថា ៖ «ដ្បិតអ្នករាល់គ្នាបានស្លាប់ហើយ ជីវិតអ្នករាល់គ្នាក៏លាក់ទុកក្នុងព្រះ ជាមួយនឹងព្រះគ្រីស្ទ។» ឥឡូវនេះ ព្រះគ្រាន់តែទតឃើញយើងនៅក្នុងអត្តសញ្ញាណថ្មី និងឋានៈរបស់យើងនៅក្នុងព្រះគ្រីស្ទប៉ុណ្ណោះ។
តាមរយៈព្រះគ្រីស្ទ ៖ របៀបដែលព្រះទតឃើញយើង គឺខុសពីរបៀបដែលយើងមើលឃើញខ្លួនយើង។ នៅពេលដែលយើងចាប់ផ្តើមទំនាក់ទំនងរបស់យើងជាមួយព្រះយេស៊ូវគ្រីស្ទ ព្រះបានទទួលយកយើងដោយផ្អែកលើអ្វីដែលព្រះគ្រីស្ទបានធ្វើសម្រាប់យើង ជាជាងលើអ្វីដែលយើងធ្វើ។ សូមមើលរឿងនេះឲ្យកាន់តែលម្អិតនៅក្នុង ២ កូរិនថូស ៥:២១។
២ កូរិនថូស ៥:២១
ដ្បិតឯព្រះអង្គ ដែលមិនបានស្គាល់បាបសោះ នោះព្រះទ្រង់បានធ្វើឲ្យត្រឡប់ជាតួបាប ជំនួសយើងរាល់គ្នាវិញ ដើម្បីឲ្យយើងរាល់គ្នាបានត្រឡប់ទៅជាសេចក្ដីសុចរិតរបស់ព្រះ ដោយនូវព្រះអង្គនោះឯង។
ការរកឃើញ : តើព្រះពណ៌នាថាអ្នកប្រែក្លាយជានរណា «នៅក្នុងទ្រង់»?
[ចំណាំ៖ «សេចក្ដីសុចរិត» មានន័យថា នៅក្នុងព្រះនេត្ររបស់ព្រះ ទ្រង់ទទួលយក និងទទួលស្គាល់យើងដោយគ្មានការបន្ទោស ឬរនាំងនៃអំពើបាបឡើយ។ នៅពេលដែលព្រះយេស៊ូវបានទទួលយកបាបរបស់យើងដាក់លើអង្គទ្រង់ ហើយបានបង់ថ្លៃទោសកំហុសជំនួសយើង ទ្រង់បានប្រទានឲ្យយើងនូវ
សេចក្តីសុចរិតរបស់ទ្រង់ជាថ្នូរវិញ។]
នៅពេលដែលព្រះទតមើលមកយើង ទ្រង់ទទួលយកអ្វីដែលបានសម្រេចតាមរយៈព្រះគ្រីស្ទថាជាការពិតចំពោះយើង។ ឥឡូវ សូមពិចារណា កូល៉ុស ១:២១-២២។
កូល៉ុស ១:២១-២២
រីឯអ្នករាល់គ្នា ដែលពីដើមត្រូវពង្រាត់ចេញ ហើយជាខ្មាំងសត្រូវក្នុងគំនិត ដោយអំពើអាក្រក់នោះ ឥឡូវនេះវិញ ទ្រង់បានផ្សះផ្សាក្នុងរូបសាច់ទ្រង់ ដោយបានទទួលសុគត ដើម្បីនឹងថ្វាយអ្នករាល់គ្នាជាដង្វាយបរិសុទ្ធ ឥតសៅហ្មង ហើយឥតកន្លែងបន្ទោសបាន នៅចំពោះទ្រង់
ការរកឃើញ : មុនពេលយើងទទួលជឿព្រះគ្រីស្ទ តើយើងមានលក្ខណៈបែបណា?
ការរកឃើញ : តើឥឡូវនេះ ព្រះគ្រីស្ទបង្ហាញយើងទៅកាន់ព្រះយ៉ាងដូចម្ដេច?
ការគិតពិចារណា : តើសេចក្ដីនេះប្រៀបធៀបនឹងទស្សនៈរបស់អ្នកចំពោះខ្លួនឯងយ៉ាងណា?
យើងមានអារម្មណ៍តានតឹង ព្រោះយើងដឹងថានេះមិនពិពណ៌នាពីសកម្មភាពរបស់យើង ឬស្ថានភាពនៃចិត្តរបស់យើងទេ។ តើព្រះអាចមានបន្ទូលថាយើងបរិសុទ្ធដោយរបៀបណា ពេលយើងដឹងថាយើងមិនមែនបរិសុទ្ធនោះ? ហេព្រើរ ១០:១០ និង ១៤ ជួយយើងឲ្យយល់អំពីរឿងនេះ។
ហេព្រើរ ១០:១០, ១៤
គឺដោយសារចំណង់ព្រះហឫទ័យនោះ ដែលយើងរាល់គ្នាបានញែកជាបរិសុទ្ធ ដោយសារដង្វាយថ្វាយរូបអង្គព្រះយេស៊ូវគ្រីស្ទ១ដងជាសំរេច។
. . .
ដ្បិតទ្រង់ធ្វើឲ្យពួកអ្នក ដែលបានញែកជាបរិសុទ្ធហើយ បានគ្រប់លក្ខណ៍អស់កល្បជានិច្ច ដោយសារដង្វាយតែ១នោះ
ការរកឃើញ : តើខ១០ចែងថាការសុគតរបស់ព្រះយេស៊ូវបានសម្រេចអ្វីខ្លះ? តើនេះជាសកម្មភាពក្នុងអតីតកាល បច្ចុប្បន្នកាល ឬអនាគត? តើវាមានរយៈពេលប៉ុន្មាន?
ការរកឃើញ : តើពាក្យចំនួនពីរដែលខ ១៤ ប្រើមានអ្វីខ្លះ ដើម្បីពិពណ៌នាអំពីយើង ? តើនេះជាសកម្មភាពអតីតកាល បច្ចុប្បន្នកាល ឬអនាគតកាល?
ការពិភាក្សា : តើ «បានគ្រប់លក្ខណ៍» និង «ញែកជាបរិសុទ្ធ» អាចជាការពិតចំពោះយើងដោយរបៀបណា?
[ចំណាំ៖ «ញែកជាបរិសុទ្ធ» មានន័យថាញែកដាច់ឡែកសម្រាប់ព្រះ ជាបរិសុទ្ធ។ ព្រះទតឃើញយើងថា «គ្រប់លក្ខណ៍» ត្រូវបានញែកជាបរិសុទ្ធ ឬបានធ្វើឲ្យបរិសុទ្ធ ដោយសារការលះបង់របស់ព្រះយេស៊ូវសម្រាប់យើង។ ប៉ុន្តែតាមបទពិសោធប្រចាំថ្ងៃរបស់យើង យើងនៅតែ «ត្រូវបានញែកជាបរិសុទ្ធ» ដោយប្រែក្លាយកាន់តែមានលក្ខណៈដូចព្រះយេស៊ូវ។ ព្រះទ្រង់ប្តេជ្ញាក្នុងការផ្លាស់ប្រែយើង ហើយនឹងបន្តធ្វើការក្នុងជីវិតរបស់យើង។ សូមមើល ភីលីព ១:៦ និង ៣:២០-២១។]
ភីលីព ៣:២០-២១
ឯយើងរាល់គ្នា យើងជាសាសន៍ស្ថានសួគ៌វិញ ក៏នៅចាំព្រះអម្ចាស់យេស៊ូវគ្រីស្ទ ជាព្រះអង្គសង្គ្រោះ ទ្រង់យាងមកពីស្ថាននោះឯង ដែលទ្រង់នឹងបំផ្លាស់បំប្រែរូបកាយទាបថោករបស់យើង ឲ្យត្រឡប់ដូចជារូបអង្គឧត្តមរបស់ទ្រង់ តាមដែលព្រះចេស្តាទ្រង់ពូកែនឹងបញ្ចុះបញ្ចូលគ្រប់ទាំងអស់ នៅក្រោមអំណាចទ្រង់ផង។
ដោយប្រកាសថាយើងបានគ្រប់លក្ខណ៍ គ្មានអ្វីផ្សេងទៀតដែលយើងត្រូវការដើម្បីធ្វើឲ្យព្រះទទួលយកយើងទេ។ យើងបំពេញតាមការរំពឹងទុករបស់ទ្រង់ទាំងអស់ហើយ។ នេះជាសេចក្ដីពិតដ៏អស្ចារ្យ!
ការគិតពិចារណា : ប្រសិនបើមានគេសួរអ្នកថា «តើអ្នកបានបំពេញតាមការរំពឹងទុករបស់ព្រះឬទេ?» តើព្រះចង់ឲ្យអ្នកឆ្លើយដូចម្តេច?
ការគិតពិចារណា : តើព្រះចង់ឲ្យយើងយល់ពីតម្លៃរបស់យើង ទៅតាមទស្សនៈមួយណា - ពីអ្វីដែលទ្រង់មានបន្ទូលអំពីយើង ពីអ្វីដែលអ្នកដទៃនិយាយអំពីយើង ឬដោយរបៀបដែលយើងមានទស្សនៈចំពោះខ្លួនយើង?
ជាមួយព្រះគ្រីស្ទ ៖ អត្តសញ្ញាណរបស់យើង «នៅក្នុងព្រះគ្រីស្ទ» ក៏អាចឲ្យយើងរស់នៅខុសពីមុនក្នុងដំណើរការរីកចម្រើននេះ ដោយសារយើងរួបរួមគ្នាជាមួយព្រះគ្រីស្ទ។ ទ្រង់ជ្រើសរើសចែករំលែកនូវមុខដំណែង អភ័យឯកសិទ្ធិ និងអំណាចរបស់ទ្រង់ជាមួយយើង ជាជាងឲ្យយើងព្យាយាមសម្រេចវាដោយខ្លួនឯង។ សូមមើល អេភេសូរ ២:៤-៧, ១៨។
អេភេសូរ ២:៤-៧, ១៨
. . .
ដ្បិតដោយសារទ្រង់ នោះយើងទាំង២សាសន៍មានផ្លូវចូលទៅដល់ព្រះវរបិតា ដោយព្រះវិញ្ញាណតែ១
ការរកឃើញ : តើការស្ថិតនៅក្នុងអង្គព្រះគ្រីស្ទផ្តល់អ្វីដល់យើង?
យើងអាចនឹងមានការពិបាកក្នុងការទទួលស្គាល់អត្តសញ្ញាណរបស់យើងក្នុងព្រះគ្រីស្ទ ដោយមានអារម្មណ៍ថាខ្លួនមិនស័ក្តិសម ឬថាយើងត្រូវព្យាយាមធ្វើកិច្ចការផ្សេងៗ ដើម្បីឲ្យព្រះគាប់ព្រះហឫទ័យនឹងយើង។ សូមចាំថាអេសាយ ៤៣:៧ ចែងថា ព្រះបានបង្កើតអ្នកសម្រាប់សិរីល្អរបស់ទ្រង់។
ការគិតពិចារណា : តើអ្វីដែលនាំឲ្យព្រះទទួលសិរីល្អ ៖ អ្វីដែលយើងធ្វើ ឬការទទួលយកនូវអ្វីដែលទ្រង់បានធ្វើសម្រាប់យើងក្នុងព្រះគ្រីស្ទ?
អត្តសញ្ញាណថ្មីរបស់យើងនៅក្នុងព្រះគ្រីស្ទគឺអស្ចារ្យណាស់! ចូរយើងអរព្រះគុណ និងសរសើរតម្កើងព្រះចំពោះសេចក្តីពិត អំពីរបៀបដែលទ្រង់ទតឃើញយើង។ សូមអាន អេភេសូរ ១:៣-៦ នៅក្នុងព្រះគម្ពីររបស់អ្នក ហើយប្រើប្រាស់អត្ថបទគម្ពីរនោះជាការអធិស្ឋាននៃការអរព្រះគុណចំពោះអត្តសញ្ញាណរបស់យើងនៅក្នុងព្រះគ្រីស្ទឥឡូវនេះ។
ការបន្តឆ្ពោះទៅមុខ
ការបញ្ជាក់ : តើអ្នកមានគំនិត ឬសំណួរអ្វីខ្លះ?
ការសង្ខេប : តើអ្នកនឹងឆ្លើយសំណួរថា៖ «តើព្រះទតឃើញអ្នកយ៉ាងណា?» ថាយ៉ាងដូចម្ដេច? តើនេះប្រាប់អ្នកពីអ្វីខ្លះអំពីព្រះហឫទ័យ
របស់ព្រះ?
ការអនុវត្ត: តើអ្នកគិតថា ការណ៍នេះគួរតែនាំការផ្លាស់ប្ដូរអ្វីខ្លះមកក្នុងជីវិតអ្នក?
ការចែកចាយបន្ត : តើអ្នកអាចចែកចាយនូវសេចក្ដីពិតទាំងនេះជាមួយអ្នកណា?
ការពង្រឹង:
នៅសប្តាហ៍នេះ សូមអានខគម្ពីរទាំងនេះ ហើយគិតពិចារណាពីការពិតដ៏អស្ចារ្យនៃអត្តសញ្ញាណរបស់អ្នកនៅក្នុងព្រះគ្រីស្ទ។
អេភេសូរ ១:៣-២៣
សូមសរសើរដល់ព្រះដ៏ជាព្រះវរបិតានៃព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នា ដែលទ្រង់បានប្រទានពរមកយើងក្នុងព្រះគ្រីស្ទ ដោយគ្រប់ទាំងព្រះពរខាងព្រលឹងវិញ្ញាណ នៅស្ថានដ៏ខ្ពស់ តាមដែលទ្រង់បានរើសយើងរាល់គ្នាក្នុងព្រះគ្រីស្ទ តាំងពីមុនកំណើតលោកីយមក ប្រយោជន៍ឲ្យយើងរាល់គ្នាបានបរិសុទ្ធ ហើយឥតកន្លែងបន្ទោសបាននៅចំពោះទ្រង់ ដោយសេចក្ដីស្រឡាញ់ ពីព្រោះទ្រង់បានដំរូវយើងរាល់គ្នាទុកជាមុន សំរាប់ឲ្យទ្រង់បានទទួលយើងជាកូនចិញ្ចឹម ដោយសារព្រះយេស៊ូវគ្រីស្ទ តាមបំណងព្រះហឫទ័យទ្រង់ ដើម្បីនឹងសរសើរដល់ព្រះគុណដ៏ឧត្តមរបស់ទ្រង់ ដែលបានផ្តល់មកយើងរាល់គ្នាទទេ ក្នុងព្រះរាជបុត្រាស្ងួនភ្ងារបស់ទ្រង់ ហើយយើងបានសេចក្ដីប្រោសលោះនៅក្នុងព្រះរាជបុត្រានោះ ដោយសារព្រះលោហិតទ្រង់ គឺជាសេចក្ដីប្រោសឲ្យរួចពីទោស តាមព្រះគុណដ៏ធ្ងន់ក្រៃលែងនៃទ្រង់ ដែលបានផ្តល់មកយើងជាបរិបូរ ដោយនូវប្រាជ្ញា នឹងដំរិះសព្វគ្រប់ ព្រមទាំងសំដែង ឲ្យយើងរាល់គ្នាស្គាល់សេចក្ដីអាថ៌កំបាំងនៃព្រះហឫទ័យទ្រង់ តាមគំនិតដែលទ្រង់បានគិតសំរេច ក្នុងព្រះអង្គទ្រង់ សំរាប់ការកាន់កាប់ត្រួតត្រា ក្នុងកាលដែលពេលពេញកំណត់បានមកដល់ ដើម្បីនឹងបំព្រួមគ្រប់ទាំងអស់ក្នុងព្រះគ្រីស្ទ ទាំងរបស់នៅស្ថានសួគ៌ នឹងរបស់នៅផែនដីផង
ឲ្យរួមគ្នាមកក្នុងទ្រង់ ដែលយើងរាល់គ្នាបានកេរ្តិ៍អាករក្នុងទ្រង់ដែរ ដោយទ្រង់បានដំរូវយើងទុកជាមុន តាមដំរិះសំរេចរបស់ព្រះ ដែលទ្រង់ធ្វើគ្រប់ការទាំងអស់ តាមដែលគាប់ព្រះហឫទ័យទ្រង់
ប្រយោជន៍ឲ្យយើងខ្ញុំ ដែលបានទុកចិត្តជឿដល់ព្រះគ្រីស្ទជាមុន បានសំរាប់នឹងសរសើរដល់សេរីល្អទ្រង់ ឯអ្នករាល់គ្នា ក៏បានឮព្រះបន្ទូលនៃសេចក្ដីពិត គឺជាដំណឹងល្អពីសេចក្ដីសង្គ្រោះរបស់អ្នករាល់គ្នាដោយសារទ្រង់ដែរ ហើយកាលអ្នករាល់គ្នាបានជឿហើយ នោះទ្រង់ក៏ដៅចំណាំដោយព្រះវិញ្ញាណបរិសុទ្ធ ដែលបានសន្យា ព្រះវិញ្ញាណនោះទ្រង់ជាទីបញ្ចាំចិត្ត ពីដំណើរកេរ្តិ៍អាកររបស់យើងរាល់គ្នា ទាល់តែបានលោះរបស់កំណាន់ ដែលទ្រង់បានទិញទុកឲ្យយើងនោះ សំរាប់ជាសេចក្ដីសរសើរដល់សិរីល្អនៃទ្រង់។
ដោយហេតុនោះ កាលខ្ញុំឮនិយាយពីសេចក្ដីជំនឿ ដែលអ្នករាល់គ្នាមាន ដល់ព្រះអម្ចាស់យេស៊ូវ ហើយនឹងពីសេចក្ដីស្រឡាញ់ ដែលមានដល់ពួកបរិសុទ្ធទាំងអស់គ្នា នោះខ្ញុំមិនដែលលែងអរព្រះគុណ ដោយព្រោះអ្នករាល់គ្នាឡើយ គឺខ្ញុំតែងដំណាលពីអ្នករាល់គ្នា ក្នុងសេចក្ដីអធិស្ឋានរបស់ខ្ញុំវិញ ដើម្បីនឹងសូមឲ្យព្រះនៃព្រះយេស៊ូវគ្រីស្ទ ជាព្រះអម្ចាស់នៃយើង គឺជាព្រះវរបិតាដ៏មានសិរីល្អ បានប្រទានឲ្យអ្នករាល់គ្នាបានព្រះវិញ្ញាណ ដែលប្រោសឲ្យមានប្រាជ្ញា ហើយក៏បើកសំដែង ឲ្យដឹងពីដំណើរស្គាល់ទ្រង់ ដើម្បីឲ្យភ្នែកចិត្តរបស់អ្នករាល់គ្នា បានភ្លឺឡើង ប្រយោជន៍ឲ្យបានដឹងថា ដែលទ្រង់ហៅអ្នករាល់គ្នា នោះមានសេចក្ដីសង្ឃឹមជាយ៉ាងណា ហើយថា សិរីល្អដ៏ប្រសើរក្រៃលែងនៃមរដកទ្រង់ ក្នុងពួកបរិសុទ្ធជាយ៉ាងណាផង ហើយថា ព្រះចេស្តាដ៏ខ្លាំងលើសលន់របស់ទ្រង់ ដល់យើងរាល់គ្នាដែលជឿជាយ៉ាងណាដែរ តាមដែលកំឡាំងទ្រង់ដ៏មានឫទ្ធិបានពូកែនឹងធ្វើ ជាព្រះចេស្តាដែលទ្រង់បានសំដែងចេញ ដោយប្រោសព្រះគ្រីស្ទ ឲ្យមានព្រះជន្មរស់ពីស្លាប់ឡើងវិញ ព្រមទាំងតាំងឲ្យគង់ខាងស្តាំទ្រង់ នៅស្ថានដ៏ខ្ពស់ ឲ្យខ្ពស់ជាងអស់ទាំងពួកគ្រប់គ្រង ពួកមានអំណាច មានឫទ្ធិបារមី នឹងពួកមេទាំងប៉ុន្មាន ហើយគ្រប់ទាំងឈ្មោះដែលបានតាំងឡើងដែរ មិនមែនតែក្នុងបច្ចុប្បន្ននេះតែប៉ុណ្ណោះ គឺទៅក្នុងអនាគតខាងមុខទៀតផង ហើយទ្រង់បានបង្ក្រាបគ្រប់ទាំងអស់ នៅក្រោមព្រះបាទនៃព្រះរាជបុត្រា ទាំងប្រទានទ្រង់មកធ្វើជាសិរសាលើគ្រប់ទាំងអស់ ដល់ពួកជំនុំ ដែលជារូបកាយទ្រង់ គឺជាសេចក្ដីពោរពេញរបស់ព្រះអង្គ ដែលបំពេញគ្រប់ទាំងអស់ ក្នុងទាំងអស់។
អេសាយ ៤៣:១-៧
ប៉ុន្តែ ឱពួកយ៉ាកុបអើយ ឥឡូវនេះ ព្រះយេហូវ៉ាជាព្រះដែលបង្កើតឯងមក ហើយឱពួកអ៊ីស្រាអែលអើយ ព្រះដែលជបសូនឯង ទ្រង់មានបន្ទូលដូច្នេះថា កុំឲ្យខ្លាចឡើយ ដ្បិតអញបានលោះឯងហើយ អញបានហៅចំឈ្មោះឯង ឯងជារបស់ផងអញ កាលណាឯងដើរកាត់ទឹកធំ នោះអញនឹងនៅជាមួយ កាលណាដើរកាត់ទន្លេ នោះទឹកនឹងមិនលិចឯងឡើយ កាលណាឯងលុយកាត់ភ្លើង នោះឯងនឹងមិនត្រូវរលាក ហើយអណ្តាតភ្លើងក៏មិនឆាប់ឆេះឯងដែរ ដ្បិតអញនេះ គឺយេហូវ៉ា ជាព្រះនៃឯង អញជាព្រះដ៏បរិសុទ្ធនៃសាសន៍អ៊ីស្រាអែល គឺជាព្រះដ៏សង្គ្រោះរបស់ឯង អញបានឲ្យស្រុកអេស៊ីព្ទទុកជាថ្លៃលោះឯង ព្រមទាំងស្រុកអេធីយ៉ូពី នឹងស្រុកសេបា ជំនួសឯងផង អញនឹងឲ្យមនុស្សដទៃជំនួសឯង ហើយប្រជាជាតិផ្សេងៗ ស្នងនឹងជីវិតឯង ដោយព្រោះឯងមានដំឡៃវិសេសនៅភ្នែកអញ ក៏គួរលើកដំកើង ហើយជាទីស្រឡាញ់ដល់អញផង កុំឲ្យខ្លាចឡើយ ដ្បិតអញនៅជាមួយ អញនឹងនាំពូជពង្សឯងមកពីទិសខាងកើត ហើយនឹងប្រមូលគេមកពីទិសខាងលិច អញនឹងបង្គាប់ដល់ទិសខាងជើងថា ចូរប្រគល់គេមក ហើយដល់ទិសខាងត្បូងថា កុំឃាត់គេទុកឡើយ ចូរនាំអស់ទាំងកូនប្រុសរបស់អញមកពីទីឆ្ងាយ ហើយពួកកូនស្រីអញមកពីចុងផែនដីចុះ គឺគ្រប់មនុស្សដែលបានហៅតាមនាមឈ្មោះអញ ជាអ្នកដែលអញបានបង្កើតមកសំរាប់សិរីល្អនៃអញ គឺជាអ្នកដែលអញបានជបសូន អើ ជាអ្នកដែលអញបានតែងតាំងឡើង។
១ ពេត្រុស ១:៣-៩
សូមសរសើរដល់ព្រះដ៏ជាព្រះវរបិតានៃព្រះយេស៊ូវគ្រីស្ទ ជាព្រះអម្ចាស់នៃយើងរាល់គ្នា ដែលទ្រង់បានបង្កើតយើងឡើងជាថ្មី តាមសេចក្ដីមេត្តាករុណាដ៏ធំរបស់ទ្រង់ ដើម្បីឲ្យយើងរាល់គ្នាបានសេចក្ដីសង្ឃឹមដ៏រស់ ដោយសារព្រះយេស៊ូវគ្រីស្ទ ទ្រង់រស់ពីស្លាប់ឡើងវិញ ហើយឲ្យយើងបានមរដក ដែលមិនចេះពុករលួយ ក៏ឥតសៅហ្មង ហើយមិនដែលស្រពោនឡើយ ជាមរដក ដែលបំរុងទុកឲ្យយើងរាល់គ្នានៅស្ថានសួគ៌ គឺឲ្យយើងរាល់គ្នា ដែលព្រះចេស្តានៃព្រះកំពុងតែថែរក្សា ដោយសារសេចក្ដីជំនឿ សំរាប់ឲ្យបានសេចក្ដីសង្គ្រោះ ដែលប្រុងប្រៀបនឹងសំដែងមកនៅជាន់ក្រោយបង្អស់នោះ អ្នករាល់គ្នាក៏មានសេចក្ដីអំណរជាខ្លាំង ក្នុងសេចក្ដីសង្គ្រោះនោះ ទោះបើសព្វថ្ងៃនេះត្រូវរងទុក្ខព្រួយជាយូរបន្តិច ដោយកើតមានសេចក្ដីល្បួងផ្សេងៗក៏ដោយ ដើម្បីឲ្យការសាកលសេចក្ដីជំនឿនៃអ្នករាល់គ្នា ដ៏វិសេសជាងមាសដែលតែងតែខូច ទោះបើបានសាកនឹងភ្លើងក៏ដោយ នោះបានឃើញសំរាប់ជាសេចក្ដីសរសើរ កេរ្តិ៍ឈ្មោះ នឹងសិរីល្អ ក្នុងកាលដែលព្រះយេស៊ូវគ្រីស្ទទ្រង់លេចមក ដែលអ្នករាល់គ្នាមិនបានឃើញទ្រង់ទេ តែបានស្រឡាញ់ទ្រង់ ហើយទោះបើនៅជាន់ឥឡូវនេះ អ្នករាល់គ្នានៅតែមិនឃើញទ្រង់ទៀត គង់តែមានចិត្តជឿដែរ ហើយក៏ត្រេកអរសាទរក្នុងទ្រង់ ដោយសេចក្ដីអំណរដ៏ប្រសើរ ដែលរកថ្លែងមិនបាន ដោយបានទទួលចុងបំផុតនៃសេចក្ដីជំនឿរបស់អ្នករាល់គ្នា គឺជាសេចក្ដីសង្គ្រោះដល់ព្រលឹង។
ភីលីព ១:៦; ៣:២០-២១
ខ្ញុំជឿសេចក្ដីនេះជាយ៉ាងជាក់ថា ព្រះអង្គ ដែលទ្រង់បានចាប់តាំងធ្វើការល្អក្នុងអ្នករាល់គ្នា ទ្រង់នឹងធ្វើឲ្យកាន់តែពេញខ្នាតឡើង ទាល់តែដល់ថ្ងៃនៃព្រះយេស៊ូវគ្រីស្ទ . . .
ឯយើងរាល់គ្នា យើងជាសាសន៍ស្ថានសួគ៌វិញ ក៏នៅចាំព្រះអម្ចាស់យេស៊ូវគ្រីស្ទ ជាព្រះអង្គសង្គ្រោះ ទ្រង់យាងមកពីស្ថាននោះឯង ដែលទ្រង់នឹងបំផ្លាស់បំប្រែរូបកាយទាបថោករបស់យើង ឲ្យត្រឡប់ដូចជារូបអង្គឧត្តមរបស់ទ្រង់ តាមដែលព្រះចេស្តាទ្រង់ពូកែនឹងបញ្ចុះបញ្ចូលគ្រប់ទាំងអស់ នៅក្រោមអំណាចទ្រង់ផង។
១ យ៉ូហាន ៣:១-៣
មើល សេចក្ដីស្រឡាញ់យ៉ាងណាហ្ន៍ ដែលព្រះវរបិតាបានផ្តល់មកយើងរាល់គ្នា ឲ្យយើងបានហៅថាជាកូនរបស់ព្រះដូច្នេះ គឺដោយហេតុនោះបានជាលោកីយមិនស្គាល់យើងទេ ពីព្រោះមិនស្គាល់ទ្រង់ដែរ ពួកស្ងួនភ្ងាអើយ ឥឡូវនេះ យើងរាល់គ្នាជាកូនព្រះហើយ តែដែលយើងរាល់គ្នានឹងបានទៅជាយ៉ាងណាទៀត នោះមិនទាន់សំដែងមកនៅឡើយ ប៉ុន្តែ យើងដឹងថា កាលណាទ្រង់លេចមក នោះយើងនឹងបានដូចជាទ្រង់ ដ្បិតដែលទ្រង់យ៉ាងណា នោះយើងនឹងឃើញទ្រង់យ៉ាងនោះឯង អស់អ្នកណាដែលមានសេចក្ដីសង្ឃឹមយ៉ាងនេះដល់ទ្រង់ នោះក៏តែងជំរះសំអាតចិត្តខ្លួនឲ្យដូចទ្រង់ដែលស្អាតដែរ។
១ យ៉ូហាន ៤:៧-២១
ពួកស្ងួនភ្ងាអើយ យើងត្រូវស្រឡាញ់គ្នាទៅវិញទៅមក ដ្បិតសេចក្ដីស្រឡាញ់មកពីព្រះ ឯអស់អ្នកណាដែលមានសេចក្ដីស្រឡាញ់ នោះឈ្មោះថាមកពីព្រះ ហើយក៏ស្គាល់ទ្រង់ដែរ តែអ្នកណាដែលគ្មានសេចក្ដីស្រឡាញ់ នោះមិនស្គាល់ព្រះវិញ ពីព្រោះព្រះទ្រង់ជាសេចក្ដីស្រឡាញ់នោះឯង សេចក្ដីស្រឡាញ់របស់ព្រះបានសំដែងមក ឲ្យយើងខ្ញុំស្គាល់ ដោយទ្រង់ចាត់ព្រះរាជបុត្រាទ្រង់តែ១ ឲ្យមកក្នុងលោកីយ ដើម្បីឲ្យយើងរាល់គ្នាបានរស់ដោយសារទ្រង់ នេះហើយជាសេចក្ដីស្រឡាញ់ មិនមែនជាយើងបានស្រឡាញ់ព្រះនោះទេ គឺទ្រង់បានស្រឡាញ់យើងវិញទេតើ ហើយបានចាត់ព្រះរាជបុត្រាទ្រង់ឲ្យមក ទុកជាដង្វាយឲ្យធួននឹងបាបយើងរាល់គ្នាផង ពួកស្ងួនភ្ងាអើយ បើព្រះបានស្រឡាញ់យើងរាល់គ្នាជាខ្លាំងទាំងម៉្លេះ នោះត្រូវឲ្យយើងស្រឡាញ់គ្នាទៅវិញទៅមកដែរ គ្មានអ្នកណាដែលឃើញព្រះឡើយ តែបើយើងស្រឡាញ់គ្នាទៅវិញទៅមក នោះព្រះទ្រង់គង់នៅក្នុងយើង ហើយសេចក្ដីស្រឡាញ់របស់ទ្រង់ បានពេញខ្នាតក្នុងយើងដែរ។
គឺយ៉ាងនោះឯងដែលយើងដឹងថា យើងនៅជាប់ក្នុងទ្រង់ ហើយទ្រង់ក៏គង់នៅក្នុងយើង ពីព្រោះទ្រង់បានប្រទានព្រះវិញ្ញាណទ្រង់មកយើងរាល់គ្នា ហើយយើងបានឃើញ ក៏ធ្វើបន្ទាល់ថា ព្រះវរបិតាបានចាត់ព្រះរាជបុត្រាមក ធ្វើជាព្រះអង្គសង្គ្រោះនៃមនុស្សលោក។
អ្នកណាដែលយល់ព្រមថា ព្រះយេស៊ូវ ជាព្រះរាជបុត្រានៃព្រះ អ្នកនោះឈ្មោះថា មានព្រះគង់នៅក្នុងខ្លួនពិត ហើយខ្លួនក៏នៅក្នុងព្រះដែរ យើងរាល់គ្នាបានស្គាល់ ហើយក៏ជឿចំពោះសេចក្ដីស្រឡាញ់ ដែលព្រះទ្រង់មានដល់យើង ព្រះទ្រង់ជាតួសេចក្ដីស្រឡាញ់ ឯអ្នកណាដែលនៅជាប់ក្នុងសេចក្ដីស្រឡាញ់ នោះក៏បាននៅជាប់ក្នុងព្រះ ហើយព្រះទ្រង់គង់នៅក្នុងអ្នកនោះដែរ គឺយ៉ាងនោះហើយ ដែលសេចក្ដីស្រឡាញ់បានពេញខ្នាតក្នុងយើង ដើម្បីឲ្យយើងមានសេចក្ដីក្លាហាននៅថ្ងៃជំនុំជំរះ ដ្បិតដែលព្រះទ្រង់ជាយ៉ាងណា នោះយើងរាល់គ្នាក៏យ៉ាងនោះនៅក្នុងលោកីយនេះដែរ គ្មានសេចក្ដីភ័យខ្លាចណានៅក្នុងសេចក្ដីស្រឡាញ់ឡើយ សេចក្ដីស្រឡាញ់ដែលពេញខ្នាត នោះបណ្តេញសេចក្ដីភ័យខ្លាចចេញ ពីព្រោះសេចក្ដីភ័យខ្លាចតែងជាប់មានសេចក្ដីវេទនា ហើយអ្នកណាដែលមានសេចក្ដីភ័យខ្លាច នោះមិនទាន់បានពេញខ្នាត ខាងឯសេចក្ដីស្រឡាញ់នៅឡើយទេ ឯយើងរាល់គ្នា យើងស្រឡាញ់ទ្រង់ ពីព្រោះទ្រង់បានស្រឡាញ់យើងជាមុន។
បើអ្នកណាថា ខ្លួនស្រឡាញ់ព្រះ តែស្អប់ដល់បងប្អូនវិញ អ្នកនោះជាអ្នកកុហក ដ្បិតអ្នកណាដែលមិនស្រឡាញ់បងប្អូន ដែលបានមើលឃើញទៅហើយ នោះធ្វើដូចម្តេចឡើយ ឲ្យស្រឡាញ់ដល់ព្រះ ដែលមើលមិនឃើញទៅបាន មួយទៀត យើងបានទទួលបញ្ញត្តនេះពីព្រះមកថា អ្នកណាដែលស្រឡាញ់ដល់ព្រះ នោះត្រូវតែស្រឡាញ់ដល់បងប្អូនដែរ។